Anih duh broă Làng bol càr Gia Lai pa bơyai lơh pơrjum bơsong gơ wă gơ kòl sờr ntrờn măt ù rơndăp broă lơh gùng rơndeh lòt mhar Quy Nhơn – Pleiku jòng 125 kơi sồ. Rơndăp broă lơh bơnah 1 neh jàu 65% măt ù. Càr lam lơh 13 tiah ơm kis pa ai rlau 620 hìu làng bol in. Bulah bè hơ̆, khà giă tơm dồ êt mờ gơkòl ntrờn phan bơna bơ̆t bơtàu măy mŏk gam lơh gơrềng tơngai pơrgon lơh. Phó Củ tịc Anih duh broă Làng bol càr ồng Nguyễn Tự Công Hoàng, sồr:

“Tơm wơl ù broă lơh sa sươn sre là pal sền swì tờm nggu dipal. Kờñ lơh broă do den jơh ală anih lơh broă cíñ trị bơh thôn, ƀòn rlau hơđăng pal mblàng yal, hòi jà, gĭt wă jơnau yal, yal wơl, dan, sồr bơh làng bol dê, nàng bơsong tơn bơh kâp hơđơm. Lơh ngan rơndăp broă lơh bơnah bàr pal tơngguh mhar lơh di tơngai pơrgon dùl tŭ bal mờ rơndăp broă lơh bơnah 1 mờ 3. Pal tơm wơl jơh ù broă lơh sa sươn sre là ngai 30/4 là sir”.

Bal bal mờ hơ̆, Gia Lai lơh nền dồ ròt tơngai pơrgon lơh: lơh sir gùng kềng lơh sa đah măt tơngai Lik tàm nhai 6 nam 2026; ală gơl gùng tàm tơrbŏ ală kơnhoàl yau lơh sir tàm nam; sờr ntrờn măt ù gùng rơndeh lòt mhar sir tàm nhai 4 nam 2026. Uă rơndăp broă lơh dà ngui sa mờ lơh sa, lơh sơnơm, niam chài, phan bơna bơ̆t bơtàu tiah drà kung geh sồr sơnđờm lơh mờ lơh sir jăt tơngai loh làng. Càr geh jơnau kờñ ai priă 100% priă bơcri nam 2026, sồr ătbồ jăt bơta pal jăt “6 loh”, gơ jăt kơnòl să tờm dê.