VOV4.K’ho– Lơh jat nền nòn ală broă lơh rơcang sơndră kòp bơ tờp; gơ jat bal mờ broă chồl pràn tam gơl hành chính, chồl mhar broă tam gơl số, tam gơl ngui măi mok tàm broă lơh sa mờ tam gơl ală mờng quèng tàm rài kis gơ in dipal là ală bơta mờ mpồl lơh broă chính trị, mpồl lơh sa kă bro mờ làng bol tàm càr Gia Lai gam lơh jat nàng gàr broă lơh jat jơnau kờñ dơ̆ lĕ bal, sơndră kòp Covid-19 mơya kung gam lam lơh niam ală broă lơh lơh sa- mpồl bơtiàn tàm càr.

Ala tài pal lòt 120 kơi sồ jơh bal lòt mờ rê bơh hìu tus ƀòn dờng Pleiku nàng lơh sră tam gơl sră măi rơndeh B2 mờr jơh tơngai ai ngui, bi Lê Bích Thảo ơm tàm xã Đăk Jơ Ta, kơnhoàl Mang Yang mìng pơyua rùp scan bơh sră măi rơndeh yau dê, sră kimta mờ sră kham pràn kơldang să jan bơh zalo jat anih “Dờp hành chính dà lơgar khà 3 sră măi rơndeh Gia Lai”. Tơ nơ̆ tŭ lơh gơs sră nggal tàm internet, bi Bích Thảo geh cau lơh broă hơ pơrgon tus mpồl lơh broă hành chính dà lơgar mìng 1 dơ̆ lơm nàng rùp rùp muh mat. Tàm pơgap 3 ngai, sră măi rơndeh lơh pa wơl bơh bi dê neh geh pơyua rê tus tàm hìu tàm xã Đăk Jơ Ta, kơnhoàl Mang Yang. Bi Thảo niam nùs ngan tài bơta ƀuơn do, ờ mìng dong bi ờ huan pal lòt rê uă dơ̆ mờ gam tơrmù lơyah ngan rlau jơh bơta ơm rềp mờ cau ndai tàm tơngai kòp Covid-19 gam gơlik geh kal ke: “Bơta do ƀuơn ngan. Ala mờ pal lòt rê bòl glar den he mìng lòt nàng cùp rùp muh mat hơ̆ sồng khi pơyua he in wơl, ờ duh pal lòt ai, mìng lòt 1 dơ̆ lơm”.

Tiah tờm broă drơng ala hành chính dà lơgar càr Gia Lai nền nòn lơh jat ală broă lơh rơcang sơndră kòp Covid-19

Mò Hà Thị Hồng Yến, Kuang atbồ Mpồl lơh broă dùl mpồng ƀòn dờng Pleiku pà git, tŭ do, mpồl gam lam lơh rlau 300 broă drơng ala dà lơgar pờ tơlik tơn tàm internet. Bơta do ờ mìng chồl pràn tam gơl hành chính, mờ gam gàr niam broă rơcang sơndră kòp bơ tờp tài tơrmù ƀà khà cau tus lơh sră nggal: “Tơngai gam gơlik geh kòp Covid-19, nàng tơrmù ƀà bơta làng bol tơrgùm gal, mpồl lơh broă dùl mpồng bơh Bưu điện càr dê lam lơh broă dờp sră nggal mờ tong wơl cồng nha tàm hìu ai làng bol in. Cau lơh broă nggui yah ngài, tàr krơh sơndră dà mprañ, gàr niam broă bơsong sră nggal hành chính làng bol, mpồl lơh broă, mpồl lơh sa kă bro in. Mùl màl, cồng nha cèng wơl neh dong tơrmù 20% khà cau tus lơh sră pơ àr tơn, geh làng bol, mpồl lơh broă, mpồl lơh sa kă bro niam nùs ngan”.

Bal mờ ală anih lơh broă hành chính dà lơgar, tŭ do, ală mpồl lơh sa kă bro tàm Gia Lai neh rơcang lài bơt bơtàu rơndap broă rơcang sơndră kòp bơ tờp tàm tŭ tơngai pa. Ồng Thái Như Hiệp, Chủ tịch Mpồl duh broă geh jơng, Kuang atbồ Kong ti TNHH Vĩnh Hiệp, mpồl lơh sa kă bro tac hờ lơgar ndai kơphe tàm Gia Lai pà git, mpồl lơh sa kă bro neh rơcang lài 2 broă digơlan gơlik geh tàm bơta bè ờs pa mờ tàm tơngai kòp bơ tờp gơlik geh kal ke. Jat hơ̆, 3 hìu măi bơh mpồl lơh sa kă bro dê geh tam gơl gơs lơh broă is dùl bă jơnhua ngan rlau jơh; bơt bơtàu rơndap broă lơh sa jat tơl khà BRC (hơ̆ là tơl khà gùt plai ù bè ờ do ờ dă phan sa bơh Mpồl tac phan rah rài lơgar Anh dê) nàng sơndră bơ tờp vi khuẩn. Bal mờ hơ̆, mpồl lơh sa kă bro neh tam cah gơs 2 mpồl hành chính nàng gàr broă lơh dilah kòp bơ tờp gơbàn ờ niam. Kơ nờm bơh hơ̆ mờ tàm quý 1 nam 2021, bulah kòp Covid- 19 gơlik geh kal ke tàm càr, mơya kong ti Vĩnh Hiệp kung gam tac hờ lơgar ndai rlau 44 rbô tấn phan tus ală drà kă bro, gơguh 32 rbô tấn pơn drờm bal mờ dùl tŭ nam 2020: “Jơh 3 hìu măi ndrờm lơh broă is, ală gùng lòt, gùng lik is. Cơldŭ lơh broă, mpồl lơh broă kong ti dê ndrờm tam cah gơs 2 mpồl nàng tŭ geh bơta ờ niam gơlik geh bơh kòp bơ tờp dê den lơh broă tàm yah gơp 14 ngai. Jơnau rơcang lài do neh geh lơh nền bơh lài”.

Hìu măi bơh Kong ti Vĩnh Hiệp dê lơh sa jat tơl khà BRC mờ uă ngan là lơh broă is

Bơh nhai 2 nam 2021 tus tŭ do, càr Gia Lai geh 27 nă cau bơ tờp kòp Covid-19 tàm ƀòn dờng Pleiku mờ 4 tiah tàm tiah đah jum mat tơngai lik là ală kơnhoàl Ia Pa, Krông Pa, Phú Thiện mờ thị xã Ayun Pa. Do ndrờm là tiah mờng tam tàu, bùm blàng, rơpung kài, kơphe uă ngan bơh càr dê. Tàm tơngai lơh jat broă ơm yah ngài mpồl bơtiàn nàng rơcang sơndră kòp bơ tờp, Ủy ban Nhân dân càr Gia Lai neh bơyai lơh uă dơ̆ pơrjum sồr ală gah broă lơh, ală tiah lơh jat ală broă lơh gàr niam broă lơh sa, tac phan lơh gơs bơh suơn sre tàm tiah geh kòp. Jat hơ̆, gah lơh sa suơn sre, gah công thương, ală hìu maĭ lơh gơlik ƀòk bùm blàng, hìu măi lơh sơdàng tàm Gia Lai geh broă rơndap lơh blơi, lơh gơs phan, prap gàr; gah gùng lòt gàr niam ai cau mờ rơndeh rơndồ in pơndiang phan bơh suơn sre lik mờ mut tàm tiah geh kòp. Ồng Hoàng Trọng Cán, cau tam rơpung kài tàm xã Chư Gu, kơnhoàl Krông Pa chờ hờp pà git: “Kàl tam rơpung kàl do, tơl lồ tơnhàu geh bơh 40 tus 42 tấn. Khà priă tac bơh 14 rbô đong tàm 1 kĭ den tàng làng bol kung chờ hờp ngan nàng rơcang tam kàl pơn jat tai”.

Tus tŭ do, kòp Covid-19 tàm Gia Lai neh gơtùi sền gròi. Mờr 1 nhai do, càr ờ geh cau bơ tờp kòp pa. Uă cau kòp Covid-19 neh geh sơm bời. Bal mờ hơ̆, gah lơh sơ nơm càr neh xét nghiệm mờr 53 rbô nă cau in, broă lơh cit sơ nơm vaccine ai mpồl lam lài sơndră kòp in geh lam lơh. Kờñ dong làng bol mờ mpồl lơh sa kă bro ờ sền ờ sơp, ală tiah tàm Gia Lai gam mblàng yal ndang mờ lơh glài kràñ ndang ală cau lơh tìs. Ồng Nguyễn Hưũ Quế, Chủ tịch Ủy ban Nhân dân ƀòn dờng Pleiku pà git: “Ƀòn dờng neh lơh glài 224 nă cau ờ pơn chèu glòm muh mat tŭ lik hờ bơdìh lòt tàm gùng, lơh glài 3 mpồl lơh sa kă bro lơh tìs jơnau hơ pơrgon rơcang sơndră kòp. Bơh hơ̆, ƀòn dờng neh dong tơnguh jơnau git wă bơh làng bol, mpồl lơh sa kă bro dê tàm bơta bè ờs pa, gàr tiah ơm kis ờ do ờ dă tàm tơngai kòp bơ tờp”.

Cau lơh broă sa tiah geh kòp Covid-19 geh gàr niam broă pơndiang phan bơh suơn sre

Tàm pơrjum pờ tơlik tơn tàm internet pa do, ồng Võ Ngọc Thành, Chủ tịch Ủy ban Nhân dân càr Gia Lai pơn jat tai sồr ală gah broă lơh, ală tiah lơh jat nền nòn jơnau đơng lam bơh Thủ tướng dê bè broă lơh jat jơnau kờñ dơ̆ lĕ bal là bañ sền ờ sơp kòp bơ tờp, mơkung gàr ală broă lơh sa- mpồl bơtiàn tàm càr geh lơh niam ờ do ờ dă: “Sơndră kòp mờ bơtaù tơnguh lơh sa- mpồl bơtiàn, bol he bañ sền ờ sơp bơta lơi. Den tàng, añ sồr ală gah broă lơh, ală tiah lam lơh ală rơndap broă, jơnau rơcang lài lam lơh ală broă lơh sa kă bro, ờ lời gơtìp aniai tus ală mpồl tac phan bơna, kòi phe, phan sa, phan ngui kuơmàng làng bol in. Bol he bơt bơtàu ai jơh bal tiah geh kòp mờ tiah ờ geh kòp in, dong ală broă lơh do geh lơh sùm mờ ờ do ờ dă”.

Mờ uă broă lơh ngac ngar, rơcang lài, mpồl lơh broă chính trị, làng bol, mpồl lơh sa kă bro tàm Gia Lai neh gơ rờm bal niam nàng ờ mìng gàr broă rơcang sơndră kòp mờ gam bơtàu tơnguh lơh sa- mpồl bơtiàn.

Cau mblàng K’Duẩn