VOV4.K’ho - Bal mờ ală broă dong kờl rài kis lơh broă sa nàng dong kờl oh mi cau ùr tơnguh bơtàu broă lơh sa, ală cấp mpồl cau ùr tàm càr Dăk Lăk gam tus bal lơh jătg ală broă tă priă nàng blơi sră bảo hiểm y tế pà ală cau tàm mpồl gơtìp kal ke in. Broă lơh do neh dong kờl tai uă oh mi cau ùr in geh bơta niam tìp mờ broă lơh sơnơm, sền gàr bơta pràn kơl dang să jan, tơmù kal ke broă lơh sa tŭ gơtìp kòp tê jê să.

Dờp geh pang sră bảo hiểm y tế geh mpồl cau ùr xã jào pà, lŏ Đặng Thị Bình, kis tàm ƀòn 1, xã Ea Kpam, kơnhoàl Cư̆ Mgar, càr Dăk Lăk ngoh rơngăc ngan. Lŏ Bình pà git, hìu nhă ờ geh ù lơh sa, ùr bơklao lŏ ndrờm lòt lơh broă ơpah nàng geh priă ròng 2 nă kòn gam tàm sơnam lòt bơsram, tàm hơ̆ geh 1 nă kòn gơtìp koĕt kơl te.

Pah nam ală cấp mpồl cau ùr càr Dăk Lăk pà git nđờ rơhiang pang sră bảo hiểm y tế ai cau ùr mờ kơnòm bơsram gơtìp kal ke in

Lài do tài ờ geh sră bảo hiểm y tế den tàng tŭ gơtìp kòp tê jê să, lŏ ngòt ngan mờ broă tus hờ hìu sơnơm nàng kham tài ngòt ờ hoàc huơr priă. Bơh nhai 9 nam do, geh mpồl cau ùr xã pà sră bảo hiểm y tế tơngai tàm 1 nam, lŏ iang nùs đao. “Rài kis hìu nhă añ kung gam gơtìp kal ke, geh đah mpồl cau ùr xã ai 1 pang sră bảo hiểm den añ kung ưn ngài uă ngan, geh sră bảo hiểm nàng añ lòt kham kòp kung ờ hoan roh uă priă, den añ kung iang nùs rơlao tŭ lòt kham sơm kòp, tơmù kal ke bè broă tă priă tŭ lòt kham ai să tờm in”.

Bal mờ lŏ Bình, nam do geh 55 nă cau tàm mpồl cau ùr ndai kis tàm kơnhoàl Cư̆ Mgar geh pà sră bảo hiểm y tế. Mò Lê Thị Thu Hiền, Chủ tịch Mpồl tam klăc cau ùr kơnhoàl Cư̆ Mgar pà git, broă tàm sră bảo hiểm y tế ai cau ùr mờ kơnòm dềt gơtìp kal ke neh geh lơh tàm kơnhoàl bơh uă nam do. Kơnờm mờ hơ̆ den tàng neh dong kờl uă oh mi cau ùr mờ ală kơnòm bơsram geh tai bơta niam sền gàr bơta pràn kơl dang să jan, tơmù bơta ờ sŭk bè kal ke priă jền di lah ờ bơtoah gơtìp kòp tê jê să. Nàng geh sùm broă lơh do, ală mpồl cau ùr mờ mpồl tàm ală tiah neh geh uă broă lơh krơi is nàng tă geh priă, dờp geh broă kờñ bal bơh ală oh mi cau ùr tàm mpồl. “Broă lam sồr tă priă den geh lơh bơh ală broă lơh bơh cau ùr bè broă tơrgùm phan siồ siă nàng tăc geh priă, ală mpồl tềm pềr ha là oh mi cau ùr lam sồr tă bơh ală cau tàm mpồl cau ùr tă is mờ geh broă lơh do geh ală oh mi cau ùr kờñ bal uă ngan”.

Uă bơta lơh broă, tă tàm kes priă nàng blơi sră bảo hiểm y tế, ală oh mi cau ùr crơng gơs mpồl lơh broă ơpah mờ tă wơl priă nàng tơmŭt tàm kes priă

Ờ mìng tàm kơnhoàl Cư̆ Mgar, broă lơh pà sră bảo hiểm y tế neh geh uă cấp, mpồl tàm càr Dăk Lăk lơh jăt mờ lơh uă. Bè tàm xã Ea Kao, ƀòn dờng Buôn Ma Thuột, mpồl cau ùr xã do neh tă priă mờ broă tơrgùm mờ tam pà ală siồ siă nàng tăc. Jăt mò Nguyễn Thị Tuyết, Kuang atbồ mpồl cau ùr xã Ea Kao yal, bơh nam lài tus tŭ do, bơh broă lam sồr oh mi cau ùr tus bal tơrgùm mờ tam cah siồ siă nàng tăc, mpồl neh geh mờr 6 tơlăk đong, ngui nàng blơi 9 pang sră bảo hiểm y tế pà ală cau tàm mpồl geh rài kis gơtìp kal ke, gơtìp kòp jroă tàm xã in. “Do là dùl tàm ală broă lơh geh mpồl cấp hờ đang lam sồr là tơrgùm siồ siă đù lơh kloh tiah kis mờ bol añ kơlôi do kung là dùl kơnòl kuơ màng ngan nàng dong kờl ờ uă oh mi cau ùr geh rài kis gơtìp kal ke in”.

Mò Trần Thị Phong, Phó Chủ tịch Mpồl tam klăc cau ùr càr Dăk Lăk pà git, broă lơh pà sră bảo hiểm y tế ai cau ùr gơtìp kal ke geh ờ uă mpồl kơnhoàl mờ mpồl xã lơh jăt bơh nam 2018. Bơh tŭ hơ̆ dong kờl git nđờ rơhiang nă oh mi cau ùr in geh sề gàr bơta pràn kơl dang să jan pah nam. Gŏ geh cồng nha bơh broă lơh do cèng wơl, den tàng geh uă cấp mpồl kung bơsram bal mờ ngui tàm cấp să tờm. Geh ờ uă mpồl lơh niam bè kơnhoàl Cư̆ Mgar, thị xã Buôn Hồ mờ ƀòn dờng Buôn Ma Thuột. Nàng lơh geh cồng nha mờ geh lơh sùm, ală mpồl do neh ai tơngu me pà sră bảo hiểm y tế ai cau tàm mpồl gơtìp kal ke gơs dùl tơngu me broă lơh tàm nam nàng lam sồr oh mi cau ùr tus bal, mờ bơceh lơh broă tă priă nàng dong kờl uă oh mi cau ùr geh dờp bal. “Broă lơh bơh mpồl cau ùr den bơ̆t bơtàu ală broă lơh niam ngan, bè tơrgùm siồ siă, lơh broă ơpah jăt mpồl nàng oh mi cau ùr lơh tai mờ tă geh priă nàng blơi bảo hiểm. den broă lơh geh uă bơta bè hơ̆, den tàng tơlik geh nùs nhơm niam mờ broă lơh bơceh pa bơh ală cấp mpồl den bol añ gŏ là broă hơ̆ kờñ ngan nàng lam sồr bal”.

Broă pà sră bảo hiểm y tế ai cau tàm mpồl gơtìp kal ke bơh ală cấp, mpồl cau ùr tàm càr Dăk Lăk là broă lơh geh kuơ màng mùl màl. Ờ mìng dong kờl ală oh mi cau ùr git niam rơlao bè gơnoar kuơ tŭ ngui sră bảo hiểm y tế, tơmù kal ke priă tă tŭ di lah ờ bơtoah gơtìp kòp tê jê să, mờ bơh tŭ hơ̆ gam pơgồp bal tàm broă dong kờl tai uă oh mi cau ùr in geh tìp mờ ală broă lơh sơnơm mờ sền gàr bơta pràn kơl dang să jan, tơnguh uă broă gơglòm sră bảo hiểm y tế gùt làng bol tàm càr in.

Cau cih H’ Xíu-Cau mblàng Ndong Brawl