VOV4.K’ho– Ngai 12/3 pa do, làng bol ală thôn 9, 10 mờ 11 xã Cư San, kơnhoàl M’Drak, càr Dak Lak, là tiah lam lơh rơndap broă lơh bơtơt rbòng dà 4 rbô 400 tơmàn đong Krông Pách Thượng sơn đờm rê hờ tiah ơm kis pa. Do là bơta mờ jơh gùt làng bol tiah tơnau dơng dà, gơnoar atbồ ală kấp càr Dak Lak ndrờm kơp gơn tàm sùm 12 nam do. Sơrlèt gan ală bơta ờ niam, bal mờ ală bơta kòl yan, rơndap broă bơh sơnrờp neh gơtùi tă bơsong bơta kal ke ngan rlau jơh là ai ù. Do là broă kuơmàng nàng broă lơh bơtơt rbòng dà geh priă tă lơh git nđờ rbô tơmàn đông in gờñ lơh gơs, pơgồp bơnah bơsong bơta kal ke bè dà, dong tơl dà ƀồm ai ală ƀòn pas sơm in, kung là bơta kuơmàng ngan rlau jơh bơh dùl tàm ală broă lơh bơtơt rbòng dà dờng ngan drơng broă lơh sa suơn sre in geh Chính phủ, Quốc hội ring bal lam lơh tàm Tây Nguyên.

Pa rơp àng drim gờñ, jơh hìu bơnhă 6 nă cau bơh ồng Liều Văn Sùng ơm tàm thôn 9, xã Cư San, kơnhoàl M’Drak neh guh jơh, sơn đờm tơrgùm jơh phan bơna nàng rơcang ntrờn tus tiah ơm kis pa ngài mờ hơ̆ 30 kơi sồ, gơ wèt xã Cư Elang, kơnhoàl Ea Kar. Tơnơ̆ rlau 20 nam ơm kis tàm do, ồng Sùng neh bơnah lơi poh pơlai tiah do, mơya kung gam chờ hờp ntrờn lòt tiah ndai. Tài ƀòn ơm kis pa neh geh dà lơgar rơndap tap sèng niam ngan, geh 1 sàu ù ơm mờ 1 lồ ù lơh sa, gơ ơm rềp tơnau bơtơt dơng dà, rbòng dà lam dà tus tàm ƀòn ơm kis, tàm tiah lơh sa suơn, dà li la ngan. Tiah ơm pa gam ơm rềp tiah tàm gùl xã tai, ồs đèng, gùng lòt, hìu bơsram, hìu sơnơm ndrờm geh bơcri priă lam lơh tơl niam, hơ pơrgon dong hìu bơnhă ồng Sùng geh dùl rài kis niam rlau: “Añ sơnơng là gờñ halà jơla den he kung pal ntrờn, sơlơ gờñ sơlơ niam nàng geh rài kis pa. Ai dilah ơm tiah yau den kal ke ngan, ờ kờñ lơh broă lơh, trồ prang den thul kơmbuh, trồ mìu den bŏ lơmbè, pơn drờm mờ tiah ơm kis yau den ƀòn ơm kis pa ƀuơn kis rlau”.

Ală mpồl lơh broă dong làng bol tiah tơnau dơng dà Krông Pách Thượng tă sờr hìu đam

Nàng dong làng bol ntrờn tus  ƀòn ơm kis pa, jơh bal 2 kơnhoàl M’Drak mờ Ea Kar ndrờm sồr git nđờ rhiang nă cau geh ling rơcang gàr ƀòn, kuang bàng, đảng viên, đoàn viên, ơruh pơnu tus dong làng bol. Rơndeh kong goa pơndiang phan bơna, hìu đam dong làng bol tŭ lơi kung rơcang lài, nùs nhơm gơlơh bè ngai chờ. Tus bal tă sờr mờ ntrờn hìu, bi Y Ten Niê, Bí thư đoàn ơruh pơnu thị trấn M’Drak, kơnhoàl M’Drak pà git, ală bơyô đoàn viên ơruh pơnu neh tam pà kơnòl broă nàng gàr niam nùs nhơm mờ pràn kơldang să jan ai dơ̆ dong kờl làng bol jŏ ngai in: “Broă ntrờn làng bol ngai do den geh lơh jơh nùs, sơbac mhar ngan. Đoàn viên ơruh pơnu mờ ală mpồl pơgồp bal jơh nùs ngan dong làng bol nàng khi in mhar gàr kơ̆ kơljap rài kis. Tam pà kơnòl broă jat mpồl, ngai do mpồl do, ngai tơnơ̆ mpồl ndai mut dong kờl den geh gàr pràn kơldang să jan ai oh mi in mờ tŭ lơi kung rơcang lơh kơ nòl broă”.

Bal mờ ntrờn lòt tiah ndai, tàm tiah tus là ƀòn ơm kis sồ 1, xã Cư Elang, kơnhoàl Ea Kar, ală mpồl kung neh rơcang lài nàng dong làng bol lơh hìu, gàr kơ̆ kơljap rài kis. Ồng Trần Văn Thanh, Chủ tịch Ủy ban Nhân dân xã Cư Elang pà git, tàm ƀòn ơm kis pa bơh xã dê neh rơcang lài nàng 230 hìu bơnhă làng bol, 1 rbô 150 nă cau tiah tơnau dơng dà Krông Pách Thượng in tus ơm kis. Tàm do, tơl bơta kuơmàng bè dà sàng, dà lơh sa, ồs đèng, gùng lòt, hìu bơsram, ù ơm mờ ù lơh sa ndrờm neh geh bơcri priă rơndap tap sèng tơl niam. Gơnoar atbồ xã kung lơh ngan jơh nùs nàng làng bol in mhar kis gơ rờm bal mờ ƀòn ơm kis pa: “Xã kung neh bơt bơtàu rơndap broă, broă rơndap lơh pơgồp bal mờ ală cơldŭ lơh broă, mpồl lơh broă kơnhoàl dê, bol hi neh rơcang lài mpồl lơh broă kung bè ală mpồl sền gròi nàng rò làng bol. Gàr kơ̆ kơljap gờñ ngan rlau jơh bè rài kis. Bol hi geh lơh ngan jơh nùs nàng lơh hìu đam làng bol in, lơh bè lơi bơh 1 tus 2 ngai là gàr kơ̆ kơljap. Ală sau lòt bơsram den bol hi hơ pơrgon mìng tàm 2 ngai”.

Rơndeh kong goa pơndiang phan bơna, hìu đam dong làng bol sùm rơcang lài mờ ờ sa priă

Tus bal broă lơh đơng lam dong làng bol ntrờn tus ƀòn ơm kis pa, ồng Nguyễn Đình Thìn, Phó Kuang atbồ Mpồl atbồ rơndap broă lơh bơcri priă bơt bơtaù broă lơh gùng lòt mờ lơh sa suơn sre càr Dak Lak pà git, geh rlau 700 hìu bơnhă làng bol tiah tơnau dơng dà Krông Pach Thượng gơ wèt mpồl pal ntrờn nàng drơng rơndap broă lơh in. Tơnơ̆ 12 nam, tus tŭ do neh gơtùi lam lơh broă ntrờn làng bol nàng ai ù là bơta chờ hờp ngan. Bulah bè hơư, broă gơtùi ntrờn jơh khà hìu bơnhă làng bol là uă ngan, sồr pal geh bơta lơh ngan dờng ngan bơh ală kấp gơnoar atbồ bơh xã tus càr, kuơmàng là kờñ pal geh bơta git wă, ringbal bơh làng bol dê: “Kung pal đơs là, tàm do kờñ pal geh bơta lơh ngan bơh làng bol dê. Bè mpồl lơh broă den bol hi hơ pơrgon là, dilah làng bol jơh nùs, broă ntrờn gơtùi lơh gơs lài mờ ngai 30/4, lơyài ngan rlau jơh là ngai 30/6. Bulah bè hơ̆, a` kung đơs nền làng bol là cau lơh nền. Làng bol ring bal uă rlau tai, dong kờl is, cau lòt lài dong cau lòt tơnơ̆, cau rềp hìu bal tàm dong kờl bal mờ gơp den kơnòl broă geh lơh gơs gờñ rlau”.

Ƀòn ơm kis pa geh bơcri priă lơh ring niam bal mờ wil tơl phan bơna kuơmàng

Bè hơ̆, tơnơ̆ 12 nam kơp gơn, làng bol tiah tơnau dơng dà Krông Pach Thượng neh sơn đờm geh ntrờn tus ƀòn ơm kis pa mờ hơ pơrgon bè dùl rài kis pa niam rlau. Rơndap broă neh geh tŭ gơtìp ơm ing, geh tŭ geh tơngai gơbàn kòl yan. Tàm nhai 9 nam 2020, kung gam ală bơta tàm pơndang dờng ngan, ală gah geh gơ rềng kung gam tàm pơrdah mờ gơp bè bơta lơyài. Mơya sơrlèt gan jơh ală bơta kòl yan, mờ bơta lơh bal kràñ cê bơh Bộ Nông nghiệp mờ Phát triển Nông thôn mờ càr Dak Lak dê bal mờ mpồl lơh broă chính trị tàm kấp xã, kơnhoàl mờ kuơmàng là bơta tam gơl tàm jơnau git wă bơh làng bol dê, rơndap broă lơh rbòng dà git nđờ rbô tơmàn đong do gam hời rơhời gơtùi tă bơsong ală kòl yan. Dilah ƀuơn ƀuài, rơndap broă digơlan geh lơh gơs mờ ai ngui jat bè broă rơndap lơh mờ Chính phủ, Quốc hội neh tam gơl là lồi nam 2021.

Cau mblàng K’Duẩn