VOV4.K’ho - Broă lơh jăt jơnau kờñ dà lơgar bơ̆t bơtàu ƀòn lơgar pa gơs broă lơh ơnàng tàm gùt lơgar đơs bal, càr Dak Nông đơs is. Broă lơh do neh ai geh bơta pràn kơl dang, tơrgùm broă tam klăc bal bơh ală làng bol tàm mpồl bơtiàn, hòi jà bơta pràn bè nùs nhơm bal mờ phan bơna nàng bơ̆t bơtàu tiah ƀòn lơgar ngai sơlơ niam bơnĕ, tàm hơ̆ uă ngan là tàm tiah kal ke mờ tiah làng bol kòn cau

Bŭ lah geh uă ù tiah, mơya bơta jơgloh, rơƀah gùt nam gam gơtìp sùm tàm rài kis hìu nhă ồng Điểu Byan (kòn cau Mnông), kis tàm ƀòn Điêng Đu, xã Đăk Ngo, kơnhoàl Tuy Đức, càr Dak Nông. Bơta tờm kung gam là tài hìu nhă ồng ờ hềt gĭt tàm broă lơh sa, broă lơh sa jăt broă lơh lài do.

                                                                  Ồng Điểu Byan ai kơnrồ sa ñhơ̆t

Broă bơ̆t bơtàu ƀòn lơgar pa neh dong kờl ồng Điểu Byan jòi gùng dà di pal tàm broă tơnguh bơtàu lơh sa mờ brồ guh lơh pas. Tơnơ̆ mờ tŭ ồng geh tus bal mờ uă ơdŭ bơto pơlam broă lơh sa suơn sre, bơsram khoa học-kỹ thuật neh bal mờ hìu nhă rồ ù, ai rơndăp broă lơh wơl suơn tam tờm điều, kơphe tàm bă ù 8 lồ. Ù ờ kơrian nùs nhơm kòn bơnus, ală tờm điều sơntìl pa, kơphe sơntìl pa neh ai geh tơnhào uă mờ priă geh pah nam gĭt nđờ rơhiang tơlăk đong. Tŭ neh klàs mờ rơƀah, ồng Điểu Byan bơcri priă ròng tai kơnrồ sơntìl pa mờ gùng dà broă lơh uă bơta phan tam, phan ròng nàng pleh mờ gơtìp ờ geh tơnhào mờ khà priă gơmù bơh ală bơta phan geh lơh bơh broă lơh sa suơn sre, kơnờm mờ hơ̆, priă geh bơh hìu nhă sùm geh ring niam. Tŭ do, pah nam, ờ kờp priă bơcri tàm broă lơh sa, hìu nhă ồng geh rơlao 400 tơlăk đong. Ờ mìng lơh pas să tờm, ồng Điểu Byan gam dong kờl 4 hìu rơƀah in càn kơnrồ me nàng ròng deh kòn ai kơnrồ kòn, nàng ai geh tơl bơta niam bè priă nàng làng bol tàm ƀòn geh klàs mờ rơƀah bal. Bơh tàm ală broă lơh mùl màl, geh kuơ, geh cồng nha, pa do ồng Điểu Byan geh pồ mŭt bal tàm cấp ủy chi bộ, kuang atbồ ƀòn Điêng Đu.

Đơs bè broă bơ̆t bơtàu ƀòn lơgar pa, ồng Điểu Byan pà gĭt, do là broă lơh geh kuơ màng ngan, geh mùl màl mờ làng bol, tàm hơ̆ uă ngan là tàm tiah kal ke mờ tiah làng bol kòn cau. Kơnờm mờ geh broă lơh pa, lam sồr, tơrgùm geh bơta pràn tam klăc bal; lơh tam gơl pa bồ tơngoh kơlôi sơnơng bơh làng bol tàm broă lơh sa pơgồp bal mờ khoa học – Công nghệ; pơgồp bal kơnòl bơh să tờm mờ hìu nhă, mpồl bơtiàn mờ ƀòn lơgar, ai geh broă pơgồp bal tàm mpồl bơtiàn.

Bơ̆t bơtàu ƀòn lơgar pa neh lơh muh măt ƀòn lơgar tam gơl tơl ală bơta, tàm hơ̆ geh bal bè phan bơna, nùs nhơm mờ kòn bơnus pa; ai geh broă pơgồp bal bè nùs nhơm bal mờ bơta chài rơgơi bơh ală jơi bơtiàn kòn cau bal. Kung jăt ồng Điểu Byan yal, geh làng bol pin dờn pồ lơh kuang atbồ ƀòn là bơta pơnyờ să ngan. Mơya, do kung là kơnòl dờng màng ngan, să tờm sùm lơh ngan lơh gơs kơnòl nàng bal mờ làng bol kis tàm ƀòn lơh geh cồng nha broă bơ̆t bơtàu ƀòn lơgar pa.

Lài mờ tŭ lơh jăt broă bơ̆t bơtàu ƀòn lơgar pa, ƀòn Bu Bir, xã Quảng Tín, kơnhoàl Dak Rlấp, càr Dak Nông geh 96 hìu làng bol, mơya geh tus 16 hìu rơƀah mờ 30 hìu ndrờm mờ rơƀah. Gùng lòt mìng là ală gùng ù, lơh gơtìp kal ke tàm broă pơn diang phan kă bro, phơng sih tus tàm ală tiah lơh broă sa, cau kă bro sùm rồn bơklơn khà priă. Bơh tŭ lơh jăt broă bơ̆t bơtàu ƀòn lơgar pa, geh broă dong kờl bè priă lơh gùng lòt, dong kờl phan tam, phan ròng, khoa học – kỹ thuật..., làng bol kis tàm do chờ hờp ngan ai ù lơh gùng, tam gơl phan tam geh cồng nha uă, ngui khoa học-công nghệ tàm broă lơh sa geh cồng nha uă. Tŭ do, gùt ƀòn mìng gam 4 hìu rơƀah, 10 hìu ndrờm mờ rơƀah, khà gùng geh dă mờ bêtông tàm ƀòn rơlao 90%...

Tus tŭ do, gùt càr neh geh 29 xã tàm 60 xã geh khà ƀòn lơgar pa. Gơwèt mờ 12 xã kal ke gơwèt bàr kơnhoàl 30a là Tuy Đức mờ Dak Glong tus tŭ do ndrờm neh geh 10 khà broă; broă lơh sa mpồl bơtiàn tiah kal ke, tàm hơ̆ uă ngan là tiah làng bol kòn cau geh sền gròi mờ bơcri priă lơh.

Kuang atbồ Ban dân vận Tỉnh ủy Dak Nông mò Hà Thị Hạnh pà gĭt, gơwèt mờ làng bol kòn cau kis tàm càr Dak Nông đơs bal, tàm hơ̆ uă ngan là làng bol kòn cau kis dùl bă bơh yau den mpồl tờm là kra ƀòn, kuang atbồ ƀòn, cau geh bơngă pin dờn mờ cau geh đảng tàm tơngai do neh tơnguh niam gơnoar lam lài tàm broă lơh jăt ală gùng dà broă lơh bơh Đảng, adăt boh lam bơh Dà lơgar dê, pơgồp bal tàm broă bơ̆t bơtàu ƀòn ngai sơlơ pas gơs pràn kơl dang. Tàm hơ̆, uă cau neh geh bồ tơngoh kơlôi sơnơng, broă lơh bơceh lơh, ngui khoa học-kỹ thuật tàm broă lơh geh cồng nha ală broă lơh sa, kă bro ai geh uă priă, ai geh ală broă pơrlòng lơh broă sa pràn tàm ƀòn lơgar, tiah làng bol kòn cau; uă cau geh ală cấp ủy, gơnoar atbồ ƀòn lơgar pơn jờng, làng bol pin dờn pồ at gơnoar broă tờm tàm ƀòn, gơs cau tờm lơh broă chính trị tàm ƀòn lơgar.

Cau mblàng Ndong Brawl