VOV4.K’ho – Dơ\ sơnrờp càr Gia Lai geh 2 nă kơnòm bơsram kòn cau geh khà jờng dơ\ pơrlòng cih sră dunia lời tus kơnòm dềt 15 sơnam bơh Mpồl tam klac Bưu chính dunia sơnđan lơyah là UPU. Bơta kuơ màng là jơh 2 nă oh ndrờm là tàm ală kơnhòal rbah, kal ke ngan bơh càr dê. Khà jờng bal mờ cồng nha bơh dơ\ bơsram ală oh neh geh bơh bơta lơh ngan mờ ală tam gơl tàm broă bơto bơsram tàm làng bol kòn cau:

Là kòn put tàm hìu nhă geh 9 nă oh mi, bèp den chơt gờ`, mè den neh rlau 60 sơnam, hìu nhă rbah ngan, mơya nam do là nam dơ\ 9, R’com H’ Tuyết, kòn cau Jarai, kơnòm bơsram ơdu\ 9, hìu bơsram kai 2 kòn cau kơnhòal Phú Thiện, càr Gia Lai geh khà jờng kơnòm bơsram jak tơl làm. Tus bal dơ\ pơrlòng cih sră dunia UPU mờ tơngume “ Cih te\ dùl pang sră pơyua đơs bè dunia mờ bơyô kờ` kis tàm hơ\”, R’com H’ Tuyết là dùl tàm 2 nă kơnòm bơsram bơh càr Gia Lai dê geh khà jờng tàm mpồl khà jờng ai cau pơrlòng kòn cau in. Đơs bè jơnau pơr lòng he dê, H’ Tuyết chờ hờp yal: “ Tàm jơnau pơrlòng oh dê, oh kờ` kis tàm dùl dunia ngap lơngai, hờm ram, chờ hờp, bềng bơta kờ` gơboh, tơl nă cau sùm git sền gròi, dong kờl bal mờ gơp. Dùl dunia mờ kơnòm dềt ờ di pal kong mờ bơta hìu nhă gơprah gơpring, tam cah is, dunia niam bơne\ mờ tơl nă kơnòm dềt ndrờm geh dờp bơta kờ` gơboh hìu nhă, mpồl bơtiàn dê, ndrờm dờp geh bơta sền gròi, pơndờm bơh cau bèp, bơta sền gròi, kơlôi rơcang bơh cau mè dê bal mờ bơta sền gròi bơh gùt mpồl bơtìan dê.”

R’com H’ Tuyết pà git, oh geh cồng nha bơsram jak là kơnờm tàm nùs nhơm kờ` gơboh, bơta pơnjờng bơh mè mờ cau pơgru tàm hìu bơsram. Ơm tàm [òn Hrai B, ntum Ia Hiao, kơnhòal Phú Thiện, tiah oh geh deh, uă ngan ală hìu nhă ndrờm rbah, mơya cau lơi kung lơh ngan ai oh kòn tus hìu bơsram nàng geh bơsram sră. Mờ làng bol kòn cau tiah do, bơsram sră ờ mìng kờ` tơn jơh rài kis jơgloh rbah mờ gam kờ` bơsram gơs cau.

Kung ai geh khà jờng tàm dơ\ pơrlòng cih sră dunia UPU mờ R’com H’ Tuyết, Kpă H’ Ni Na, kơnòm bơsram ơdu\ 10, hìu bơsram kai 3 Lê Thánh Tông, [òn drà Ayun Pa bơtuah rlau, tài mè bèp là pơgru, sùm ai geh bơta buơn nàng kòn in bơsram sră. Ờ mìng bơto bơsram, mờ gam lơh suơn mìr, mơya bi ùr Kpă H’ Tem, mè Kpă H’ Ni Na dê ờ sồr kòn pal lơh broă dong kờl mè bèp, mờ mìng lời tu\ tơngai nàng kòn bơsram sră. Bơta kơp kờ` dờng ngan rlau jơh bi ùr dê là sền gròi ai oh kòn bơsram tus gùng tus dà. Bi ùr Kpă H’ Tem đơs: “ Jat a` den ai oh kòn he in bơsram tus gùng tus dà, den lài ngan pal git akhar cih, geh tus ơdu\ bơsram chờ hờp mờ gơp bơyô, tơnơ\ hơ\ den bơsram bơta git wă, tơnơ\ do den bơsram broă lơh. Kòn a` dê den ngan là ờ bơsram bơdìh mờ tơngai bơsram tàm ơdu\ bơh ơdu\ 1 tus ơdu\ 9. Mè bèp glar bòl kong jơh ală bơta nàng sền gròi kòn in lòt bơsram.”

Ală kơnhòal Phú Thiện, Ia Pa, Krông Pa bal mờ [òn drà Ayun Pa tàm tiah đah jum mattơngai lik càr Gia Lai là tiah geh gal làng bol kòn cau ơm kis. Bulah rài kis gam uă kal ke, mơya, do là tiah bơto geh uă cau chài bơh uă rơnàng kuang bàng kòn cau tàm càr Gia Lai, bơhìan bơsram jak geh bơtàu tơnguh pràn ngan. Tus tu\ do, jơh ală kơnhòal tiah đah jum mattơngai lik càr Gia Lai ndrờm geh hìu bơsram kai 2 kòn cau ai kơnòm bơsram kòn cau in. Hìu bơsram sùm sền dờng màng broă lam sồr kơnòm bơsram iang nùs bơsram sră. Klau pơgru Nay Rel, atbồ hìu bơsram kai 2 kòn cau kơnhòal Phú Thiện đơs: “ Gơwèt mờ làng bol kòn cau Jarai, kòn cau Bơnhàr neh mờng mờ bơhìan ơm tàm hìu nhă, hìu bơsram rềp hìu nhă, tu\ tus bơsram tàm hìu bơsram do den 1 nhai kơnòm bơsram geh rê còp hìu nhă 1 dơ\. Bơh hơ\, kơnòm bơsram sùm kah hìu. Hìu bơsram kung lơh broă mờ mè bèp kơnòm bơsram, lơh bè lơi nàng lam sồr oh kòn iang nùs bơsram sră tàm do.”

Kơnờm lơh bal mblàng yal, lam sồr bơh gơnoar atbồ ală tiah dê, den tàng khà kơnòm bơsram ơm bơsam ndrờm gờmu pah nam. Ồng Nay Krem, kuang atbồ cơldu\ lơh broă gah kòn cau, Anih duh broă làng bol kơnhòal Phú Thiện đơs: “ Tàm tơngai pa do, Anih duh broă làng bol kơnhòal neh mblàng yal làng bol in, ngan là làng bol kòn cau, jat di sơnam, di jơnau sồr, làng bol pal jun kòn tus hìu bơsram. Làng bol neh git broă lơh hơ\. Kòn cau Jarai sền bal là kờ` ngan bơsram. Pah nam, cồng nha pơrlòng mut tàm ală hìu bơsram, ală kai bơsram, pơr lòng mut hìu bơsram dờng cao đẳng ndrờm jơnhua ngan”

Khà jờng tàm dơ\ pơrlòng cih sră dunia UPU ờ mìng là cồng nha bơh broă lơh ngan 2 nă kơnòm bơsram kòn cau Jarai dê, mờ gam là cồng nha bơh broă lơh bơto bơsram tàm tiah mờ gơnoar atbồ, gah bơto bơsram mờ làng bol ală kòn cau neh tam klac, dong kờl bal bơt bơtàu rài kis hờm ram, niam bơne\.

                                                                                                Cau mblàng K’ Duẩn.