VOV4.K’ho- Pal lơh glài krà` kơnòl cau tờm bơcri priă ờ ai geh priă. Hơ\ là jơnau sồr bơh ồng Lê Diễn, Bí thư Tỉnh ủy, Chủ tịch HĐND càr Dăk Nông dê tàm pơrjum ờs mờng nhai 6 pa do. Kờp jơh broă rơndăp lơh priă bơcri bơtàu tơnguh nam 2019 bơh càr Dăk Nông atbồ là rlau 1.900 tơmàn, mơya kờp du\ tus jơh nhai 6 hơ\ sồng ai geh 760 tơmàn, lơh geh pơgăp 40% broă rơndăp lơh, jơnhoa rlau 12% pơndrờm bal dùl tu\ mờ nam 2018.

Sền bal, broă lơh jat ai priă broă rơndăp lơh priă nam do jơnhoa sơl pơndrờm bal dùl tu\ mờ nam lài, mơya kung gam lơyah sơl. Gơbàn jơnau do uă ngan là tài bơh ală cau tờm bơcri priă ờ hềt krà` cê jơh nùs sồr ngan cau tờm lơh broă; ờ go\ yal tơn ală kal ke kòl yan ai ală anih lơh broă atbồ in nàng di tu\ tă bơsong. Bí thư Tỉnh ủy Dăk Nông sồr , tus jơh ngai 30/9 tus, dilah cau tờm bơcri priă lơi ờ lơh gơtùi den krà` cê jơh nùs jàu priă, geh tu\ là tam gơl cau tờm bơcri priă.

Cau mblàng Lơ Mu K’Yến