JƠNAU TƠNGGIT TÀM LƠGAR.

 Mho òr 4/8, Tàm hìu lơh broă gơnuar ala mat dà lơgar, ồng Nguyễn Sinh Hùng kuang atbồ gơnoar ala mat dà lơgar neh wă ồng Bob Corker kuang bàng tàm gơnoar ala mat dà lơgar, kuang geh jơng dờng màng bơh anih duh broă cribơyai bal mờ lơgar ndai bơh gơnoar ala mat dà lơgar Mỹ dê. Tàm dơ\ wă, ồng Nguyễn Sinh Hùng neh ràng tơlik bơta chờ hờp tềng đăp ală bơta bơtàu tơnguh tàm git gơp lơh bơ yô bal niam bơne\ đah 2 lơgar tàm 20 nam do mờ đơs tờm, gơnoar ala mat dà lơgar Việt Nam kơp kờ` chồl pràn bơta git gơp tam klac bal mờ gơnoar ala mat dà lơgar Mỹ. Ồng Nguyễn Sinh Hùng pin dờ` dơ\ tus còp bơh ồng Bob Corker dê tus lơgar Việt Nam dơ\ do geh cồng nha niam, pơ gồp bơnah tàm broă bơtàu tơnguh git gơp 2 lơgar mờ đah 2 gơnoar ala mat dà lơgar.

 Mho òr 4/8, mpồl kuang bàng sền gròi bơh anih duh broă sùm Gơnoar ala măt dà lơgar geh mò Trương Thị Mai kuang atbồ anih duh broă ală bơta mpồl bơtiàn Gơnoar ala măt dà lơgar lam bồ neh geh dơ\ lơh broă mờ Gah bơ\t bơtàu dà lơgar bè broă dong kờl lơh hìu ơm cau geh màng mờ dà lơgar jăt kơrnoăt bơh Anih duh broă sùm Gơnoar ala măt dà lơgar dê. Ala măt mpồl kuang bàng, mò Trương Thị Mai neh dờp ală broă lơh ngan bơh Gah bơ\t bơtàu dà lơgar dê tàm broă lơh jăt ală broă dong kờl bè hìu ơm  ai cau geh màng mờ dà lơgar tàm tơngai do. Mờ sồr Gah bơ\t bơtàu dà lơgar pal mhar lơh jăt ală kơrnoăt mờ broă dong kờl gơrềng tus hìu ơm cau geh màng in, tàm hơ\ uă ngan là tàm tiah sar lơgar ngài kờ` ring niam mờ tơnguh rài kis phan bơna mờ nùs nhơm cau geh màng in. Gah bơ\t bơtàu dà lơgar mờ ală càr, bòn dờng sền wơl ală cau geh màng, ba` gơtìp gơlời; tus nam 2018, ală càr, bòn dờng pal lơh gơs kơrnoăt bơh Anih duh broă sùm Gơnoar ala măt dà lơgar.

Ngai òr 4/8, cơldu\ lơh broă gơnoar atbồ lơgar neh geh sră nggal pơyua gah cribơyai broă mờ lơgar ndai dà lơgar, gah lơh broă  cau ling sồt să mờ mpồl bơtiàn dà lơgar, yal jơnau đơs bơh ồng Nguyễn Tấn Dũng kuang gơs gơnap gơnoar atbồ hờđăng rlao jơh dà lơgar bè sền gàr cau lơgar Việt Nam tàm lơgar Libya. Kuang gơs gơnap gơnoar atbồ hờđăng rlau jơh dà lơgar sồr gah lơh broă cau ling sồt să mờ mpồl bơtìan dà lơgar  đơng lam ơm ing broă ai cau lơgar Việt Nam tus lơh broă tàm lơgar Libya, gah cribơyai broă mờ lơgar ndai dà lơgar, anih ala mat lơgar Việt Nam tàm lơgar Libya sền gròi nền ală bơta gơlik geh, rơcang lài pơ gồp bal mờ gah lơh broă-cau ling sồt să mờ mpồl bơtìan dà lơgar geh rơndap broă, broă lơh gàr niam ờ do ờ dă tus mờ cau lơh broă lơgar Việt Nam gam lơh broă tàm lơgar Libya. Kuang gơs gơnap gơnoar atbồ hờđăng rlao jơh dà lơgar kung sồr gah lơh broă-cau ling sồt să mờ mpồl bơtìan dà lơgar mhar geh rơndap broă ai 281 nă cau gam lơh broă tàm Tripoli mờ Bengazi rê wơl hờ lơgar. Sền gròi nền nòn ală bơta gơlik geh, rơcang rơndap broă mờ tu\ tơngai nàng jun jơh cau lơh broă lơgar Việt Nam tàm lơgar Libya rê wơl hờ lơgar lài mờ tu\ ală bơta gơlik geh sơ lơ ờ niam.

 Ngai òr 4/8, 25 nă cau lơh broă lơgar Việt Nam gam lơh broă tàm lơgar Libya neh ntrờn mờ gùng lòt tàm ù gờl bơh bòn dờng Benghazi tus mpồng nhàr dà lơgar Salloum kờ` mu\t tàm lơgar Ai Cập. Tàm tiah nhàr dà lơgar, đah ù tiah lơgar Ai Cập, mpồl kuang bàng anih ala măt lơgar Việt Nam tàm lơgar Aicập neh tus rơcang dờp ală cau mu\t tàm lơgar Ai Cập. tơnơ\ mờ tu\ ală sră nggal mu\t tàm lơgar ală cau lơh broă neh lơh gơs, mpồl kuang bàng do bal mờ cau lơh broă geh rê tus càr lơgar Cairo mờ gùng ù gờl. Jăt jơnau yal pa ngan geh anih ala măt lơgar Việt Nam tàm lơgar Ai Cập pa yal, neh geh vé rơndeh par rê tus lơgar Việt Nam ai ală cau lơh broă rơcang mu\t tàm lơgar Ai Cập. Mùl màl, tàm mho ngai do, ală cau lơh broă gơwèt mờ anih lơh sa kă bro Simco Sông Đà geh đì rơndeh par rê tus lơgar Việt Nam. Khà cau lơh broă gam tai gơwèt anih lơh sa kă bro Vinaconexmex geh par tơnơ\ mờ hơ\ 1 ngai, hơ\ là ngai 06/8.

 Tàm dơ\ pơrjum mut lơh broă ai cau lòt lơh broă hờ lơgar ndai 6 nhai lồi nam pa geh anih duh broă làng bol càr Dak Nông bơyai lơh, càr Dak Nông neh tơlik jơnau kờ` 6 nhai lồi nam, gùt càr geh tơrgùm chồl pràn broă ai cau lòt lơh broă hờ lơgar ndai, lơh ngan ai pơgap 100 nă cau rlau hơ đăng lòt lơh broă geh tơngai pơr gon tàm lơgar ndai, uă ngan là tàm Đài Loan, lơgar Malaysia mờ lơgar Nhờk. Dak Nông kung geh sền dờng màng rlau tai tus broă bơto bơtê, tơnguh jơnhua bơta niam cau lơh broă, bơta chài lơh broă, bơta chài đơs dà lơgar ndai, bơta chài ờs mờng tu\ lơh broă tus mờ mpồl cau lòt lơh broă hờ lơgar ndai, drơng jơnau kờ` bơh ală lơgar dờp cau lơh broă.

 Tàm ală ngai do, gah sơm kòp kơnòm dềt hìu sơnơm càr Lâm Đồng neh dờp 11 nă kơnòm dềt sơm kòp tài khih phan sa. Jăt jơnau yal bơh ală cau mè, cau bèp kơnòm dềt yal, khih phan sa gơl^k geh tàm ờ uă hìu, tài lài mờ hơ\ geh sa ba` bù` geh măt sơnđan Tứ Hải, blơi tàm 2 anih tềng gùng Bùi Thị Xuân mờ gùng Bà Triệu, bòn dờng Dà Làc. Bác sĩ Trần Xuân Hoà kuang jăt jơng atbồ gah sơm kòp kơnòm dềt, hìu sơnơm càr Lâm Đồng pà g^t: gah sơm kòp do neh dờp ờ uă kơnòm dềt geh pin là khih phan sa tàm khà di mơ. Tàm drim òr 4/8, kuang bàng lơh broă tàm anih lơh sơnơm bòn dờng Dà Làc mờ gah sền gàr niam ờ do ờ dă phan sa càr Lâm Đồng kung neh tus tàm gah sơm kòp kơnòm dềt, hìu sơnơm càr Lâm Đồng kờ` lùp sền kờ` g^t bè kòp ală kơnòm dềt gơrềng tus mờ khih phan sa.

 Gơrềng tus tiah gơlik geh kòp jê ndul gơjroh tàm mpồl 8, bòn 1, ntum Lê Minh Xuân, kơnhòal Bình Chánh, bòn dờng Hồ Chí Minh, mho òr 4/8, mò Nguyễn Thị Kim Tiến kuang atbồ gah lơh sơ nơm dà lơgar neh tus tàm hìu làng bol nàng git ală bơta gơlik geh mờ sền dà ngui. Do là tiah geh kòp jê ndul gơjroh sơnrờp bơh bòn dờng dê tàm nam do, geh 9 nă cau gơbàn kòp, tàm hơ\ geh 1 nă cau chơt tàm ngai 16/7. Tiah gơlik geh kòp tu\ do gam geh 30 hìu nhă làng bol ơm kis mờ rlau 100 nă cau, tàm hơ\ geh 22 nă kơnòm dềt hơ đơm 15 sơnam. Gah lơh sơ nơm kung ai dà mờ làng bol ngui nàng sền gròi.

 Bơh bồ nam tus tu\ do, tàm càr Quảng Ngãi geh rơlao 2 rơbô 200 nă cau gơtìp so, mèo sơnrang kăp pal c^t sơnơm sơndră mờ kòp, neh geh 2 nă cau gơtìp chơ\t. Gah lơh sơnơm phan ròng càr Quảng Ngãi pà g^t, bơh bồ nam tus tu\ do, gah lơh sơnơm phan ròng mìng rơ\p c^t sơndră mờ kòp sơnrang di pơgăp 8 rơbô nơm so, geh 50% khà so ròng. Khà c^t sơnơm so, mèo ròng geh ờ uă là tài làng bol ờ sền gròi tàm broă sơndră mờ kòp sơnrang, bơdìh hơ\ tai, mpồl kuang bàng lơh broă gah lơh sơnơm phan ròng tàm ală tiah kung ờ sền gròi ngan sơl tus mờ broă sền gàr, c^t sơnơm sơndră mờ kòp so, mèo ròng in.

 Tơ nơ\ 4 ngai geh bơyai lơh duh hồl mờ uă broă lơh li la niam ngan, mang òr 4/8, pơr lòng dunia võ bơhìan yau Việt Nam-Bình Định nam 2014 neh tơn jơh, lời wơl nùs nhơm sơ nơng ờ gơtùi hui\ tus mờ gơp bơ yô dunia. mờ tơngume “ Võ bơhìan yau Việt Nam-tơrgùm bơtòm mờ àng gơ crà”, pơr lòng dunia võ bơhìan yau Việt Nam dơ\ 5 geh rlau 1 rbô nă cau tus bal bơh 60 mpồl võ dunia bơh 26 gah mpồl võ tus bơh 24 dà lơgar, kơnhòal ù tiah, tơrgùm bơ tòm bal mờ 63 mpồl võ tàm lơgar, lơh gơs ngai chờ võ niam ngan, li la ngan tàm ù tiah khin cha jak chài Bình Định. mờ 6 broă lơh tờm, 7 broă lơh lơh jat, pơr lòng neh pơyua jơnau đơs “Prap gàr mờ bơtàu tơnguh” võ bơhìan yau Bình Định-Việt Nam. Bal mờ hơ\, pơr lòng gam geh bơta rề ơnàng, gơ rờm bal võ, mờ bơta tus bal bơh 3 mpồl võ bơhìan yau lơgar Nhờk dê là Sumo, Battoudo mờ Karatedo.

JƠNAU TƠNGGIT DUNIA.

Ală tam pìt tam phà tàm dà lềng đah mattơngai lik geh cribơyai tàm dơ\ pơrjum kơnhòal ASEAN, hòi pơ gồp bal là ARF geh bơyai lơh mờr tus tàm lơgar Myanmar. Do là jơnau yal bơr bơh ồng Daniel Russel kuang dong broă kuang atbồ gah cribơyai broă mờ lơgar ndai lơgar Mỹ drơng bè ală bơta đah mattơngai lik châu Á-Thái Bình Dương tàm dơ\ pơrjum bau\ tàm càr lơgar Washington lơgar Mỹ tàm drim do 5/8 jat jiơ tiah do. Ồng Daniel Russel pà git, kal ke tàm dà lềng đah mattơngai lik geh là 1 tàm ală tơngume tờm tàm dơ\ cribơyai ARF nam do, bơdìh mờ ală bơta bè dong kờl cau, sơndră rềs àr, tam gơl trồ tiah, bơto bơsram, lơh sa. Tàm dơ\ pơrjum do, ồng John Kerry kuang atbồ gah cribơyai broă mờ lơgar ndai lơgar Mỹ kung geh đơs ală bơta ờ suk bơh lơgar Mỹ dê bè bơta tàm dà lềng đah mattơngai lik kung bè cribơyai mờ ală lơgar geh gơ rềng mờ tam pà nùs nhơm lơgar Mỹ dê bè ală kơrnuat đơng lam bal mut ngui tus mờ jơh ală gah tàm broă bơ song tam pìt tam phà.

Gơnoar atbồ lơgar Đức ngai òr 4/8 pà g^t, lơgar do neh ơm 1 jơnau ring bal ai anih tàp ling lơgar Nga in tài bơta ờ niam tàm lơgar Ukraine. Ồng Sigmar Gabriel kuang jăt jơng gơs gơnăp gơnoar atbồ hờđang rơlao jơh dà lơgar Đức neh ai wơl sră ai tàp ling-do là broă neh gơtìp ơm ing bơh nhai 3 tơnơ\ mờ tu\ lơgar Nga tơmu\t bồt Crimea. Broă lơh do geh tus 100 tơlăk ơro,ndrờm mờ 140 tơlăk dollar Mỹ. Lơgar Nga lài mờ hơ\ neh sơnđan broă ơm jơnau ring bal do la ờ geh kờ` niam, mờ yă lơgar Đức neh lơh broă jăt mờ jơnau sồr bơh lơgar Mỹ dê. Jăt jơnau ring bal lài do, mpồl lơh sa sền gàr dà lơgar Đức Rheinmetall neh lơh 1 anih tàp ling tàm tiah Volga ai lơgar Nga in. Di lah di jăt rơndăp broă lơh, anih do geh mu\t ngui tàm lồi nam do mờgeh bơto 30 rơbô nă ling pah nam.

 Ồng Laurent Fabius kuang atbồ gah cribơyai broă mờ lơgar ndai lơgar Tây ngai òr 4/8 hòi jà mpồl bơtiàn dunia jòi broă lơh gùng dră bal kờ` tơn jơh tam lơh tàm dòr bơ nơm Gaza mờ dong lơh geh 1 kơrnuat ơm tam cuh ngan ngồn. Ồng pà git, Tây kờ` mờ sồr jal mhar crơng gơs 1 kơrnuat ơm tam cuh ngan ngồn bè đah lơgar Ai Cập neh sồr. Tây mờ mpồl tam klac châu Âu rơcang geh ală tă pơ gồp mùl màl. Dơ\ tam lơh tàm dòr bơ nơm Gaza kờ` pal geh 1 broă lơh gùng dră bal mờ pal geh mpồl bơtìan dunia dong kờl tài ờ ngòt ală bơta lơh ngan, 2 gah tàm dơ\ tam lơh tàm Gaza kung gam ờ gơtùi lơh jơh ală dơ\ cribơyai.

Ồng Avigdor Bieberman kuang atbồ gah cri bơyai broă lơh bal mờ lơgar bơdìh lơgar Israel ngai òr 4/8 đơs là, gơnoar sền gròi dòr Gaza pal geh jàu anih duh broă dunia dê, tơnơ\ mờ tu\ lơgar Israel mu\t tam lơh tàm dòr Gaza mờ ờ geh jơnau ring bal lơi mờ mpồl geh phào Hamas. Jăt jơnau yal bè bơta lơngăp lơngai lơgar Israel yal, do là dơ\ sơnrờp 1 nă kuang bàng lơgar Israel ai tơl^k jơnau kơlôi sơnơng tus anih duh broă dunia bè bơta tàm dòr Gaza. Lài mờ hơ\, tàm ală dơ\ pơrjum mpồl cri bơyai sền gàr bơta lơngăp lơngai anih duh broă dunia bè bơta tàm Gaza, do tơngu me do ờ hềt tu\ lơi đơs tus.

 Gơnoar ala mat dà lơgar Libya ngai òr 4/8, neh bơyai lơh pơrjum ngan ngồn sơn rờp tàm bòn dờng đah mattơngai lik Tobruk lơgar do dê. Mpồl duh broă làng bol gùt lơgar bơh lơgar Libya la anih đơng lam dà lơgar ngai òr kung jàu gơnoar ai gơnoar ala mat dà lơgar in mờ 200 nă kuang geh jơng geh sac rơ wah tàm lồi nhai 6 pa do. Dơ\ pơrjum geh bơyai lơh tàm tu\ tơngai lơgar Libya gam pơhìn gơlik geh tam lơh is tàm dơlam dà lơgar mờ tam lơh gơlik geh đah ală mpồl geh phàu lơh mpồl bơtiàn dunia ờ suk ngan.