VOV4.K’ho – Broă lơh bồr tơnring mờ bơt bơtàu tìs mờ kơrnuat boh lam lơgar Lo dê tàm dà lềng đah mattơngai lik gam lơh git gơp đah Lo mờ Mỹ gơlik geh kal ke. Pa do, kuang bàng lơgar Mỹ sùm dră wơl broă lơh bơt bơtàu tìs mờ kơrnuat boh lam bơh Lo dê, đah Mỹ gam ai rơndeh par lòt gan kơl wàng trồ dunia, rềp tiah dà lềng mờ Lo mut lơh ală broă lơh bồr tơnring. Sơlơu\ wơl, đah Lo kung geh jơnau đơs lah lơgar Mỹ pràn ngan.

Lài mờ hơ\, ngai 21/5, ồng Daniel Russel kuang dong broă kuang atbồ gah cribơyai broă mờ lơgar ndai lơgar Mỹ đơs tờm, ală broă lơh bơt bơtàu dờng ngan bơh Lo dê tàm dà lềng đah mattơngai lik tàm tơngai do lơh gơbàn kal ke tàm tiah do mờ digơlan lơh gơbàn tam lơh. Pơnjat hơ\, ngai 22/5, ồng Joe Biden kuang jat jơng atbồ lơgar Mỹ kung đơs lah Lo gam lòng kơrnuat boh lam dunia tu\ mut lơh broă lơh bồr, lơh wơl dờng ngan tàm dà lềng đah mattơngai lik. Ồng Joe Biden gam pà git, geh ai uă sĩ quan ling dà lềng tus tiah châu Á – Thái Bình Dương nàng tơmù dimơ ală bơta lòng, mơkung đơs tờm, Mỹ geh ai 60% mpồl ling dà lềng lơh broă tàm tiah châu Á – Thái Bình Dương lài mờ nam 2020 nàng tam dră mờ ală bơta lòng gam gơlik geh.

                                                                                                                               Cau mblàng K’ Duẩn