Tàm ƀòn dờng Kon Tum, Mpồl kwang bàng lơh broă bơh Ƀộ Khoa họk mờ Kông nghệ geh Kwang geh jơng tàm Đảng dà lơgar, Ƀộ trưởng ồng Huỳnh Thành Đạt lam bồ mpồl kwang bàng neh geh dơ̆ lơh broă mờ kwang đơng lam càr Kon Tum mờ ală sở, gah lơh broă geh gơnoar càr Kon Tum dê bè broă tơnguh bơtàu tờm kơnuh sơnơm Ngọc Linh mờ phan dà lơgar kơnuh sơnơm Việt Nam mờ bơta tờm là kơnuh sơnơm Ngọc Linh dê.

Tơnơ̆ mờ uă nam prăp gàr sơntìl, tus tŭ do càr Kon Tum geh bă ù rơlao 1 rơbô 260 lồ tam kơnuh sơnơm Ngọc Linh mờ kờp jơh khà geh di pơgăp 213 tấn, jơnau kờñ tus nam 2025, kờp jơh bă ù tam tờm kơnuh sơnơm Ngọc Linh càr Kon Tum dê geh 4 rơbô 500 lồ. Đơs tàm dơ̆ lơh broă, Ƀộ trưởng Ƀộ Khoa họk mờ Kông nghệ ồng Huỳnh Thành Đạt jào kơnòl mùl màl ai tus tơl mpồl lơh broă geh gơnoar bơh Ƀộ dê mờ sồr ală mpồl lơh broă mhar kơlôi sơnơng lơh jăt. Ƀộ trưởng ồng Huỳnh Thành Đạt đơs tờm, do kung là ală broă lơh kwơ màng mờ geh cồng nha nàng tơnguh bơtàu kơl jăp phan geh lơh bơh tờm kơnuh sơnơm Ngọc Linh dê.