VOV4.K’ho – Tàm kàl rlô bơkang do, tàm càr Dak Lak geh uă ngan mè bèp kơnòm bơsram cih mat ai kòn he dê in lòt bơsram ală ơdu\ bơsram bơdìh mờ tàp bơta chài tàm ală anih tờm mờ hìu chài rơgơi ala tài ai kòn in lòt bơsram sră kàl rlô bơkang. Gi\t geh jơnau kơlôi sơnơng bơta kơ\p kờ` bơh mè bèp kơnòm bơsram dê, càr Dak Lak bơyai lơh uă anih nhơl geh kuơ ngan nàng bơtàu tơnguh bơta chài ai kòn dềt in..

Bơh tàm gùl nhai 5 tơn, gi\t kòn klau rcang ơm rlô bơkang, bi ùr Hồ Thị Dung ơm tàm ntum Ea Tu, [òn dờng Buôn Ma Thuột, càr Dak Lak là mè bơh oh klau Hồ Hoàng Đại Dương, 6 sơnam neh cih mat ai kòn in bơsram ơdu\ Kơbàng kờp sồ bơsram bồ tơngoh jak Vinabacus. Bi ùr Dung pà gi\t, bi kơno yal bè ơdu\ bơsram do tàm facebook bơh dùl nă cau bơyô dê, sền go\ gơlơh kuơ den tàng cih mat ai kòn in bơsram. Tơnơ\ dùl tu\ tơngai bơsram, sền go\ oh bơsram mhar gi\t mờ geh bơta jak chài den tàng bi iang nùs ngan ai kòn in bơsram tai. Tàm kàl rlô bơkang do, bi kung rcang ai kòn in lòt tàp re dà nàng sơlơ pràn tai să ja`. Bi ùr Hồ Thị Dung, đơs bè do: “Kung neh tus kàl rlô bơkang sơl den tàng là a` rcang ai kòn in lòt bơsram re dà. Ai bè bồ tơngoh jak den ai kòn in lòt bơsram ơdu\ bơto Vinabacus do. Ơdu\ bơsram do a` sền go\ gơ kuơ ngan, bơto oh in bơta chài lơh wơl, hơ\ sồng tơrgùm bồ tơngoh bơta kah gơ niam ngan. Kòn a` dê bơsram ơdu\ do neh 3 poh do mơya a` sền go\ bơta pràn jak kơlôi sơnơng mờ kah kung là jak mờ jo\ ngan. Bal mờ bơtàu tơnguh bè bồ tơngoh kơlôi sơnơng jak chài den kòn kung kờ` pal dờng pràn bè să ja` hơ\ sồng tàp kòn in ală bơta chài boh bơr lơh quèng mờ ală bơyô mờ rài kis gùt dar”.

Tu\ jiơ bơsram geh lơh bal ala\ bơta  nhơl mờ broa\ lơh  mpồl dong kơnòm dềt bơsram bơta chài.

Bi ùr Trần Thị Ánh Nguyệt, ơm tàm ntum Cư\ Suê, kơnhoàl Cư\ Mgar, càr Dak Lak dê geh kòn ùr pa bơsram jơh ơdu\ 1. Bi rcang tàm kàl rlô bơkang do geh dan gơnoar mờ anih lơh broă nàng ai kòn in rê hờ [òn tờm còp ồng mò deh mè tàm càr Nghệ An. Nàng gơ in rềp mềl mờ ồng mò, mờ bi ùr Nguyệt kung kờ` kòn bi dê geh nhơl chờ hờp mờ lơh quèng mờ rài kis [òn lơgar tàm tiah [òn ndai. Tơnơ\ hơ\ bi geh ai kòn in lòt bơsram ală ơdu\ bơsram bơdìh nàng kòn geh nhơl chờ hờp mờ bơsram tàp bơta chài ơm kis. Bi ùr Trần Thị Ánh Nguyệt, đơs: “A` rcang ai kòn in bơsram ală ơdu\ bơsram bơdìh, pơn yơu bè tàp re dà mờ đơs crih tam ya mờ ờ go\ ai kòn in lòt bơsram sră tàm kàl rlô bơkang ờ. Jăt a` den ờ go\ di rồn bơklơn oh kòn bè ală broă bơsram sră pơ àr mờ a` kờ` kòn a` dờng pràn tơl làm bơh ală broă lơh bè hơ\, tàm hơ\ geh ală broă bơsram ơdu\ bơdìh den geh lơh geh bơta chài ơm kis ai kòn in”.

Broa\ lơh đơs crih tam ya mờ pơr lòng  bơta chài bơh kơnòm dềt tàm kơnhoàl Krông Pach.

Gi\t geh jơnau kơlôi sơnơng bơta kơ\p kờ` bơh uă mè bèp kơnòm bơsram dê kơ\p kờ` kòn he dê geh anih nhơl kuơ tàm kàl rlô bơkang, uă anih tờm bơto bơtê mờ hìu chài rơgơi tàm Dak Lak neh pờ ală ơdu\ bơsram bơdìh, ơdu\ bơto bơta chài halà mpồl tàp pràn să ja` gơhòi uă ngan kơnòm dềt mờ kơnòm bơsram tus bal, bè: tơngai bơsram tàm mpồl ling, mpồl bơta chài [ươn, broă lơh “dùl ngai lòt nàng gi\t”…Anih tờm kơlôi sơnơng bơto bơtê mờ bơtàu tơnguh Cao Nguyên tàm [òn dờng Buôn Ma Thuột kung bơyai lơh uă broă lơh kàl rlô bơkang lời ai kơ nòm dềt in, tàm hơ\ geh broă lơh “Ngai chờ hìu bơnhă” kờ` lơh geh tu\ tơngai niam nàng mè bèp mờ ală oh geh nhơl chờ hờp mờ lơh broă bal. Bi ùr H’Bép Ê`uôl, atbồ Anih tờm kơlôi sơnơng bơto bơtê mờ bơtàu tơnguh Cao Nguyên, pà gi\t: “Tàm ngai chờ hìu bơnhă do den bol a` geh tơrgùm uă tàm bơta chài lơh broă bal đah mè bèp mờ kòn, lơh bè lơi nàng mè bèp mờ kòn gi\t wa\ bal mờ lơh gơs bal broă lơh lơi hơ\. Pơnyơu bè là dơ\ pơrlòng tru\ gơm phan sa, 4, 5 hìu hơ\ lơh bal, tru\ gơm bal phan sa den khi geh tàm yal tơngi\t bal ală bơta mờng chài tru\ gơm phan sa mờ broă chài rơndăp tăp sèng phan sa bè lơi, dùl kơbàng sa gơlơh bè lơi. Bơh hơ\, ală oh bơsram geh ală bơta chài rơndăp tăp sèng bơh cau dờng, mờ ală oh kung gi\t sơl dong kờl mè bèp bè lơi nàng rcang ai dùl dơ\ sa bềng bơta kuơ bal mờ hìu bơnhă mờ ală cau gùt dar”.

Tơnơ\ dùl nam bơsram kal ke, kàl rlô bơkang là tu\ tơngai nàng ală kơnòm dềt geh nhơl chờ hờp mờ ơm rlô să. Uă mè bèp kơnòm bơsram kung kơ\p kờ` kòn he dê geh dùl anih nhơl geh kuơ ngan lài mờ tu\ mu\t tàm nam bơsram pa. Cih mat ai kòn in bơsram ală ơdu\ bơto bè bơta chài mờ ală broă lơh bơsram bơdìh gam là bơta sac rwah bơh uă mè bèp kơnòm bơsram dê tàm kàl rlô bơkang.

                     Cau mblàng Lơ Mu K’ Yến