VOV4.K’ho - Nàng dong kờl ơruh pơnu neh geh tŭ gơtìp tìs geh rê kis tơrgùm wơl mờ mpồl bơtiàn, Huyện đoàn Mdăk, càr Dăk Lăk neh bơyai lơh uă broă lơh tìp bal, lam sồr, dong kờl ơruh pơnu geh tìp bal mờ ală khà priă ai càn sa priă cồng ờ uă. Kơnờm mờ hơ̆, neh dong kờl uă ùr ơruh, klao pơnu sơrlèt mờ bơta ngòt ƀàs sìl, lơh ngan brồ guh.

Gam sih phơng tờm kroăc pa tam nam dơ̆ 2 in, bi Nguyễn Thanh Tĩnh, 28 sơnam, kis tàm ƀòn 5, xã Cư̆ Prao, kơnhoàl Mdrăk, càr Dăk Lăk yal, lài do, tài sơnam gam dềt jơnau git wă gam ờ uă, gơtìp bơyô ờ niam bơchồt tŭ gam bơsram lơh broă tàm ƀòn dờng Buôn Ma Thuột, bi neh gơtìp tìs kơñao phan mờ gơtìp kŭp jàm 3 nam nggùl.

             Jào tòm jràng sơntìl ală klao pơnu neh rê jàm kis mờ ƀòn lơgar tàm kơnhoàl Mdrăk in

Nam 2019, tơnơ̆ mờ tŭ tơngai jàm neh jơh, bi rê mờ ƀòn lơgar mờ nùs nhơm ngòt ƀàs sìl. Geh cau tàm hìu nhă bal mờ gơnoar atbồ lam sồr, bi rơhời tam gơl nùs nhơm kơlôi sơnơng, lơh ngan lơh wơl tàm rài kis. Bi kơnờm mờ mè bèp càn priă nàng tam 5 sào ù tam tờm plai kroăc xoàn mờ pơnăt thái, tờ tai 3 nơm tơnao ròng ka mờ bă ù ơnàng mờr 1 lồ. Bi kung geh Huyện đoàn Mdrăk dong kờl 2 nơm be nàng ròng, tơnguh tàm rài kis. Bi Nguyễn Thanh Tĩnh yal: “Añ gŏ ròng be tàm do di ngan, geh uă phan sa be in mờ añ lơh wàng dờng. tŭ do Huyện đoàn neh dong kờl 2 nơm den añ kung càn priă nàng blơi tai 3, 4 nơm bê tai nàng ròng, tơnguh bơtàu broă lơh sa, gơtùi geh tai priă ai să tờm in, mờ pà tai ală bơyô ndai in ròng bal, ală ơruh pơnu ndai geh rài kis bè añ lơh bal”.

Kung kờñ ngui 1 lồ ù neh geh lài nàng tam tờm chi sa plai mờ ròng phan, bi Hồ Văn Hoàng, kis tàm ƀòn 20, xã Ea Riêng, kơnhoàl Mdrăk pà git, bi pa rê jàm bơh nam lài. Sơrlèt mờ ală nùs nhơm kơlôi sơnơng ờ niam mờ ƀàs sìl, bi lơh ngan nàng tơnguh bơtàu broă lơh sa, lơh pas di pal. Tŭ do, bi neh tam geh 300 tờm plai gơ-àl bơrlŭ bal mờ tờm sầu riêng bal mờ tờm plai jràng. Bi kung tờ tơnao ơnàng mờr 3 sào nàng ròng ka, tơnguh priă geh tàm rài kis. Broă kal ke tŭ do bơh bi Hoàng dê là ờ tơl priă lơh sa. Git nùs nhơm kơ̆p kờñ bi dê, Huyện đoàn Mdrăk neh dong kờl bi càn 20 tơlăk đong ờ sa priă cồng bơh priă càn ơruh pơnu mŭt lơh broă, bơto pơlam broă tơnguh bơtàu lơh sa di pal nàng ai broă lơh ờ jŏ ròng broă lơh jŏ jòng. Bi Hồ Văn Hoàng yal: “Tơnơ̆ mờ ală bơta tìs gùng añ dê, den añ kung neh rê mờ kis tơrgùm bal mờ mpồl bơtiàn, tơnguh bơtàu broă lơh sa, sơrlèt mờ kal ke, lơh ngan brồ guh, lơh geh cồng nha rài kis să tờm in. Añ rơcang ngui priă bơcri tàm broă tam tờm chi sa plai mờ ròng sur”.

      Jào priă mŭt lơh broă ai tơl bơta niam nàng ơruh pơnu neh rê jàm in kis tơrgùm bal mờ mpồl bơtiàn

Nguyễn Thanh Tĩnh mờ Hồ Văn Hoàng là 2 nă cau tàm khà 4 nă klao pơnu rê jàm geh Huyện đoàn Mdrăk dong kờl tàm nam do. Jăt bi Lê Tuấn Anh, Phó Ƀí thư Huyện đoàn, Củ tịc Hội Mpồl tam klăc ơruh pơnu Việt Nam kơnhoàl Mdrăk yal, bơh nam 2014 tus tŭ do, kơnhoàl Mdrăk neh dong kờl rơlao 50 nă ơruh pơnu rê jàm in kis tơrgùm mờ mpồl bơtiàn, mờ ală broă lơh bè ai càn priă ờ sa priă cồng ha là geh càn priă sa priă cồng ờ uă, dong kờl sơntìl phan tam, phan ròng. Bơyai lơh ală dơ̆ cri bơyai bè broă mờng chài lơh sa, ròng phan nàng ơruh pơnu in geh tìp bal, bơsram bal. Bơh tŭ hơ̆ geh lam sồr ơruh pơnu neh geh tŭ gơtìp tìs sơrlèt mờ bơta ƀàs sìl mờ mpồl bơtiàn nàng brồ guh lơh pas. “Lài ngan là dong kờl ală bơyô nàng ală bơyô ờ ƀàs sìl tai, kis tơrgùm mờ mpồl bơtiàn. Dơ̆ bàr là bơh ală bơyô do nàng lam sồr, bơto bơtê wơl rơnàng kơnòm să in bañ lơh tìs bè ală bơyô do neh gơtìp. Tàm tơngai tus den Mpồl tam klăc ơruh pơnu Việt Nam kơnhoàl pơn jăt tai bơyai lơh ală broă lơh cri bơyai, broă mờ ng chài bal mờ ală bơyô do. Crơng gơs ờ uă mpồl lơh broă nàng tơnguh bơtàu broă lơh sa bơh ală ơruh pơnu dê, pơgồp bal ală ơruh pơnu neh rê jàm tàm broă lơh bal nàng bơyai lơh ală broă lơh niam, ală broă lơh bơh đoàn dê tàm tơngai tus”.

Jăt jơnau đơs bơh Huyện đoàn Mdrăk dê, bơh ală broă dong kờl, uă ơruh pơnu rê jàm tàm kơnhoàl neh lơh ngan sơrlèt, tus bal tàm mpồl lơh broă đoàn, mpồl mờ lơh ngan bơsram tàp, gơs ală cau geh broă lơh sa pơnrơ ngan. Geh ờ uă ơruh pơnu rê jàm tơnơ̆ mờ tơngai bơsram tàp mờ lơh ngan, neh geh mŭt tàm mpồl Đảng, gơs ală cau lam lài bè broă lơh ngan mờ bơta pràn ai uă ơruh pơnu ndai in bơsram bal. Kơnờm mờ hơ̆ neh tơnguh geh cồng nha, lam sồr ai uă ơruh pơnu rê jàm ndai in lơh ngan sơrlèt mờ kal ke, sơbì bơta neh gơtìp tìs nàng lơh niam wơl rài kis.

Cau cih H’ Xíu-Cau mblàng Ndong Brawl