VOV4.K’ho - Broă neh lơh geh mờ gàr kơl jăp bè khà broă sền gàr bơta lơngăp lơngai, ờ do ờ dă tàm broă bơ̆t bơtàu ƀòn lơgar pa geh kuơ màng ngan, pơgồp bal tàm broă gơrềng niam gơwèt mờ ală khà broă lơh ndai. Tàm càr Dak Nông neh bơ̆t bơtàu mờ lơh geh uă ală broă sền gàr niam bơta lơngăp lơngai tàm ală ƀòn bè ală mpồl cau kơnòm să sơndră mờ cau tìs, mpồng ƀòn, săp ntas klờng bè bơta lơngăp lơngai ờ do ờ dă tàm broă bơ̆t bơtàu ƀòn lơgar pa.

 Jăt jơnau yal bơh Mpồl đơng lam ală broă lơh jăt jơnau kờñ bơh dà lơgar càr Dak Nông dê, khà broă sền gàr bơta lơngăp lơngai là dùl tàm ală khà broă kal ke kờñ lơh jăt, tài khà broă do gơrềng tàm uă bơta, uă mpồl lơh broă tus bal mờ ƀuơn ngan gơtìp tam gơl. Mơya, ai geh do là khà broă lơh kuơ màng lài ngan, geh bơta niam ai broă lơh geh mờ gàr kơl jăp uă khà broă lơh ndai, den tàng ală nam do, ală cấp ủy, gơnoar atbồ tàm ală tiah sùm sền gròi đơng lam, lam sồr lơh jăt.Pah nam, cấp ủy, gơnoar atbồ ală cấp ndrờm geh nghị quyết, rơndăp broă lơh bè broă gàr niam bơta lơngăp lơngai, ờ do ờ dă. Ală tiah đơng lam bơyai lơh geh cồng nha broă lơh gùt làng bol sền gàr bơta lơngăp lơngai Dà lơgar. Mpồl kuang àng ală cấp rơcang bơ̆t bơtàu broă lơh bè gàr niam bơta lơngăp lơngai chính trị mờ ờ do ờ dă mpồl bơtiàn, pơgồp bal mờ broă mùl màl tàm ală tiah, bơsong ală broă kal ke, ờ pràn tàm ală tiah.Geh pơnrơ ngan, kơnhoàl Dak Rlấp, càr Dak Nông neh bơ̆t bơtàu mờ lơh uă ală broă lơh nàng gàr niam bơta lơngăp lơngai tàm ală ƀòn bè ală mpồl cau kơnòm să sơndră mờ cau tìs, mpồng ƀòn, săp ntas klờng mờ camera sền gàr bơta lơngăp lơngai...

Bơh tŭ hơ̆, kơnhoàl ờ mìng tơnguh niam gơnoar bơh mpồl lơh broă tờm geh kuang àng, ling klàng, ling gàr ƀòn mờ gam hòi jà jơh gùt mpồl bơtiàn ƀòn lơgar gàr niam bơta lơngăp lơngai. Den tàng geh 9 tàm 9 xã tàm kơnhoàl ndrờm geh khà broă bè sền gàr bơta lơngăp lơngai.Tàm kơnhoàl Dak Mil, ală cấp, ală gah lơh broă, mpồl lơh broă tơnguh broă pơgồp bal, bơyai lơh uă broă lơh bè lam sồr gùt làng bol tus bal sền gàr bơta lơngăp lơngai Dà lơgar; lam sồr kuang bàng, công chức, làng bol tơnguh jơnau gĭt wă bè bơta kuơ, bơta kuơ màng bơh broă sền gàr bơta lơngăp lơngai. Bơh tŭ hơ̆, bơta lơngăp lơngai mpồl bơtiàn tàm ală xã geh sền gàr niam, ală bơta tìs, bơta ờ niam tàm mpồl bơtiàn mờ ală broă lơh tìs mờ adăt boh lam geh gơmù. Ală broă lơh bè mpồl sơndră mờ tam lơh, pù pờng tàm hìu nhă, mpồl ƀòn bè bơta lơngăp lơngai, hìu bơsram niam ờ do ờ dă geh lơh sùm, tơnguh geh cồng nha.

 Tàm kơnhoàl Dak Song, broă lơh “Săp ntas klờng sền gàr bơta lơngăp lơngai” neh pơgồp bal niam tàm broă lơh gơs khà broă sền gàr bơta lơngăp lơngai ờ do ờ dă mpồl bơtiàn tàm broă bơ̆t bơtàu ƀòn lơgar pa. Mìng is tàm ƀòn 7 mờ ƀòn 8 xã tiah nhàr dà lơgar Thuận Hà neh crăp geh 5 nơm klờng mờ ai tàm ală tiah geh tơrgùm uă làng bol ơm kis. Pah dơ̆ săp klờng ntas geh jan, săp ntas kơno tus tàm bơta ơnàng 1 kơi sồ 500 thơ̆k. Tơnơ̆ mờ tŭ kơno săp ntas klờng, geh ờ uă mpồl sền gàr bơta lơngăp lơngai làng bol tus mơ tàm tiah hơ̆ nàng gĭt ală bơta mờ bơsong broă gơtìp.

 Ồng Nguyễn Đình Lương, Kuang atbồ kuang àng xã Thuận Hà, kơnhoàl Dak Song pà gĭt: di lah pơn drờm mờ lài do, bơta lơngăp lơngai ờ do ờ dă tàm ală ƀòn 7, 8 neh geh uă tam gơl niam, tàm hơ̆ uă ngan là bơh tŭ geh broă lơh jan klờng den ờ hềt geh gơtìp dùl dơ̆ kơñao phan lơi. Cồng nha mùl màl ngan bơh broă lơh do dê là lam sồr geh nùs nhơm gĭt jơnau bal bơh làng bol dê tàm broă lơh jăt nền nòn adăt boh lam, tơnguh uă nùs nhơm rơcang lài, tus bal kơrian cau tìs. Bơh tŭ hơ̆, anih lơh broă geh gơnoar di tŭ tam dră, kơrian broă lơh bơh ală cau tìs mờ bơsoñg ală broă gơtìp gơrềng tus mờ bơta lơngăp lơngai.Jăt jơnau đơs bơh Mpồl đơng lam ală broă lơh jăt jơnau kờñ bơh dà lơgar càr Dak Nông dê, tơnơ̆ mờ rơlao 10 nam lơh jăt broă lơh jăt jơnau kờñ bơh dà lơgar bơ̆t bơtàu ƀòn lơgar pa tơngai bơh nam 2010 tus 2020, broă sền gàr bơta lơngăp lơngai tàm tiah ƀòn lơgar geh uă tam gơl niam. Tàm hơ̆, mpồl kuang àng neh rơcang pơlam, pơgồp jơnau đơs mờ cấp ủy, gơnoar atbồ lơh jăt niam, bơsong di tŭ ală tiah gơtìp tam lơh tam lah, tam phà, yal yă, ai tơl bơta niam broă lơh jăt ală rơndăp broă lơh kung bè kơnòl tơnguh bơtàu broă lơh sa mpồl bơtiàn tàm ală tiah dê.

 Tus tŭ do, gùt càr Dak Nông geh 45 tàm 60 xã neh lơh geh mờ gam gàr kơl jăp khà broă bè sền gàr bơta lơngăp lơngai mờ khà geh 75%. Tàm rài tơnguh bơtàu tŭ do, kờñ sền gàr kơl jăp, tơnguh uă cồng nha do, den pal geh broă lơh ngan sùm mờ ndrờm bal bơh cấp ủy, gơnoar atbồ mờ làng bol tàm ƀòn lơgar tàm broă bơ̆t bơtàu ƀòn lơgar pa. Càr Dak Nông gam chồl pràn lơh jăt broă bơ̆t bơtàu ƀòn lơgar pa tơnguh uă, den broă dùl nùs bal bơh jơh ală mpồl lơh broă chính trị, bal mờ làng bol, nùs nhơm lơh ngan pràn kơl dang bơh mpồl lơh broă tờm, ờ ai geh broă sền ờ sơ̆p, ờ sền gròi nền nòn.

Cau mblàng Ndong Brawl