Anih tờm lơh broă ơruh pơnu, kơnòm pa tàu càr Dăk Lăk ơnàng 3 lồ, tàm sơnah ƀòn Tự An, ƀòn dờng Buôn Ma Thuột. Broă lơh tàm hơ̆ geh, dùl hìu tàp pràn să jan 2 cờn, ơnàng 3 rơbô thơk vuông; dùl tơnau re dà mờ 2 gah hìu jă brê, hìu soh phan; ƀlàng bê tông ơnàng 1 rơbô 500 thơk vuông mờ ală mpồng, pơngàr sền gàr gùt dar. Broă lơh kờp jơh geh bơcri priă lơh mờr 62 tơmàn đong. Broă lơh geh lơh bơh nam 2013 mờ lơh sir tàm nam 2017. Mơya, broă lơh gĭt nđờ jơ̆t tơmàn đong do gơtìp lời gời bơh tŭ hơ̆ tus tŭ do.

Ồng Võ Đình Thận, cau lơh broă sền gàr anih tờm do pà gĭt:Añ lơh broă tàm do neh 5 nam rao, sền gŏ jŏ jŏ den đah đoàn viên geh pơrjum 1, 2 dơ̆ sơl. Bơh ngai añ lơh broă tàm do là ờ geh đèng, ờ geh dà sùm, pal lòt tàm hìu làng bol kềng gah dan tùng dà rê ngui. Broă lơh den ờ diơng, mìu ñhăt tàm cờn 2, rơkàng hìu đah ne den càl khồm gơ par roh jơh.

Broă lơh geh lơh tàm bă ù ơnàng ngan gơtìp lời gời, den làng bol ngui nàng lơh tiah ìs phan lơh sa suơn sre mờ lơh ƀlàng ròng ê kơn rồ. Bi Nguyễn Thị Thanh Mai, hìu ơm song mờ Anih tờm lơh broă ơruh pơnu mờ kơnòm pa tàu càr Dăk Lăk pà gĭt: Añ gŏ ết lơh broă ngan, tơngai lài mờ kòp Kovid-19 den kung gŏ geh đoàn ơruh pơnu tus tìp mat lơh kuèng đơs crih tam ya geh 1,2 dơ̆, tơnơ̆ tơngai kòp den oh ờ gŏ tai. Den hơ̆ sồng lời gời den bàr pe nă làng bol kòn cau khi ê rơpu, kơn rồ tàm hơ̆; phan lơh sa suơn sre den jŏ jŏ kung gŏ pơn diang phan ìs sơl.

Bi H’Giang Niê, Ƀí thư Tỉñ đoàn Dăk Lăk dờp, Anih tờm lơh broă ơruh pơnu, kơnòm pa tàu càr Dăk Lăk gơ lơh bè ờ gŏ lơh broă sùm 5 nam do. Tŭ do uă phan neh gơbàn ờ diơng kơn jơ̆ ngan. Jơnau gơbàn là ờ tơl gùng dà broă lơh, ờ crơng gơs mpồl kwang bàng lơh broă đơng lam. Tỉñ đoàn gam ờ tơl 18 nă cau lơh broă, tàm tŭ jơnau sồr geh ai ngui tŭ do kung ờ ai lơh pa anih tờm. Bơdìh hơ̆, tŭ broă lơh lơh sir tàm nam 2017 den ală gơl gùng lòt rê tàm tiah do ờ hềt lơh sir.

Bi H’Giang Niê pà gĭt, Tỉñ đoàn neh geh sră dan mờ Ủy ƀan Ñân zân càr Dăk Lăk bơtơl priă jền tă lơh niam wơl ală bơta ờ diơng, mơkung rơndap mpồl cau lơh broă crơng gơs mpồl kwang bàng đơng lam lơh broă tàm anih tờm do in; pơgồp bal mờ mpồl cau, gơnoar atbồ tiah do lơh bal nàng ai anih tờm do mŭt lơh broă.

Bi H’Giang Niê, đơs: Bol añ neh sồr Thàñ đoàn Buôn Ma Thuột sơm bat tê bal mờ mpồl đoàn ơruh pơnu, kơnòm pa tàu bơh Tỉñ đoàn lơh ală bơnah broă ơruh pơnu nàng gàr niam bơta niam bơnĕ ù tiah ai anih tờm do in. Pơgồp bal mờ Ủy ƀan Ñân zân sơnah ƀòn Tự An mblàng yal, hòi jà ală hìu bơnhă bañ ròng lềng phan poan jơng tai, bañ ngui ƀlàng anih tờm dê nàng ìs phan lơh bơh suơn sre. Bơdìh hơ̆, Tỉñ đoàn kung mblàng yal tus mờ ală hìu làng bol kis gùt dar tơngkah oh kòn bañ mŭt tàm tiah geh dà tơnau nhơl nàng pleh bơta gơtìp rềs àr.