Tàm bơta dờng ơnàng bơh dà lềng dê, bồt Phú Quý, càr Lâm Đồng gơlik geh bè dùl gar dèk bơh bơta geh is dê. Lik bơh tàm pơn jăt rài kis ur ar, kơlôi rơcang tơl ală bơta bơh Càr lơgar Hà Nội dê, lŏ Ngô Thị Hồng Ánh jòi tus mờ tiah geh trồ tơngai, càl khồm bal mờ nus nhơm đềt mềr bơh kòn bơnus kis tàm tiah bồt dà lềng Phú Quý dê. Do ờ di là dơ̆ sơnrờp lŏ geh tus tàm bồt niam bơnĕ do, mơya bơta niam bơh ù tiah, bal mờ nùs nhơm bơh cau kis tàm tiah Bồt Phú Quý dê kung gam lơh lŏ bè tìp wơl dùl nă cau bơyô đềt mềr lài do dê.

Ală ngai tus tàm gùl dà lềng dờng là ală ngai lŏ Ánh geh mŭt bal tàm bơta sơrmah sơrmài bal mờ bơta niam bơnĕ bơh bồt dà lềng dê. “Añ gơlơh lòt nhơl tàm Phú Quý cèng geh ală broă lơh niam bơnĕ ngan. làng bol tàm do sền kwơ ngan tàm broă sền gàr tiah kis, ală cau kung sơrmah sơrmài niam bơnĕ mờ cau năc lòt nhơl. Priă tăc phan tàm Phú Quý di pal ngan mờ ờ gơtìp kă bro phan jơh. Ală broă lơh gơwèt tàm Phú Quý bơh dơ̆ sơnrờp añ tus tàm do mờ tus tŭ do kung gam cèng geh ală nùs nhơm niam bơnĕ ngan”.

Tơnơ̆ tơmŭt bal, càr Lâm Đồng pa mờ bơta tơrgùm bal jơh càr Dăk Nông mờ Bình Thuận lài do dê neh rề geh dùl bơta pràn bơtàu tơnguh dờng ơnàng. Tŭ do, cau năc lòt nhơl gơtùi tus bal pe mum niam: Dà Làc rơbô bơkào “Câu Âu tàm brê mrềt niam”; Mũi Né “gar đèk kwơ bơh lòt nhơl dà lềng Đah Jum măt tơngai Lik câu Á dê’ mờ Tà Dùng “Pòt dà lềng Hạ Long tàm tiah bơnơm”. Bi Lê Văn Thức, Kwang lam bồ dùl kông ty lòt nhơl tàm Dà Làc pà git, do rơ̆p là gơl gùng lòt nhơl tơrgùm jơh tơn, mùl màl niam bơnĕ bơh brê bơnơm dờng tìp bal mờ dà lềng tơlir. “Añ pin là gùng lòt tàm tơngai tus rơ̆p geh lơh gơs nàng tơrbŏ bal bơh Dà Làc tus Mũi Né, bơh Dà Làc tus Gia Nghĩa ha là Tà Dung lơh gơs pe mum bè hơ̆ den niam bơnĕ ngan”. 

Bal mờ càr Lâm Đồng, bơta niam bơh broă lòt nhơl kung geh tus tàm brê bơnơm dờng Dăk Lăk dê. Tàm tiah phan lời wơl, do là tiah gơlơh bè tơngai gơ-ơm tàm săp dròng cing mpong sùm gùt brê bơnơm, bơta đềt mềr jơh nùs bơh kòn bơnus bal mờ ală bơta niam bơnĕ krơi is bơh ù tiah do dê neh mùl màl tŭp di plai nùs bơh ală cau năc lòt nhơl bơh tiah ngài. Dơ̆ sơnrờp jă jơng tus tàm bă ù pơrhê bazan dê, ồng Nguyễn Văn Minh, cau năc lòt nhơl tus bơh ƀòn dờng Đà Nẵng mùl màl gơlơh niam bơnĕ ngan mờ ală bơta kwơ niam chài krơi is càr Dăk Lăk dê: “Bơta niam cing mồng niam bơnĕ ngan mờ tơrnờm tàm do ñô bơkah ngan, niam bơnĕ ngan. Do kung là dơ̆ sơnrờp añ jă jơng tus tàm do nàng lòt nhơl sền, mpồl cau lơh broă tàm do jơh nùs ngan”.

Bơta tờm bơh bơta pal kah ngan tàm nam do là càr Gia Lai, do là càr dờp bơyai lơh Nam Lòt nhơl Dà lơgar 2026. Ồng Phạm Anh Tuấn, Củ tịc Anih duh broă Làng bol càr Gia Lai pà git, càr gam lơh ngan lơh pa rùp rài mờ mpồl broă lơh geh sùm, pơgồp bal niam đah bơta niam chài brê bơnơm mờ gùng đơs crih ală lơgar pa dê. Do là bơta tờm nàng càr Gia Lai lơh pràn, ai lòt nhơl gơs gah lơh sa tờm mờ ai gŏ măt kă bro “bơnơm tìp dà lềng” tàm pang rùp lòt nhơl ală lơgar dê. “Càr Gia Lai hơ rơ̆p bơyai lơh geh cồng nha Nam Lòt nhơl Dà lơgar 2026 mờ nùs nhơm lơh pràn jăk ngan, lơngăp lơngai, đềt mềr, niam chài nàng tơl nă cau năc lòt nhơl tus ndrờm gŏ geh bơta đềt mềr, krơi is mờ pal kah sùm”.

Tơnơ̆ tơmŭt bal broă lơh sră nggal, ală càr Tây Nguyên – Jăt gah dà lềng Đah Jum tàm gùl lơgar geh dùl bơta dờng ơnàng bơtàu tơnguh krơi is, tơrgùm bal brê – dà lềng bơnơm mờ niam chài ală jơi bơtiàn dê. Bơh tàm bơta mùl màl do, uă mpồl lơh sa kă bro gam tus bal bơ̆t bơtàu ală khà phan lòt nhơl pơgồp bal tiah, rề ơnàng broă lơh ai cau năc lòt nhơl in. Ồng Nguyễn Minh Trí, dùl mpồl lơh sa kă bro lơh geh gơl gùng lòt nhơl Dăk Lăk mờ Khánh Hoà pà git: “Dùm gùng lòt rơ̆p geh tai uă anih tus rơlao, gơl gùng hơ̆ geh dà lềng, geh brê mờ geh bơta niam chài, phan sa. Rơ̆p pơgồp bal càr Dăk Lăk mờ càr Khánh Hoà gơs 1 phan lơh gơs. Tàm 3 ngai, tŭ cau năc tus càr Khánh Hoà geh um dà lềng, rơ̆p sĕ tus tiah đah măt tơngai lik càr Dăk Lăk nàng sền ñrùh Nghênh Phong, guh tus càr Dăk Lăk nàng sền bơta niam chài, croh dà, brê bơnơm, tơnao dà, ñrùh”.

“Brê bơnơm dờng tìp dà lềng tơlir” ờ mìng là bơta tàm tơrbŏ bè ù tiah, mờ là bơta tơrgùm bal bơh phan lời wơl mờ nùs nhơm dê. Tŭ làng bol git prăp gàr tiah bùi nhơ̆t dà lềng, tŭ gơnoar atbồ hơ bơta niam mờ mờng chài lơh broă, hơ̆ là tŭ lòt nhơl mùl màl gơs gah lơh sa tờm, kơl jăp, lơh pơnrơ niam dùl lơgar Việt Nam dờng pràn mờ bềng bơhiàn niam chài.