VOV4.K’ho - Càr Kon Tum tŭ do geh 187 Hợp tác xã mờ rơlao 9 rơbô 600 nă cau tàm mpồl mờ cau lơh broă. Gơtìp mờ ală kal ke tài bơh kòp Covid-19 lơh gơbàn, geh ờ Hợp tác xã tàm càr Kon Tum neh tơnguh niam nùs nhơm tam klăc bal, geh ală broă lơh bơceh sơrlèt mờ bơta tơlòng mờ rơcang ai tơngai tơnguh bơtàu pa tàm rài tơnơ̆ mờ kòp gơtờp.

Hợp tác xã lơh sa suơn sre công bằng Pô Kô, thị trấn Đăk Hà, kơnhoàl Đăk Hà, càr Kon Tum geh 113 nă cau tàm mpồl mờ 172 lồ ù mìng tam kơphe, ai phan geh bơta niam nàng ală hìu coh, bŏ dunia in lơh broă. Kòp Covid-19 gơtìp ni sơna, Hợp tác xã ờ geh broă rơcang lài tus mờ bơta do, den tàng geh uă sră dan blơi phan gơtìp kòl tus rơlao 1 nam pơn drờm mờ rơndăp broă geh ai. Bal mờ hơ̆, priă ơhò pơn diang tàm dà lềng gơguh mờr 10 dơ̆ pơn drờm mờ lài, container nàng ơn phan ờ tơl lơh kơphe tăc mờ lơgar ndai gơtìp uă kal ke.

Mò Phạm Thị Huyền Anh (dơ̆ bàr bơh đah kiao) yal bè măi coh kơphe Hợp tác xã pa blơi nàng tơnguh bơtàu broă lơh kơphe ƀòk

Kờñ geh sùm broă lơh sa, Hợp tác xã lơh sa suơn sre công bằng Pô Kô neh lam sồr ală cau tàm mpồl tam tai ală phan ndai bơdìh mờ kơphe, bè khoah, gar lơnga nàng geh tai priă mờ geh sùm bơta bơkah ai ù in mờ lơh gơmù khà priă bơcri phơng sih ai tờm kơphe in. Bơh kơphe mờ ală phan tam bơrlŭ bal, Hợp tác xã tơnguh bơtàu tai 2 bơta phan tăc tàm lơgar, tàm hơ̆ geh kơphe ƀòk klài mờ phin mờ khà 100% plai dum mờ bơrlŭ bal phe kir nàng sền gàr bơta pràn kơl dang să jan. Nam 2020 kờp khà priă geh bơh Hợp tác xã gam geh rơlao 18 tơmàn đong. Mò Phạm Thị Huyền Anh, Chủ tịch Hội đồng Quản trị Hợp tác xã lơh sa suơn sre công bằng Pô Kô đơs, Hợp tác xã neh geh ală tam gơl di pal mờ broă kờñ kă bro nàng gơdờp mờ geh tai bơta kơ̆ kơl jăp tàm bơta kòp Covid-19: "Lài do den bol añ mìng geh tăc mờ lơgar bơdìh mờ kă bro den tŭ do bol añ kung geh tơngai nàng kơlôi sơnơng wơl mờ bơ̆t bơtàu gùng dà broă lơh nàng lơh bè lơi gơtùi tăc geh ală cau blơi tàm lơgar Việt Nam in. Mờ lơh broă bal mờ ală mpồl lơh broă ndai kung bè ală gah lơh broă ndai tàm lơgar Việt Nam nàng geh dùl mpồl kă bro Online. Mờ bè hơ̆ là bơdìh mờ broă tềm pềr geh priă bơcri ù tiah den bol añ gơtìp yal uă rùp rài bơh Hợp tác xã kung bè phan geh lơh niam bơh Hợp tác xã den tus mờ drà kă bro tàm lơgar".

                     Suơn  mắc ca gam geh plai bơh Hợp tác xã Mắc ca Nhân Hoà ...

Mùl màl tàm càr Kon Tum kung pà gŏ, bŭ lah kòp Covid-19 neh lơh gơtìp uă ngan kal ke tus mờ broă lơh sa kă bro, mơya mờ nùs nhơm tam klăc bal mờ geh bơyai lơh niam, uă hợp tác xã gam tơnguh bơtàu kơl jăp.

Tàm thôn 3, xã Kon Đào, kơnhoàl Đăk Tô, Hợp tác xã Mắc ca Nhân Hoà geh 9 nă cau là dùl jơnau kờñ đơs pơniơu. Kòp Covid-19 lơh drà kă bro gơtìp kal ke, khà priă phan geh lơh gơmù uă mơya hợp tác xã kung gam bơcri priă di mờ broă lơh, bè pờ ơnàng bă ù tam pa, bơcri priă tàm broă blơi phan pồ ngkàr, pơr rañ mờ prăp gàr phan geh lơh. Ồng Nguyễn Văn Quyết, Chủ tịch Hội đồng Quản trị, mờ kung là kuang atbồ Hợp tác xã Mắc ca Nhân Hoà pà gĭt: “Tàm bơta kòp he geh dùl mpồl Hợp tác xã pơgồp bal ală cau tàm mpồl. He lơh broă bal, kơlôi sơnơng bal, tơnguh bơtàu bal mờ tă priă bal den geh ală bơta pràn dờng rơlao. Tòm mắc ca là tờm phan tam pa kờñ pal geh dùl jơnau kơlôi sơnơng. Tơl nă cau pal bơsram is den gơtìp kal ke rơlao. Bol añ tơrgùm bal ală cau tàm mpồl mờ tơl nă cau geh dùl bơta pràn krơi is nàng pơgồp bal, lơh broă bal nàng tơnguh bơtàu bal mờ cèng geh rài kis niam rơlao bal ai jơh ală cau tàm Hợp tác xã in”.

Tus bal mờ Hợp tác xã lơh sa suơn sre công bằng Pô Kô, bơta kal ke tàm hìu nhă ồng Nguyễn Bá Lộc gơmù

Jăt khà kờp bơh Mpồl tam klăc Hợp tác xã càr Kon Tum pà gŏ, geh di pơgăp 80% Hợp tác xã tàm càr do gơtìp aniai bơh kòp Covid-19. Jăt ồng Nguyễn Bá Lộc, kuang bàng tàm Hợp tác xã lơh sa suơn sre công bằng Pô Kô yal, kal ke mờ ală hợp tác xã gam gơtìp là kal ke bal. Ồng Lộc đơs là, tŭ tus bal Hợp tác xã den làng bol lơh broă sa sơrlèt mờ kal ke ƀuơn rơlao: “Tus bal mờ Hợp tác xã cèng geh uă bơta kuơ là tài geh dong kờl bè broă lơh, dong kờl bè phơng sih mờ blơi kơphe mờ khà priă kas rơlao mờ geh pơgồp bal tai 2 rơbô 500 đong pơn drờm mờ khà priă tàm drà kă bro. Pah nam bè nam do Hợp tác xã bơcri priă tai ai làng bol in 1 lồ geh 1 tấn phơng tai. Bè hơ̆, he tơmù geh priă bơcri bơh hìu nhă dê. Bŭ lah khà priă gơtìp kal ke mơya he tus bal mờ Hợp tác xã kung ờ hoan kal ke rơlao”.

Jăt ồng Nguyễn Lâm Cảnh, Chủ tịch Mpồl tam klăc Hợp tác xã càr Kon Tum yal, tàm broă sơrlèt mờ kal ke geh sùm broă lơh sa kă bro, broă tam klăc bal, ring bal bơh ală cau tàm mpồl; broă ñhăp ñhar, lơh ngan bơh mpồl atbồ ală hợp tác xã là kuơ màng ngan. Bơdìh hơ̆ tai, gam geh broă tus bal bơh ală anih ai càn priă làng bol in. ală anih do neh di tŭ lơh wơl tơngai tơm dồs mờ tơmù khà priă cồng ai cau tàm mpồl in; lơh niam sră nggal nàng ală hìu tàm mpồl in geh di tìp mờ ală khà priă ai càn, dong kờl geh bơta pràn bơcri priă ờ gơtìp koh gơl tài bơh bơta tam gơl drà kă bro. Bè bơnah mpồl tam klăc Hợp tác xã càr, ồng Nguyễn Lâm Cảnh pà gĭt, mpồl tam klăc pơn jăt tai tơnguh niam gơnoar lơh tờm nàng dong kờl ală Hợp tác xã tơnguh bơtàu: “Mpồl tam klăc Hợp tác xã càr tơnguh broă pơlam, lơh gơs mpồl đơng lam tơnguh bơtàu broă lơh sa bal ală cấp nàng gàr niam broă pơgồp rign bal, geh cồng nha bơh ală gah broă tàm broă lơh jăt ală broă dong kờl bè lơh sa bal mờ tơnguh gơnoar bơh ală cau tàm mpồl tàm broă tơnguh bơtàu broă lơh sa bal, hợp tác xã”.

Broă geh uă Hợp tác xã tàm càr Kon Tum tơnguh niam nùs nhơm tam klăc bal, geh ală broă lơh bơceh lơh nàng sơrlèt mờ bơta tơlòng mờ kòp Covid-19 lơh gơbàn là broă pơn jờng ngan, hòi jà lam sồr uă ngan ai ală Hợp tác xã ndai in tàm bơta kòp gơtờp di gơlan gam jŏ. Bơta do kung pà gŏ geh bơta kuơ bơh broă lơh Hợp tác xã gơwèt mờ dùl càr mờ broă lơh sa, mpồl bơtiàn gam uă kal ke bè càr Kon Tum.

Cau cih Khoa Điềm-Cau mblàng Ndong Brawl