VOV4.K’ho – Ngai 13/10, càr Dak Lak ngan ngồn mut lơh pơrjum cau ala mat mpồl Đảng càr dơ\ 16, tơngai lơh broă bơh nam 2015 tus nam 2020. Pơrjum do kơp kờ` lơh geh ală tam gơl pa nàng càr Dak Lak in bơtàu tơnguh pràn rlau tai, tơnơ\ dùl tơngai lơh broă geh uă khà broă lơh ờ lơh geh jat mờ rơndap broă ai tơlik. Minh Huệ, cau ai tơngit jơnau đơs Việt Nam lơh broă sùm tàm Tây Nguyên geh lùp jơnau tus mờ ồng Phạm Minh Tấn, kuang jat jơng atbồ Mpồl đơng lam Đảng càr Dak Lak bè ală bơta lòng ai tơlik tus mờ càr tàm gùng bơtàu tơnguh wèt tus gơs là anih tờm bè lơh sa – chài rơgơi – mpồl bơtiàn tàm Tây Nguyên:

Ơ ồng! Tơngai lơh broă lài, Dak Lak sùm pal kong mờ uă bơta kal ke, bơta lòng, mơya tềng đap bơta đơng lam bồ bơh mpồl Đảng, broă lơh sa mpồl bơtìan càr dê neh geh bơta tam gơl niam ngan. Mùl màl hơ\ là ală tam gơl lơi ơ ồng?

Ồng Phạm Minh Tấn: Mờ broă lơh ngan bơsong ală bơta kal ke, bơta lòng, gùt mpồl Đảng neh lơh geh uă cồng nha kuơ màng. Broă lơh sa bơh càr dê gàr khà bơtàu tơnguh niam, kờp bal geh 8% tàm dùl nam; broă lơh sa nam 2015 jơnhua rlau 1,46 dơ\; priă lơh geh tàm dùl nă cau 34 tơlak 900 rbô priă, uă rlau 2,2 dơ\ pơn drờm mờ nam 2010; cồng nha lơh sa tàm dùl lồ ù suơn sre geh mờr 72 tơlak 300 rbô priă. Rài kis làng bol tàm càr geh bơtàu tơnguh, ngap lơngai rài kis mpồl bơtiàn geh gàr niam, bơta niam kham sơm kòp geh tơnguh bơh [òn lơgar tus càr. Ală broă lơh dong kờl mpồl bơtiàn geh sền gròi mut lơh geh cồng nha, ngan là ală broă lơh dong kờl tus mờ làng bol kòn cau. Tus nam 2015, khà hìu nhă rơbah gùt càr gam 9,6%, tàm hơ\ khà hìu nhă rơbah tàm tiah làng bol kòn cau gam 14,6%, gơmù 24% pơn drờm mờ nam 2010.

Ơ ồng, nàng rơcang tus pơrjum mpồl Đảng càr Dak Lak dơ\ 16, den tàm broă cih kơrnuat, mpồl đơng lam Đảng càr Dak Lak neh đal git rơndap broă kuơ màng, broă lơh tam gơl tus mờ tơngai lơh broă tus là `chi?

Ồng Phạm Minh Tấn: Càr geh pơnjat tai brồ guh ală bơta pràn neh geh, mơkung lam sồr tơl bơta pràn nàng bơcri bơtàu tơnguh, bơt bơtàu càr Dak Lak pràn kơldang, kơ\ kơljap tơl làm, lơh gơs bơnàng jă nàng mhar gơs là anih tờm bè lơh sa, chài rơgơi, mpồl bơtiàn tàm Tây Nguyên.

Lài ngan là mut lơh geh cồng nha broă tam gơl sră nggal lơh broă, kờ` tam gơl niam anih bơcri priă. Dơ\ 2 là chồl pràn broă hòi jà bơcri priă, hòi jà ală bơnah priă dong kờl nàng bơtàu tơnguh phan bơna lơh sa mpồl bơtìan tàm càr. Dơ\ 3 là tơr gùm đơng lam broă rơndap tap sèng wơl broă lơh sa, tàm hơ\ tơr gùm rơndap tap sèng wơl gah lơh sa suơn sre jat broă lơh tơnguh cồng nha lơh geh mờ bơtàu tơnguh kơ\ kơljap. Dơ\ 4, càr sền gròi tus ală gah broă lơh drơng ala, ngan là bơtàu tơnguh nhơl chờ, geh tam klac bal mờ ală càr tàm Tây Nguyên.

Càr kung tơlik ờ uă broă lơh: Tơr gùm ai geh broă lơh mờ tơnguh priă lơh geh cau lơh broă in; bơtàu tơnguh ringbal đah ală tiah, ală [òn làng bol ơm kis; tơnguh jơnhua cồng nha broă tơmù rơbah dùl bă kơ\ kơljap. Rơndap ù tiah, atbồ, tơnhàu, ngui tềm pềr, geh cồng nha mờ kơ\ kơljap ală bơta phan geh is, ngan là phan kuơ, ù, dà, brê,… Mhar lơh jơh sră nggal bè ù tiah kờ` drơng broă atbồ, ringbal đah rơndap broă ngui ù mờ rơndap ù tiah nàng bơtàu tơnguh lơh sa mpồl bơtiàn mờ rơndap ală gah, ală broă lơh. Bơsong tơl làm bơta bè ù ơm, ù lơh sa làng bol kòn cau in, mut lơh lài broă hòi jà ală rơndap broă bơcri mut ngui khoa học công nghệ.

Ơ ồng, tàm ală dơ\ lơh broă mờ kuang bàng dờng màng càr Dak Lak, ală kuang đơng lam bồ Đảng, dà lơgar ndrờm tơngkah càr pal sền gròi tus broă lơh kuang bàng mờ tam klac bal tàm mpồl. Bè hơ\ broă lơh bè mpồl cau drơng broă mờ nùs nhơm tam klac tàm mpồl geh ai tơlik tàm tơngai lơh broă tus bè lơi?

Ồng Phạm Minh Tấn: Pơrjum tàm [òn lơgar mờ pơrjum kơnă hơđang neh lơh jơh den broă lơh bè mpồl cau drơng broă bơh sơn rờp di mờ jơnau sồr, là sơnam gam kơnòm să rlau mờ tơngai lơh broă lài, mờ uă kuang bàng tơl sơnam nàng gơtùi tus bal bơh 2 tus 3 kơnă. Gơ wèt mờ jơnă càr den Mpồl đơng lam mpồl Đảng càr kung bè lơh broă sùm mpồl đơng lam Đảng càr, mpồl duh broă bè cau drơng broă bơh pơrjum dê neh bơt bơtàu dùl rơndap broă bè cau drơng broă jat jơnau pơlam bơh dà lơgar dê dùl bă niam ngan, mờ tu\ do den sră cih mat ală cau geh sac rơ wah neh geh mpồl lơh broă bơh Gah gùng dră bal dà lơgar lơh broă càr Dak Lak nàng sền sơ wì. Bè bơta tam klac tàm mpồl den lơh broă sùm, mpồl đơng lam sùm đal git, tam klac là bơta pràn bơh mpồl Đảng dê. Tàm mpồl đơng lam, mpồl lơh broă sùm, tàm dơlam is bơh lơh broă sùm dê, den bơta tam klac bal sùm geh tơnguh jơnhua mờ mut lơh niam, ngan là lơh jat kơrnuat làng bol lơh tờm tàm Đảng, tàm ală bơta đơng lam bồ broă lơh bơh mpồl Đảng dê kung bè gơnoar atbồ mờ làng bol tàm càr Dak Lak dê.

Ưn ngài ồng uă ngan.