VOV4.K’ho- Càr Dak Lak gam tàm tơngai prang duh ngan, uă bă brê tàm tiah do pơhìn gơlik geh ồs sa uă ngan. Nàng rơcang sơndră, ală cau tờm brê mờ gah lơh broă geh gơnoar tàm càr gam lơh ngan lam lơh ală broă lơh.

Jat ồng Mai Văn Kiện, Phó Kuang atbồ Chi cục Kiểm lâm càr Dak Lak pà git, gùt càr geh mờr 200 rbô lồ brê tàm khà mờr 500 rbô lồ brê tàm bơta đơs lài ồs sa kấp 4 halà digơlan gam mờr tus kấp 5. Trồ tơngai duh geh đơs lài jŏ jòng tus nhai 5, jơnau pơhìn ồs sa brê digơlan gam uă rlau tai.

Chi cục kiểm lâm Dak Lak neh cribơyai mờ Ủy ban Nhân dân càr ai tơlik broă rơndap lơh rơcang sơndră ồs sa brê. Đơng lam ală mpồl lơh broă mờng chài mờ cau tờm brê đal git lài uă bă tiah pơhìn gơlik geh ồs sa uă tàm ală kơnhoàl bè: Buôn Đôn, Ea Súp mờ Ea Hleo mờ bă brê mờr 195 rbô lồ nàng tơrgùm lam lơh ală broă lơh kơryan jơnau pơhìn ồs sa digơlan gơlik geh.

Cau mblàng K’Duẩn