VOV4.K’ho - Tơnơ̆ mờ kòp Covid-19, càr Gia Lai neh geh rơndăp broă lam sồr nhơl chờ mờ ală dơ̆ lơh chờ, broă lơh chài rơgơi-tàp pràn să jan bơh tŭ do tus lồi nam. Bal mờ hơ̆, ală mpồl lơh sa kă bro gah nhơl chờ tàm càr do kung geh uă broă lơh nàng hòi jà cau năc tàm lơgar, pơn jăt tai lơh geh cồng nha ală phan nhơl chờ tàm càr.

Do là dơ̆ bàr bi Nguyễn Đình Đại (Deh nam 1990, tàm sơnah ƀòn Đống Đa, ƀòn dờng Pleiku) bal mờ mpồl cau bơyô 5 nă tus nhơl sền broă lơh chờ tàm Ñrùh K50, geh bal tàm tiah tờm tiah prăp gàr chi che geh is Kon Chư Răng, kơnhoàl Kbang, ngài mờ ƀòn dờng Pleiku di pơgăp 90 kơi sồ. Tàm dơ̆ lòt 2 ngai, 1 mang lồi poh tàm do, mpồl cau bơyô neh lơh sàl ơm tàm ală plai lŭ dờng, buh phan sa tềng jơng ñrùh.

                                    Tus tàm ñrùh K50, cau năc gam geh sền chi che gam bè ờs

Ờ geh sóng điện thoại, ờ geh wifi, mpồl cau bơyô do kis tàm bơta niam bơnĕ bơh ñrùh ñhoa 54 thơ̆k mờ dà crùh pràn gơs mhoal kò, tus sền trồm rơgồng Rơbèt ngềt ngơ̆t, um tàm croh dà sàng mrềt mờ sền dồ lòt jăt mpồl, ală sềm Rơbèt par gùt dar ñrùh. Tus bal mờ ù tiah brê bơnơm, huĭ jơh ală glar bòl tàm rài kis, dong kờl bi Đại gơlơh pơrài bồ tơngoh tơnơ̆ mờ rơlao dùl poh lơh broă kal ke: “Bè dơ̆ lòt lài den añ lòt tus tàm do gơtìp kal ke ngan, tài brê bơnơm gam klăp klê ngan, geh uă cau ờ gĭt tus mờ ñrùh do. Mơya tŭ do den gùng lòt tus tàm ñrùh kung ƀuơn, cau năc kung ƀuơn tus. Đơs bè ñrùh K50 den dờng, ñhoa mờ niam ngan, añ ờ hềt gŏ ñrùh lơi niam bè do. Tiah prăp gàr chi che geh is geh ai kuang bàng lam bol añ lòt tus mờ bơto sồr tàm broă lơh lơi niam ờ do ờ dă, sào sa, ơm lơh bè lơi kloh niam, ờ sơbì siồ siă lềng làng nàng sền gàr tiah kis”.

Jăt ồng Phạm Hoàng Trực, Kuang atbồ Công ty Gotour Travel (ƀòn dờng Hồ Chí Minh) yal, nhơl chờ tus sền mờ lơh broă jăt mpồl dềt, gam là broă lơh geh uă ngan tơnơ̆ mờ kòp Covid-19. Den tàng, Công ty kung sùm pờ ală dơ̆ nhơl chờ nàng cau năc bơh Sài Gòn tus càr Gia Lai nàng tus sền ù tiah niam gam bè ờs tàm brê Dà lơgar sền gàr Kon Ka King (kơnhoàl Mang Yang): “Tàm Tây Nguyên do, tus tàm brê dà lơgar Kon Ka King, he gơtùi ntào tềng gah mpồl il sơrmañ bè ơm tàm brê ngan mờ brê gam bè ờs nàng cau năc in kŭp rùp. He gơtùi lam ală mpồl cau mŭt lơh broă, cau bơsram dờng tus sền kơl wàng trồ...”.

          Dòr ñhơ̆t phồng tàm kờnhoal Đăk Đoa mìng ngài mờ ƀòn dờng Pleiku 20 kơi sồ, ù tiah niam bơnĕ ngan

Nàng di pal tơnơ̆ mờ kòp Covid-19, Công ty yal tơngĭt nhơl chờ Le Pleiku (tềng gùng Phan Đình Phùng) neh pờ uă dơ̆ pa bè tus sền nhơl ƀòn dờng kơh bơnơm, jòi tiah kŭp rùp ƀòn dờng tiah bơnơm (photo trip), dơ̆ nhơl chờ hờ bơdìh ù tiah-lơh sàl-was plung mìng tàm 1 ngai, mờ khà priă hờ đơm 800 rơbô đong tàm 1 nă.

Bi Hoàng Phương, Kuang atbồ công ty pà gĭt, khà priă ờ kas, tơngai ờ jŏ, mơya công ty kung gam lơh dơ̆ nhơl chờ nàng cau năc in lòt geh uă tiah ndang, mờ geh sền mờ lơh ală bơta chài rơgơi bơh yau tàm do. Bơdìh hơ̆ tai, công ty gam tơrgùm tàm ală dơ̆ nhơl chờ ndai geh bơta nhơl sền ù tiah geh is: “Tŭ do, đah bol añ lơh 2 gah. Dùl là dơ̆ nhơl chờ chài rơgơi tàm ƀòn làng bol kòn cau kis bơh yau tàm do. Dơ̆ bàr là ală dơ̆ tracking. Dơ̆ 3 là hào bơnơm Chư Nâm 2 ngai 1 mang, 3 ngai 2 mang tus hờ ñrùh trồm rơgồng Rơbèt K50 ai ală cau lơi gơboh kờñ ờ ù tiah geh is tàm brê bơnơm, sa tàm brê, bĭc tàm brê; dơ̆ 3 là brê nho Hà Tam, brê chi dờng”.

                  Tus tàm Gia Lai, cau năc gam sền bơta niam chài rơgơi kòn cau Bơnhàr, Jarai tàm do dê

Ồng Nguyễn Trọng Hải, Kuang atbồ Công ty cổ phần Cao Nguyên Việt (Gia Lai) pà gĭt, bơh bồ nam 2020, kòp Covid-19 gơbàn, mpồl lơh sa kă bro ờ geh năc lơgar bơdìh mờ tàm lơgar lĭk lơgar bơdìh. Den tàng, mpồl lơh sa kă bro sền kuơ rơlao tàm broă tơnguh bơtàu gah nhơl chờ tàm lơgar, bơta tờm nhơl chờ tus sền mờ lơh broă mờ tam gơl broă pơgồp bal mờ ală hìu ơm: “Broă nhơl chờ tŭ do là cau kờñ tềm pềr mơya đềt mềr mờ ù tiah geh is uă rơlao. Ală dơ̆ nhơl chờ ờ jŏ ngai mờ geh uă broă rơwah krơi is. Ờ geh ai lài bè lài do, geh uă khà ai cau năc rơwah, geh tŭ ờ geh bal broă sào sa, ha là geh 2, 3 ngai tàm dơ̆ nhơl chờ nàng cau năc in khăt gơboh jòi sền... broă pơgồp bal bơh công ty nhơl chờ mờ ală hìu ơm kung geh broă tam gơl. He ai năc tus ală hìu homestay tàm ală tiah ƀòn ha là ală farm house”.

Lòt bal mờ ală mpồl lơh sa kă bro, bồ nhai 3 nam 2021, Sở Văn hoá, Thể thao mờ Du lịch càr Gia Lai neh geh rơndăp broă lơh jăt ală broă lơh chài rơgơi, tàp pràn să jan mờ nhơl chờ bơh tŭ do tus lồi nam 2021. Jăt mờ hơ̆, càr geh pơn jăt tai bơyai lơh ală broă lơh chờ, drà ràng tơlĭk geh uă bơta phan bơh ală tiah bè: Drà ràng tơlĭk phan geh lơh bơh broă lơh sa suơn sre kloh niam pơgồp bal mờ bơta chài rơgơi phan sa (Thị xã Ayun Pa), Ngai chờ nhơl chờ (kơnhoàl Kbang), Pơrlòng cing mồng ơruh pơnu-kơnòm pa tào, poh chài rơgơi-Nhơl chờ mờ ală broă lơh Festival cing mồng Tây Nguyên (ƀòn dờng Pleiku), Poh bơkào muồng rơmĭt (kơnhoàl Chư Prông),...

Ồng Nguyễn Đức Hoàng, Phó kuang atbồ Sở Văn hoá-Thể thao mờ Du lịch càr Gia Lai pà gĭt: “Pơn jăt tai lơh jăt ală broă lơh lam sồr nhơl chờ tàm ală tiah dờng bè Hà Nội, ƀòn dờng Hồ Chí Minh; chờl pràn broă pơgồp bal mờ ală càr Bình Định, Phú Yên, ƀòn dờng Đà Nẵng, càr Quảng Nam, Kon Tum, Dak Lak; pơn jăt tai ai geh bơta niam nàng mpồl lơh sa kă bro tus bal lam sồr nhơl chờ, yal, tus bal ală mpồl farmtrip”.

Gơdờp mờ bơta pa, ală mpồl lơh sa kă bro tàm gah nhơl chờ tàm càr Gia Lai gam rơhời tam gơl, bal mờ hơ̆, càr kung rơcang ală broă lơh chài rơgơi geh is nàng yal rùp rài, kòn bơnus càr Gai Lai tus mờ cau nhơl chờ.

Cau cih Nguyễn Thảo-Cau mblàng Ndong Brawl