Kàl prang nam 2025 – 2026 pa do, broă lơh lòt jòi, rờ tơrgùm ƀồc ntìng cau ling chơ̆t màng dong kờl is mờ cau jak chài Việt Nam chơ̆t phi să tàm lơgar Campuchia bơh ală rài tam lơh geh 2 gah pơgồp bal đơng lam, sồr lơh lam lơh tơl làm jat Sră cih kah kĭ hơ pah nam. Broă lơh broă bal, tàm bơyai, bơsong ală broă geh gơrềng geh niam. Mờ bơta lơh bal sùm bơh Mpồl K51 dê (gơwèt Gah đơng lam mpồl ling klàng càr Dăk Lăk) mờ bơta sền gròi, dong kờl bơh gơnoar atbồ mờ ală anih lơh broă geh gơnoar càr Mondulkiri dê lơh pràn broă lơh mblàng yal, yal tơngĭt jơnau, ai mpồl dong kờl tàm ală tiah, tus tŭ do neh tơrgùm geh 22 ƀồc ntìng cau ling chơ̆t màng Việt Nam (ờ hềt gĭt muh mat).

Bàr Mpồl mìng lơh dùl kơnòl broă neh cribơyai, ring bal broă bơyai lơh Dơ̆ răc dan huềng soan, tàm jàu mờ jun tơngăc ƀồc ntìng cau ling chơ̆t màng rê tàm càr Dăk Lăk kờp dŭ geh bơyai lơh tàm ngai 27/5, jat di broă lơh mờ bơhiàn ờs mờng bơh lơgar Campuchia dê. Bàr gah kung ring bal ală tơngume geh gơrềng tú broă lơh jòi, rờ tơrgùm ƀồc ntìng cau ling chơ̆t màng tàm tơngai pơn jat tai.