VOV4.K’ho- Ngai 16/3, Ủy ban Mặt trận dà lơgar Việt Nam càr Gia Lai bơyai lơh Pơrjum cribơyai dơ̆ bàr nàng cribơyai bè cih măt bơh sơnrờp ală cau tơlik măt tĕ khà kuang bàng Quốc hội khoă XV, kuang bàng Hội đồng Nhân dân ală kấp, tơngai lơh broă bơh nam 2021- 2026. Tàm dơ̆ pơrjum, Ủy ban Mặt trận dà lơgar Việt Nam càr Gia Lai neh yal mờ ring bal mat, sră nggal cih yal dùl êt bè rài kis broă lơh bơh 13 nă cau gơwèt ală anih lơh broă, mpồl cau, ală tiah bơh càr Gia Lai dê tơlik măt tĕ khà Kuang bàng Quốc hội khoă XV.

Tơnơ̆ tŭ cribơyai bè tơl khà, rơndăp tăp sèng, bơnah, khà cau, 100% kuang bàng ring bal cih măt bơh sơnrờp 13 nă cau tơlik măt tĕ khà kuang bàng Quốc hội khoă XV. Pơrjum cribơyai dơ̆ bàr kung neh cih măt bơh sơnrờp ală cau tơlik măt tĕ khà kuang bàng Hội đồng Nhân dân càr Gia Lai khoă XII, tơngai lơh broă bơh nam 2021- 2026, geh 140 nă.

Cau mblàng Lơ Mu K’Yến