VOV4.K’ho - Mang òr (19/12), tàm ƀlàng rơndeh par dunia Nội Bài neh bơyai lơh jào sơnơm vaccine, phan lơh broă, phan lơh sơnơm mờ priă ai ală anih lơh broă, mpồl lơh sa kă bro lơgar Việt Nam in.

                              Jào pà sơnơm vaccine, phan lơh broă, phan lơh sơnơm mờ priă

Tàm dơ̆ jào, Phó Thủ tướng Chính phủ ồng Lê Minh Khái mờ Tổng Thư ký Quốk hội, Củ nhiệm Văn phòng Quốk hội ồng Bùi Văn Cường neh jào pà sơnơm vaccine, phan lơh broă, priă bơh ală mpồl lơh sa kă bro lơgar Hàn Quốc mờ lơgar Ấn Độ pà lơgar Việt Nam in di tàm dơ̆ tus còp bơh Củ tịc Quốk hội ồng Vương Đình Huệ dê ai Bộ Y tế, Ủy ban Mặt trận Dà lơgar Việt Nam. Mùl màl, jào 200 rơbô ding sơnơm vaccine COVAXIN ai kơnòm dềt hờ đơm 18 sơnam in geh Tập đoàn Bharat Biotech (Ấn Độ) dong kờl. Jào pà măi mŏk mờ 1 tấn phan lơh sơnơm nàng lơh 4 tơlăk 750 rơbô nai sơnơm MOVINAVIR sơm kòp Kovid-19 geh kông ty Optimus Pharma (Ấn Độ) pơgồp bal mờ Kông ty cổ phần hoá-dược phẩm Mekophar (Việt Nam). Jào 2 tơmàn Won (di pơgăp 40 tơmàn đong) bơh Tập priă jền Hana (Hàn Quốc) dong kờl bal mờ Ngân hàng Kă bro cổ phần Bơcri priă mờ Tơnguh bơtàu Việt Nam (BIDV) nàng lơh ală broă lơh tàm rài kis mpồl bơtiàn.

Cau mblàng Ndong Brawl