VOV4.K’ho- Drim ngai 30/11, càr Dăk Lăk sơn đờm lam lơh cit sơnơm vaccine rơcang sơndră kòp Covid-19 ai kơnòm bơsram kấp 3 mờ hìu bơsram bơto bơtê sùm in mờ mờr 64 rbô nă kơnòm bơsram. Ồng Nguyễn Văn Lý, Phó Kuang atbồ Hìu sơnơm ƀòn dờng Buôn Ma Thuột pà git, dơ̆ do, ƀòn dờng geh cit ai mờr 36 rbô nă kơnòm bơsram bơh 15 tus 17 sơnam in mờ geh cit tàm 2 ngai, 30/11 mờ 01/12. Gùt càr Dăk Lăk tŭ do geh 191 rbô 58 nă kơnòm bơsram kấp 3, hìu bơsram bơto bơtê sùm mờ hìu bơsram kấp 2.

Jat broă rơndap lơh, tơnơ̆ tŭ lơh gơs broă cit sơnơm vaccine kòp Covid-19 ai kơnòm bơsram kấp 3 mờ hìu bơsram bơto bơtê sùm in, càr Dăk Lăk geh pơn jat tai lam lơh cit sơnơm vaccine ai kơnòm bơsram kấp 2 in. Anih tờm gròi sền kòp tê jê să càr Dăk Lăk pà git, nàng rơcang wil tơl, nền nòn ai broă lơh cit sơnơm vaccine kòp Covid-19 gơ wèt tus mờ kơnòm bơsram, gah lơh sơnơm neh rơndap ai cau lơh broă dipal, gàr tŭ tơngai lam lơh mờ di mờ broă gơlik geh bơh kòp bơtờp dê tàm ală tiah.

Cau mblàng K’Duẩn