VOV4.K’ho – Pơn jat tai pơrjum dơ\ 2, Gơnoar ala mat dà lơgar kơnă XIV, mho òr 28/10, Gơnoar ala mat dà lơgar cribơyai tàm hìu pơrjum bè ală jơnau yal broă lơh bơh Kuang atbồ Anih cah r`a dờng ngan rlau jơh dà lơgar, Kuang atbồ Anih sền gròi ai ngui kơrnoat boh lam dờng ngan rlau jơh dà lơgar; broă lơh rơcang sơndră lài, tam dră cau lơh tìs mờ lơh tìs kơrnoat boh lam; broă lơh jat kơrnoat bơh anih cah r`a dê; broă lơh rơcang sơndră sa kuề sa kùa. Ală kuang bàng đơs ală jơnau yal bơh Gơnoar atbồ lơgar dê neh đơs loh ală cồng nha lơh geh, mơkung song dơ pă sền wơl ală jơnau gam gơkòl mờ geh ală broă lơh bơsong. Uă kuang bàng đơs: Bơta cau lơh tìs nam 2016 neh geh kơryan mờ lơh tơrmù pơndrờm mờ nam 2015, tơnggo\ bơta lơh ngan jơh nùs bal bơh ală kơnă, ală gah mờ bơh jơh ală anih lơh broă gùng dră bal dê. Mơya, bơta ai go\ ală lơh tìs gơlik geh tàm jơh ală broă, uă ngan là rơndăp tăp sèng gùng lòt, tiah ơm kis, bơ\t bơtàu, ù tiah…Ală kuang bàng sồr, kờn pal sền nền ală jơnau bơh tài gơbàn, sền sơ wì kơnòl bơh ală anih lơh broă geh gơrềng, tơnguh jơnhoa cồng nha, bơta rơcang lài bơh ală anih lơh broă lùp khàu, pleh lời klàs cau lơh tìs.

Cau cih mờ yal tơngi\t- Lơ Mu K’ Yến