Kờp tus jơh nam 2022 làng bol, mpồl lơh sa kă bro tàm ù tiah kơnhoàl Tu Mơ Rông neh pờ ơnàng bă ù tam phan lơh sơnơm gơguh mờr 3 rơbô lồ, tàm hơ̆ mìng is tờm kơnuh sơnơm Ngọc Linh là rlau 1 rơbô 700 lồ. Jat ồng A Sỹ- Ƀí thư Đảng ủy xã Măng Ri, bal mờ cèng wơl priă lơh geh ai làng bol kòn cau dùl ết nă cau Sơdàng in, broă bơtàu tơnguh lơh sa bơh tờm lơh sơnơm gam dong làng bol tam gơl bơta kơlôi sơnơng, broă lơh. Ồng A Sỹ đơs: "Lài do làng bol mìng gĭt lòt jòi rê den lòt tăc lơm, tŭ do làng bol tam gơl ngan lòt jòi geh tờm kơnuh sơnơm là làng bol cèng rê tam. Hìu bơnhă bi geh kơnuh sơnơm Ngọc Linh den hìu bơnhă añ kung pơnđơl pràn lơh ngan geh kơnuh sơnơm Ngọc Linh sơl. Làng bol tam uă bàr pe tờm kơnuh sơnơm jriang, ngũ vị tử, sơn trà. Làng bol kung tam gơl is bơta kơlôi sơnơng, broă lơh sơng ka sền gàr, atbồ mờ sền gàr. Lài do làng bol ờ hềt tryang tryồng lơh den tŭ do làng bol neh tryang tryồng lơh broă, làng bol kờñ pơnđơl pràn lơh ngan brồ guh nàng lơh pas di pal".

Nam 2022 lơh tềl bơtàu tơnguh mhar kơnhoàl Tu Mơ Rông, càr Kon Tum dê tàm broă tam uă phan lơh sơnơm. Bal mờ mờr 500 lồ kơnuh sơnơm Ngọc Linh, làng bol mờ mpồl lơh sa kă bro gam tam geh 400 lồ kơnuh sơnơm jriang, ngũ vị tử, sơn trà... Gơnoar atbồ tiah do neh hòi jà uă bơta pràn tàm bơrlŭ bal mờ ală broă lơh jơnau kờñ dà lơgar dong kờl làng bol bơh bơta gĭt wă tus sơntìl phan tam, priă bơcri, bơta chài nàng bơtàu tơnguh phan lơh sơnơm. Mờ broă lơh do làng bol mờ ală Hợp ták xã tàm ù tiah kơnhoàl neh ờng is rlau 30 lồ kơnuh sơnơm jriang; rlau 200 rơbô tờm sơn trà.... nàng tăc sơn tìl ai làng bol in. Bi A Đáo, ơm tàm ƀòn Tam Rin, xã Ngọc Yêu, pà gĭt, hìu bơnhă bi neh tam thảo quả, tiêu brê mờ gam lơh jat broă tam kơnuh sơnơm Ngọc Linh. Bi A Đáo đơs: "Kơnuh sơnơm Ngọc Linh nam do là tam 1 sào. Tờm Thảo quả 3 nam geh bơkào bè do. Ai tiêu brê lài do là añ ai bơh tàm brê bơnơm geh is, tŭ do den ờng sơntìl nàng tam. Geh plai den geh priă".

Bơsong broă lơh tăc bro phan lơh sơnơm, nam 2022 dơ̆ sơn rờp kơnhoàl Tu Mơ Rông bơyai lơh Drà kă bro kơnuh sơnơm Ngọc Linh pơgồp bal mờ yal tơngĭt nhơl chờ mờ ală phan bơna kwơ màng mùl geh. Mìng tàm 3 ngai drà kă bro geh priă rlau 30 tơmàn đong uă ngan bơh broă tăc phan lơh sơnơm ris mờ bàr pe phan bơna lơh gơlik bơh phan lơh sơnơm dê. Kung tàm nam 2022, kơnhoàl Tu Mơ Rông neh tus bal Drà kă bro phan lơh sơnơm- phan poan jơng tiah nhàr lơgar kơnhoàl Đăk Glei; drà kă bro kơnuh sơnơm Ngọc Linh Tu Mơ Rông tàm ƀòn dờng Đà Nẵng... Bi Đỗ Thị Tô Hoài, Hợp ták xã thảo dược mpồl bơtiàn Ngọc Yêu mờ bơta pràn là phan bơna tinh zờu, tŭ do neh tam rlau 30 lồ thảo quả, kơnuh sơnơm jriang, sơn trà... tàm xã Ngọc Yêu, pà gĭt: "Oh gŏ làng bol chờ hờp ngan mờ drà kă bro bè do. Nàng ai làng bol in geh sền gĭt uă tai bơta gĭt wă kung bè là nàng yal tơngĭt ală phan bơna bơh he dê. Oh kơlôi là pal bơyai lơh uă drà kă bro bè do rlau tai".

Nàng hòi jà jơh bal bơta kơlôi sơnơng jak  mờ bơta pràn bơtàu tơnguh phan lơh sơnơm, Ủy ƀan Ñân zân kơnhoàl Tu Mơ Rông neh bơyai lơh dơ̆ Cribơyai “Kơnuh sơnơm Ngọc Linh, ală phan bơna kwơ màng mùl geh pơgồp bal mờ nhơl chờ” tơrgùm uă cau atbồ, cau jak chài mờ cau lơh sa kă bro jơh nùs ngan. Ồng Võ Trung Mạnh, Củ tịc Ủy ƀan Ñân zân kơnhoàl Tu Mơ Rông pà gĭt, kơnhoàl gam lam lơh uă broă lơh nàng lơh sa bơh phan lơh sơnơm cèng wơl priă lơh geh mờ tơnguh uă rài kis bơh kòn cau Sơdàng dê priă bơcri rlau 95% khà kờp làng bol bơh kơnhoàl dê. Ồng Võ Trung Mạnh đơs: "Kơnhoàl lơh pràn broă lơh lơh bal đah mpồl lơh sa kă bro, đah Hợp ták xã mờ làng bol nàng bơtàu tơnguh bă ù tam phan lơh sơnơm. Bơtàu tơnguh bă ù tam kơnuh sơnơm Ngọc Linh pràn rlau tai, rề ơnàng rlau tai tàm làng bol nàng làng bol in dờp geh tơn bơta kwơ bơh tờm kơnuh sơnơm Ngọc Linh bơta phan lơh sơnơm kwơ do dê. Kơnhoàl sơlơ tơnguh atbồ niam rlau tai tờm sơntìl nàng gàr niam tờm kơnuh sơnơm Ngọc Linh gàr geh mat kă bro bơtàu tơnguh tus tàm drà kă bro nàng kờñ tơnguh uă rài kis ai làng bol in tàm tơngai tus".

Bơh phan lơh sơnơm, cau ngui sa, nac lòt nhơl tàm lơgar mờ lơgar ndai neh gĭt mờ jòi tus kơnhoàl kal ke uă Tu Mơ Rông, càr Kon Tum dê. Nam 2022 ală bơta phan lơh sơnơm mờ kwơ màng là tờm kơnuh sơnơm Ngọc linh neh ai làng bol in priă lơh geh uă. Khà hìu bơnhă rƀah kơnhoàl dê gơmù 8,74% uă rlau 2 dơ̆ jơnau kờñ geh ai bơh càr Kon Tum dê. Sền gĭt broă bơtàu tơnguh lơh sa- mpồl bơtiàn kơnhoàl dê là tàm pơgar “Brê- kơnuh sơnơm Ngọc Linh- Phan lơh sơnơm- Nhơl chờ” mờ bơh ală cồng nha neh lơh geh, Tu Mơ Rông pin dờn cơnđoà mŭt tàm nam pa 2023.