VOV4.K’ho – Drim òr 3-6, tàm càr lơgar Hà Nội, mpồl tam klac ală mpồl Khoa học mờ Kỹ thuật Việt Nam bơyai lơh pơrjum cau ala mat gùt lơgar dơ\ 7, tơngai lơh broă bơh nam 2015 tus nam 2020 mờ tơngume “ Tam klac – Tam gơl pa - Bồ tơngoh jak – Bơtàu tơnguh”. Đơs đơng lam pơrjum, ồng Nguyễn Phú Trọng kuang atbồ đơng lam Đảng dà lơgar đơs tờm: Bơta chài cau geh bồ tơngoh jak là bơnàng jă gơguh jak mpồl bơtiàn dê. Mpồl cau geh bồ tơngoh jak Việt Nam sùm là mpồl cau lơh broă bơceh pa kuơ màng ngan tàm broă bơt bơtàu mờ bơtàu tơnguh dà lơgar. Bơt bơtàu mpồl cau geh bồ tơngoh jak pràn kơldang, kơ\ kơljap là tơnguh tơn bồ tơngoh jak chài bơh jơi bơtìan dê, bơta pràn bơh dà lơgar dê, tơnguh pràn jak đơng lam bồ bơh Đảng mờ cồng nha lơh broă bơh gah gùng dră bal dê. Tàm nđờ jơt nam do, mpồl cau geh bồ tơngoh jak Việt Nam ngai sơlơ bơtàu tơnguh, bềng nùs nhơm kờ` gơboh dà lơgar, nùs nhơm pơn ìơ să, pơn jờng jơi bơtiàn, sùm rềp mềr mờ lòt bal mờ broă lơh kac màng bơh dà lơgar dê tềng đap bơta đơng lam bơh Đảng dê. Pơrjum neh pồ 173 nă cau geh jơng tàm mpồl duh broă dà lơgar bơh mpồl tam klac ală mpồl Khoa học mờ Kỹ thuật Việt Nam tơngai lơh broă bơh nam 2015 tus nam 2020. Gíao sư, Tiến sĩ khoa học Đặng Vũ Minh pơnjat tai geh pin dờn pồ lơh kuang atbồ mpồl tam klac ală mpồl Khoa học mờ Kỹ thuật Việt nam.

                                                                       Cau mblàng  K’ Duẩn.