Tổng Ƀí thư, Củ tịc lơgar ồng Tô Lâm jờng rơ ală broă lơh ngan dờng ngan, nùs nhơm geh kơnòl mờ bơta pơn đơl pràn cíñ trị bơh Đảng ƀộ, gơnoar atbồ, ling klàng mờ làng bol ƀòn dờng Hồ Chí Minh dê; pơn rơ ngan là ƀòn dờng neh bơsram, lam lơh jat Jơnau lơh nền tàm pơrjum dờng dơ̆ XIV jơh nùs, ndrờm bal. 

Bè gùng dà, kơnòl broă tàm tơngai tus, Tổng Ƀí thư, Củ tịc lơgar đơs sùm jơnau sồr, ƀòn dờng kờñ pal git loh jơnau kờñ gơguh lơh sa 2 nơm khà mờ gơnoar broă tề lam bơtàu tơnguh jơh gùt rài lơh sa; ờ lời priă bơcri, ù tiah, rơndap broă lơh halà tŭ niam gơtìp gơ kòl. Ƀòn dờng kờñ pal pơn jat tai kràñ cê tă bơsong jơh ală bơta gơ kòl bè adat boh lam, rơndap ù tiah, bơcri priă; lơh mhar ai priă bơcri dà lơgar. Pơn jat tai lam lơh nền nòn rlau ală jơnau lơh nền tàm pơrjum kuơmàng bơh dà lơgar dê tus mùl màl, ờ ơm tàm broă lơh lơh broă mờ pal bơt bơtàu gơs broă lơh bơtàu tơnguh ngan ngồn; jal mhar lơh sir rơndap ù tiah ƀòn dờng jơh bal phan bơna mpờl gŏ, phan bơna tàm dơlam, phan bơna sồ mờ ală rơndap tap sèng tàm tơrbŏ bal tiah drà pa, gùng kềng tơlir, gàr niam tơrgùm bal, tơrbŏ bal, lơh gơs ală mpồl bơtàu tơnguh wil tơl.