VOV4.K’ho- Ngai 14/12, tàm ƀòn dờng Ƀuôn Ma Thuột, càr Dăk Lăk, Ƀộ Y tế pơgồp bal mờ Viện Vệ sinh dịch tễ Tây Nguyên bơyai lơh Pơrjum jak chài tơngume rơcang sơndră kòp ờ bơtờp nam 2021. Jat jơnau yal tàm pơrjum, bơta àñ ơnòng kơn jơ̆ bơh ală kòp ờ bơtờp dê bè ung thư, gùng mhàm plai nùs, đồm sơdàng, kòp klờm soh gơ kòl jŏ nam, hian phế quản mờ 2, 3 bơta kòp ndai gam geh tus 70% kờp jơh bơta àñ ơnòng kơn jơ̆ kòp jê gùt lơgar. Ală bơta kòp do kung là jơnau lài ngan lơh gơbàn chơt să. Kờp dŭ, pah nam, khà cau chơt tài bơh kòp ờ bơtờp geh tus 77% kờp jơh khà cau chơt tài bơh kòp jê.

Tàm Tây Nguyên, nam 2020, WHO neh dong kờl 40 xã gơ wèt càr Kon Tum mờ càr Lâm Đồng tàm broă lơh atbồ, sơm mờ tơrgùm kờp yal kòp ờ bơtờp. Tus nam 2021, broă lơh do geh lam lơh tus 150 xã gơ wèt 5 càr Tây Nguyên. Ală jơnau đơs tàm pơrjum đơs nền, bơta àñ ơnòng kơn jơ̆ tàm broă atbồ mờ lam lơh broă lơh sơm, rơcang sơndră kòp ờ bơtờp kung gam uă kal ke, bơta lòng pal geh broă lơh mblàng yal, atbồ geh cồng nha rlau.

Cau mblàng K’Duẩn