VOV4.K’ho – Daklak tu\ do geh rlau 5 rbô 600 nă cau gơtìp sơnơm khih điôxin lơh aniai, uă ngan ndrờm geh rài kis kal ke, siơu siar. Kờ` dong kờl hìu nhă cau gơtìp sơnơm khih điôxin lơh aniai brồ guh tàm rài kis, ală kơnă mpồl cau gơtìp sơnơm khih điôxin lơh aniai càr Daklak neh lơh ngan lam sồr ală mpồl bal, cau dùl nă să tă pơgồp bơt bơtàu kes priă cau gơtìp sơnơm khih điôxin lơh aniai. Bulah bè hơ\, bơh bồ nam tus tu\ do, gùt càr mìng pa lam sồr geh rlau 222 tơlak, geh rlau 30% rơndap broă. Tài khà priă lam sồr ờ uă den tàng khà cau geh dong kờl dùl êt ngan. Den tàng tơngai tus, mpồl cau gơtìp sơnơm khih điôxin lơh aniai ală kơnă tàm càr kơp kờ` ngan dờp geh uă bơta sền gròi, dong kờl uă rlau tai bơh ală anih lơh broă, mpồl bal, cau 1 nă să geh nùs nhơm niam tàm càr mờ bơdìh càr nàng geh tai bơta dong kờl ală cau gơtìp aniai.

               Cau cih mờ yal tơnggit K’ Duẩn.