VOV4.K’ho- Ală tiah tàm ù tiah càr Dak Nông neh dơ\ le\ bal bơyai lơh dơ\ jàu mờ dờp ling nam 2021, tơngăc mờr 1 rơbô nă ơruh pơnu jak ngan lòt ling lơh jat kơ nòl broă sền gàr dà lơgar. Dơ\ jàu mờ dờp ling tàm ală kơnhòal, [òn dờng càr Dak Nông geh bơyai lơh tàm nùs nhơm yu\ rơ yùm, mhar, gàr niam bơta ờ do ờ dă ngan tàm tơngai kòp Covid-19 geh gơlik geh kal ke.

Tàm khà rlau 900 nă ơruh pơ nu jak ngan bơh càr dê lòt ling lơh kơ nòl broă sền gàr Dà lơgar ua\ ngan geh bơh 18 tus 25 sơ nam, pràn kơl dang să jan khà 1 mờ khà 2, geh tus rlau 50%, tàm 99% geh bơta bơsram bơh kấp bàr rlau hơ đang. Geh 16 nă ơruh pơnu jơh bơsram cao đẳng, đại học, trung kấp, 1 nă đảng viên mờ 99% đoàn viên, rlau 21% ơruh pơnu jơi bơtìan kòn cau tàm tiah do dê. Ală ơruh pơnu càr dê geh lơh jat kơ nòl broă ling klàng tàm Bộ Kuang àng, Tổng cục Kỹ thuật (Bộ Quốc phòng), Lữ đoàn ling rơndeh par 234, Quân đoàn 3 (Bộ Quốc phòng), Lữ đoàn 573 (Quân khu 5), Gah đơng lam ling klàng càr, Mpồl ling sền gàr tiah nhàr lơgar mờ Kuang àng càr.

Cau mblàng K’ Hạnh