VOV4.K’ho – Mho òr, 04/4, tàm Hà Nội, mpồl đơng lam Đảng kuang àng dà lơgar mờ kuang đơng lam bồ Gah kuang àng dà lơgar bơyai lơh nting sap gờm chờ Đại tướng Trần Đại Quang kuang geh jơng gah gùng dră bal dà lơgar, kuang atbồ mpồl đơng lam Đảng kuang àng dà lơgar, kuang atbồ gah kuang àng dà lơgar geh Gơnoar ala mat dà lơgar kơnă 13 pin dờn pồ lơh kuang atbồ lơgar Việt Nam.

Ala mat mpồl đơng lam Đảng kuang àng dà lơgar mờ kuang đơng lam bồ gah kuang àng dà lơgar, ồng Đặng Văn Hiếu, kuang jat jơng atbồ gah kuang àng dà lơgar đơs tờm, mpồl đơng lam Đảng dà lơgar, kuang đơng lam bồ gah kuang àng dà lơgar bal mờ gùt kuang đơng lam bồ dờng, sĩ quan, hạ sĩ quan, cau lơh broă tàm mpồl kuang àng pin dờn uă ngan là, mờ mờng chài, pràn jak bal mờ bơngă pin dờn he dê, tàm gơnoar broă pa, ồng Trần Đại Quang kuang atbồ lơgar geh lơh ngan, ai jơh bơta pràn he dê lơh jơh niam kơnòl mờ gơnoar broă jat jơnau cih sơnua boh lam mờ kơrnuat boh lam dê; pơnjat tai sền gròi đơng lam bơh bơtàu mpồl kuang àng làng bol…

Ồng Trần Đại Quang ngoh rơngac ngan tềng đap nùs nhơm song dơpă, rềp mềl bơh ală cau lơh broă bal tàm mpồl đơng lam Đảng dà lơgar, kuang đơng lam bồ gah kuang àng dà lơgar mờ gùt mpồl kuang àng làng bol tus mờ ồng; ưn ngài ală rơnàng đơng lam bồ gah kuang àng làng bol neh sền gròi, bơto pơlam, dong kờl ồng tàm gùt tơngai lơh broă, kơnờm bơh hơ\ mờ ồng neh geh bơta dờng pràn bè tu\ do. Tàm gơnoar broă pa, ồng Trần Đại Quang pơrgon geh lơh jơh pràn nàng lơh jơh kơnòl geh Đảng, dà lơgar mờ làng bol pin dờn jàu; mơkung kơp kờ` mpồl kuang àng làng bol geh pơnjat tai dong kờl nàng ồng lơh jơh kơnòl lơh broă.

                                       Cau cih mờ yal tơngit K’ Duẩn.