VOV4.K’ho- Drim òr 29/8, Sở Nông nghiệp mờ Phát triển nông thôn càr Daklak bơyai lơh dơ\ tơngklàs rlau 36.500 nơm kòn ka sơntìl ală bơta kờ` lơh geh wơl uă ka tàm dà, tơnguh jơnhoa jơnau gi\t wa\ bè broă lơh sền gàr phan kuơ tàm dà tàm mpồl bơtiàn.

Dơ\ do, Daklak tơngklàs ka sơntìl tàm tơnau dà Lak, kơnhoàl Lak, tơnau dà Buôn Triết, tơnau dà Sen, kơnhoàl Krông Ana; tơnau dà hìu măy pờ tơlik ồs đèng Srepok, kơnhoàl Buôn Đôn. Mờ gi\t nđờ rhiang tơnau dà mờ rlau 830 nơm dà croh jòng rlau 10 kơi sồ, càr Daklak geh ka geh is uă ngan; tàm hơ\ uă bơta ka pơnrơ is geh khà priă phan bơna uă, bè: ka lăng, ka mbùng rơpu, ka thát lát…

Pah nam, gah lơh broă geh gơnoar ndrờm lam lòt tơngklàs ka tàm ală dà dờng, dà croh, tơnau dà dờng, pơgồp bơnah lơh geh uă ka tàm dà, mblàng yal tơnguh jơnhoa jơnau gi\t wa\ bè broă lơh sền gàr phan kuơ tàm dà tàm mpồl bơtiàn.

Cau cih mờ yal tơngi\t- Lơ Mu K’Yến