Jat jơnau yal, tơngai bơh nam 2021 tus nam 2025, jơh gùt càr Dăk Lăk geh 2 rbô 460 rơndap broă lơh ngui priă bơcri bơh kes priă dà lơgar, tàm hơ̆, 1 rbô 579 rơndap broă lơh ờ hềt geh sền sơ wì, sŏk sền jơnau yal priă jền tă dơ̆ ngui; 141 rơndap broă lơh gơtìp kal ke, gơ kòl, lơyài tơngai hơ pơrgon jŏ jòng. Ồng Lương Nguyễn Minh Triết, Ƀí thư Tỉñ ủy càr Dăk Lăk sồr sền nền wơl tơl làm, sac rơ wah loh làng tơl mpồl rơndap broă lơh, lơh gơs lài mờ ngai 15/5 tus do; mờ kung lơh loh kơnòl tơl mpồl bal, cau nă să is, pơgồp bal mờ sền swì pràn jak kwang bàng. Càr Dăk Lăk rơp tơng gơs ală jơnum lơh broă bơh đơng lam Anih duh broă Làng bol càr drơng kơnòl tơn, jat sền, tă bơsong tơl rơndap broă lơh, gàr ờ gơ tàm rơndap rơndồl mờ bơsong jơh ală bơta gơ kòl. Broă bơsong pal gơ jat bal mờ sền sơ wì, đơs pơn dut broă lơh tìs ndang, tă bơsong ndang nàng ai rơndap broă lơh in lơh broă ngan ngồn.