VOV4.K’ho- Gơrềng tus rơndăp broă lơh Bơtơ̆t dơng dà jơh 4 rbô 400 tơmàn đong sơnđan mat là Krông Pach Thượng tơnơ̆ rlau 10 nam gơ dŏ jòng bal mờ uă bơta ờ niam, bơta gơkòl mờ Anih Jơnau đơs Việt Nam neh sùm yal tơngĭt tàm tơngai lài, Bộ Nông nghiệp mờ Phát triển Nông thôn bal mờ ală kấp gơnoar ătbồ càr Dăk Lăk neh kràñ cê jơh nùs tus bal mờ ală broă do sền bal neh geh bơsong.

Ngơr bam dà tàm dơlam tơnau dơng dà

Càr Dăk Lăk kung neh geh broă rơndăp lơh sơnđờm ntrờn làng bol. Jăt broă rơndăp lơh ring bal đah Mpồl ătbồ rơndăp broă lơh bơcri priă bơ̆t bơtàu gùng lòt mờ lơh broă sa sươn sre càr Dăk Lăk bal mờ Mpồl ătbồ rơndăp broă lơh bơtơ̆t dơng dà 8 gơwèt Bộ Nông nghiệp mờ Phát triển Nông thôn dê bal mờ gơnoar ătbồ 2  kơnhoàl là Ea Kar mờ M’Drăk, broă ntrờn làng bol geh lơh bơh ngai do 12/3.

Bè jơh ală bơta, tàm rơndăp broă lơh bơtơ̆t dơng dà Krông Pach Thượng geh rlau 700 hìu bơnhă làng bol gơwèt 3 thôn, là thôn 9, 10 mờ 11, xã Cư San, kơnhoàl M’Drăk kờn pal geh ntrờn nàng drơng broă dơng dà tàm dơlam tơnau dà. Khà hìu bơnhă làng bol do geh ai ơm tàm 2 tiah ntrờn ơm kis pa ndrờm gơwèt kơnhoàl Ea Kar.

Cau mblàng Lơ Mu K’Yến