VOV4.K’ho- Ngai 18/3 tàm dơ̆ pơrjum tơn jơh, Hội đồng Nhân dân càr Dăk Nông neh sền swì ai jơnau đơs mờ lơh nền gơwèt mờ 9 jơnau yal, sră yal, rơndăp broă lơh kuơmàng. Tàm hơ̆ geh Kơrnoat bè broă crơng gơs Cơldŭ lơh broă Mpồl kuang bàng Quốc hội mờ Hội đồng Nhân dân càr Dăk Nông jăt tàm bơta tơmŭt bal 2 anih lơh broă Cơldŭ lơh broă Mpồl kuang bàng Quốc hội mờ Cơldŭ lơh broă Hội đồng Nhân dân càr.

Tàm dơ̆ pơrjum, ală kuang bàng neh ring bal sră yal bơh Ủy ban Nhân dân càr Dăk Nông dê bè sồr tơn jơh ăt gơnoar broă 2 nă kuang bàng geh jơng tàm Ủy ban Nhân dân càr dê gơwèt mờ ồng Nguyễn Tấn Bi, Kuang ătbồ Sở Tài chính mờ ồng Trần Văn Nam, Kuang ătbồ Sở Thông tin mờ Truyền thông tàm ntrờn lơh broă. Mơkung ai sră đùh pồ bơtơl 2 gơnoar broă kuang bàng geh jơng Ủy ban Nhân dân càr gơwèt mờ ồng Hoàng Văn Thuần, Kuang ătbồ Sở Tài Chính mờ ồng Trần Văn Hiệp, Kuang ătbồ Sở Tài nguyên mờ Môi trường.

 Cau mblàng Lơ Mu K’Yến