VOV4.K’ho- Gơ rềng tus ală broă lơh tìs, bơta ờ niam tàm gah atbồ, sền gàr brê tàm càr Dak Lak, Kuang àng càr pà git, gam lùp khàu 2 broă lơh tìs kơn jơ\ ngan mờ hoàc huơr digơlan gơguh tus git nđờ jơt rbô lồ brê. Cơldu\ Kảnh sát lơh sa (PC03), Kuang àng càr Dak Lak pà git, 2 broă lơh tìs kơn jơ\ ngan do gơlik geh tàm 2 kơnhòal là Ea Kar mờ Ea Sup.

Brê Công ty Lâm Nghiệp Ea Kar dê gơtìp mus kơl jơh

Tàm kơnhòal Ea Kar, bơh sơn rờp kuang àng càr neh kup bàn dùl broă lơh tìs geh 5 nă cau koh kơl 28 khối dơm cho tìs mờ adat boh lam gơ wèt bơnah brê bơh Kong ti Lâm nghiệp Ea Kar dê. Broă lơh tìs dơ\ 2 là tàm kơnhòal Ea Sup. Anih lùp khàu gam lơh ală broă lơh lùp jơnau yal tơnggit broă lơh tìs tàm 4 kong ti lâm nghiệp là Cư Mlan, Rừng Xanh, Ia Lốp mờ Ia Mơr. Tàm 4 mpồl do geh tềl tơnggo\ lơh broă ờ jơh kơnòl, lơh hoàc huơr rlau 22 rbô lồ brê tàm tơngai bơh nam 2006 tus nam 2016. Broă lơh tìs geh tềl tơnggo\ kơn jơ\ ngan, bal mờ kuang àng càr, ală anih lơh broă bơh càr, bơh kơnhòal dê gam lùp khàu lơh loh.

Cau mblàng K’Duẩn