VOV4.K’ho - Bal mờ gùt lơgar, Mpồl sền gàr niam ờ do ờ dă tàm gùng lòt càr Gia Lai bơyai lơh lam sồr uă, yal, bơto bơtê adăt boh lam mờ sền gròi, bơsong cau tìs gơwèt mờ bơta niam ờ do ờ dă tàm gùng lòt ơruh pơnu, kơnòm pa tào kòn cau nàng tơmù bơta rềs àr tàm gùng lòt tiah làng bol kòn cau càr dê. Nguyễn Thảo, cau ai tơngĭt jơnau đơs Việt Nam yal bè bơta mùl màl.

Jăt mpồl sền gàr niam ờ do ờ dă tàm gùng lòt càr Gia Lai yal, mìng tàm 2 nhai bồ nam do, tàm càr gơtìp 56 dơ̆ rềs àr tàm gùng lòt lơh 46 nă cau gơtìp chơ̆t mờ gĭt nđờ jơ̆t nă cau ndai gơtìp sồt să. Uă rơlao nggùl dơ̆ rềs àr gơrềng tus mờ ơruh pơnu, kơnòm pa tào kòn cau. Tàm hơ̆, mìng is tàm xã Ia Hrú neh geh 5 nă cau gơtìp chơ̆t.

Ồng Huỳnh Thái Nghiêm, Chủ tịch UBND xã Ia Hrú, kơnhoàl Chư Pưh pà gĭt, jơh 5 nă cau do ndrờm ờ ndao sơgơn gàr bồ, 2 nă cau ờ hềt geh sră măi rơndeh Honda. Bal mờ ală tơngu me tòm do, ồng Nghiêm đơs là, geh dùl bơnah tìs geh bơh nùs nhơm lơh jăt jơnau kờñ bơh oh kòn làng bol kis tàm xã do dê: “Hìu nhă lơh jăt jơnau kờñ oh kòn tàm broă blơi rơndeh. Bŭ lah ờ geh priă, mơya hiù nhă kung kờñ blơi rơndeh kòn in sơl. Broă măi rơndeh lòt tàm gùng mờ ờ hềt gĭt wă tơl, den tàng lơh gơbàn rềs àr bè hơ̆. cau pròc mhàm tàm hìu kung nrơ̆t dơl, ờ gĭt oh kòn tŭ neh dờng sơnam, lòt tàm gùng mờ gơtìp chơ̆t jê, ni sơna ngan. Làng bol moăt ngan”.

Mlàng bè ală dơ̆ gơtìp rềs àr tàm gùng lòt tiah làng bol kòn cau, Mpồl sền gàr niam ờ do ờ dă tàm gùng lòt càr Gia Lai pà gĭt, geh uă cau gơtìp là ơruh pơnu, kơnòm pa tào, cau lơh broă tòm bơh ală hìu nhă dê. Bơta tìs lơh gơtìp rềs àr là ală broă măi rơndeh lòt tàm gùng tŭ sơnam ờ hềt tơl dờng nàng măi rơndeh, măi rơndeh geh bơta pràn dờng mờ ñô ơlăk, bièr, lòt jờl ir mờ khà geh ai, ờ ndao sơgơn gàr bồ, lòt wĕt rơwe tàm gùng... ờ hềt gŏ mờ kơrian di tŭ.

Ồng Nguyễn Văn Hạnh, Phó kuang atbồ Sở Giao thông Vận tải, Phó kuang atbồ mpồl sền gàr bơta niam ờ do ờ dă tàm gùng lòt càr Gia Lai pà gĭt dơ̆ lam sồr uă, yal, bơto bơtê adăt boh lam mờ sền gròi bơsong cau tìs gơwèt mờ bơta niam ờ do ờ dă tàm gùng lòt tàm ơruh pơnu, kơnòm pa tào làng bol kòn cau geh tơngu me tơnguh uă broă lơh geh cồng nha adăt boh lam, gàr niam ờ do ờ dă gùng lòt tàm ƀòn lơgar, tiah làng bol kòn cau, tàm hơ̆ uă ngan là ală tiah geh gơl gùng dờng lòt gan.

Tàm hơ̆, càr sền kuơ tus mờ ală broă pơgồp bal bơh broă lam sồr mờ bơsong cau tìs mờ adăt boh lam bè bơta niam ờ do ờ dă tàm gùng lòt: “Lài ngan, pơgồp bal broă lam sồr tàm uă tiah mờ broă lam sồr is ai ală klao pơnu mờng ñô ơlăk, geh nùs nhơm lơh ờ niam tŭ măi rơndeh lòt tàm gùng. Dơ̆ bàr là broă lòt sền gròi, ờ mìng tàm ală gùng dờng mờ gam lòt sền gròi tàm ală gùng ƀòn, tàm hơ̆ uă ngan là ală gùng tơrbŏ bal ƀòn ơm kis mờ gùng dờng nàng kơrian bơh sơnrờp ală bơta gơbàn di lah gơtìp rềs àr tàm gùng lòt”.

Tus bal mờ dơ̆ lam sồr, bi Siu Hiên, kis tàm ƀòn Rú Rưng, xã Ia Hrú pà gĭt: “Să tờm añ tơnơ̆ do tŭ đì rơndeh lòt tàm gùng pal geh lơh jăt niam gùng dà broă lơh bơh Đảng, adăt boh lam bơh Dà lơgar dê. Lài mờ tŭ đì rơndeh lòt tàm gùng là pal ndao sơgơn gàr bồ, ờ ñô ơlăk, bièr, ờ lòt jờl, ờ cuh bô rơndeh”.

Dơ̆ lĭk lơh broă uă nàng lam sồr, yal bè adăt boh lam mờ lòt sền gròi lơh glài cau lơi tìs mờ bơta niam, ờ do ờ dă tàm gùng lòt bơh ơruh pơnu, kơnòm pa tào làng bol kòn cau càr Gia Lai dê geh bơyai lơh tàm 3 nhai, bơh tŭ do tus nhai 6.

Cau cih Nguyễn Thảo-Cau mblàng Ndong Brawl