VOV4.K’ho- Drim ngai 10/11, tàm [òn dờng Buôn Ma Thuột, Ủy ban Nhân dân càr Dak Lak pơgồp bal mờ Học viện Chính trị dà lơgar Hồ Chí Minh bơyai lơh pơrjum khoa học “Tơnguh cồng nha quản trị mờ hành chính dà lơgar càr Dak Lak”. Jat cồng nha sền sơ wì khà cồng nha quản trị mờ hành chính dà lơgar kấp càr tàm lơgar Việt Nam (PAPI) nam 2019, Dak Lak geh 41,07 điểm, ơm dơ\ 62 tàm khà 63 càr, [òn dờng.

Jat PGS.TS Lê Văn Chiến, Kuang atbồ Viện lãnh đạo học mờ chính sách công, kờ` tơnguh khà PAPI, Dak Lak pal lam lơh ală broă lơh sền gròi ua\ hờ kấp hơ đơm, pal sền làng bol là nac nàng drơng. Bơh hơ\ drơng jat bơta niam nùs bơh làng bol dê nàng tơnguh ală khà gam lơyah dùl bă geh cồng nha ngan ngồn mờ kơ\ kơljap rlau.

Tàm tơngai tus, bơdìh mờ chồl pràn quản trị điện tử, quản trị tiah ơm kis, drơng broă ala dà lơgar, sră nggal hành chính dà lơgar, gơ noar atbồ ală kấp càr Dak Lak pal tơnguh pràn jak mblàng lơh loh bơh mpồl kuang bàng, công chức dê, kươmàng là tơnguh jơnau git wă, bơta chài ai ală kuang bàng tìp mat tơn mờ làng bol.

Cau mblàng K’Duẩn