Pal sền gròi ngan là rơndăp broă lơh gùng rơndeh ồs lòt mhar đah Tô- đah Jum lòt gan ù tiah càr dê mờ bơta jòng mờr 192 kơi sồ. Nàng drơng broă ai mat ù, càr Khánh Hoà kờp dŭ ai 31 tiah ơm kis pa, geh 13 tiah gam geh mờ 18 tiah lơh pa halà pờ ơnàng, mờ kờp jơh priă tă lơh rlau 1 rơbô 700 tơmàn đong. Mơya, bal mờ rơndăp broă lơh do, uă broă lơh ndai tàm ù tiah càr dê kung gam gơtìp kòl yan bè rơndăp tăp sèng, sră pơ àr mờ ală broă lơh lam lơh. Tàm tŭ hơ̆, mpồl kwang bàng lơh jat tơn kơnòl broă tàm kấp hơ đơm gam ờ tơl mờ ờ hềt lơh geh jơnau sồr.

Tềng đăp bơta geh ngan do, càr neh ai 78 kông cứk kấp càr tus dong kờl ƀòn lơgar; mơkung ai gơnoar kĭ sră pơrgon lơh broă ờs mờng mờ ală mpồl lơh broă broă lơh dà lơgar tŭ ờ tơl cau lơh broă, nàng kờñ lơh mhar tŭ tơngai mut lơh ai mat ù.