Củ tịc Anih duh broă Làng bol càr Lâm Đồng ồng Hồ Văn Mười pa sền swì, git bơta geh ngan ală rơndap broă lơh mờ sồr ală cau tờm bơcri priă, mpồl lam lơh rơndap broă lơh mhar tơngai hơ pơrgon lam lơh rơndap broă. Mpồl neh lòt còp mờ lơh broă mờ Kông ty Kong kơnòl nă să is Luyện kim Trần Hồng Quân, sàh Nhân Cơ nàng sền git tơngai hơ pơrgon lơh rơndap broă lơh Hìu măi đèng lơh trà Dăk Nông. Rơndap broă lơh geh kờp jơh priă bơcri lơh mờr 18 rbô 500 tơmàn đong, bơta pràn bơceh lơh là 450 rbô tấn trà pah nam. Hìu măi là bơnah broă lơh gơlik uă dut ndơl bơh ală Mpồl lơh mờ măi mok tơnhàu bauxite – lơh gơlik alumin mờ lơh gơlik trà lòs.

Kờp dŭ tàm quý 2 nam do rơp lơh sir bơcri priă, ai ngui, mờ bơta pràn bơceh lơh 150 rbô tấn pah nam; tus quý 3 nam 2027 lơh geh bơta pràn bơceh lơh. Tơnơ̆ tŭ sền swì, Củ tịc Anih duh broă Làng bol càr ồng Hồ Văn Mười đơs sùm, do là hìu măi lơh lòs rơndap Việt nam dê, kờñ pal sền gròi tus bơta niam ờdo ờdă broă ngui, ngan là ồs đèng, mờ kung sồr ală sờh, gah broă lơh pơgồp bal tă bơsong bơta kal ke ai mpồl lơh sa kă bro in. Anih duh broă Làng bol càr Lâm Dồng kung pa pơrjum sền swì jơnau lơh nền bơcri priă dà lơgar tơngai bơh nam 2026 tus nam 2030 mờ 24 rơndap broă lơh neh geh ring bal. Càr sồr mhar lơh sir sră pơ àr, gờñ sơn đờm lam lơh, lơh mhar broă ai priă bơcri; Sờh Priă jền rơcang lài ai priă bơcri, ală sàh, sơnah ƀòn, tiah is ồn lơh kràñ broă ai ù lơh rơndap broă. Bulah bè hơ̆, ai priă bơcri dà lơgar bơh càr Lâm Đồng dê gam lơyah ngan, ờ hềt geh 4% broă rơndap lơh sơl. Kờp jơh priă bơcri nam 2026 geh jàu là mờr 15 rbô 800 tơmàn đong, mơya jơh quý 1 mìng rơp pa ai priă bơcri mờr 578 tơmàn đong. Jơnau tờm ngan là gơ kòl ai ù lơh rơndap broă, pràn jak cau tờm lơh rơndap broă ờ huan niam, sră pơ àr gơnoar atbồ kal ke mờ kơnòl bàr pe nă cau tờm bơcri priă dê ờ hềt uă. Phó Củ tịc Anih duh broă Làng bol càr Lâm Đồng ồng Nguyễn Ngọc Phúc pà git, càr gam tơrgùm tă bơsong tơl bơta gơ kòl, is ồn là bè adat boh lam bơcri priă dà lơgar: “Kờñ pal git là, tàm tơngai tŭ do, bol he pal tă bơsong bơta gơ kòl mùl màl lơi. Dilah xăng zờu gơguh jơnhua den bol he tơrgùm tàm broă bơsong sră pơ àr adat boh lam bè bơcri priă dà lơgar lài; pơn jat hơ̆ là ală broă lơh gơtùi lơh mơ tơn. Pơn yơu, ring bal là tơl sàh geh 3 broă lơh mờ lơh mơ tơn nàng tơnguh ai priă bơcri  dà lơgar, mơya pal rơ wah ală broă lơh geh gơ rềng mơ tơn, ai ngui mơ tơn, ală broă lơh ờ duh pal ai ù”.