Jơnau yal bơh Sở Giáo dục mờ Đào tạo càr Kon Tum pà gŏ, gơwèt mờ kấp mầm non tŭ do càr gam ờ tơl rơlao 700 nă, kấp 1 ờ tơl 477 nă, kấp 2 ờ tơl mờr 500 nă mờ kấp pe ờ tơl 43 nă cau pơgru.

         Pơgru Cao Thanh Diễm Quỳnh bơto dà Mỹ tàm 2 hìu bơsram kấp dùl tàm càr Kon Tum

Nàng bơsong bơta ờ tơl cau pơgru, gah bơto bơtê mờ bơsram càr Kon Tum neh lơh jăt broă rơndăp, tơrgùm ală hìu bơsram mầm non, phổ thông dà lơgar lơh dềt; tam pà, ai, ring bal mpồl cau pơgru atbồ, cau pơgru bơto, cau lơh broă tàm tơl kơnhoàl, bơsong broă pơnkah, ờ tơl tàm ờ uă tiah; Tam pà, ai cau pơgru kấp 3 tus bơto ờ uă tiết tàm kấp 2, cau pơgru kấp bàr tus bơto ờ uă tiết tàm kấp 1. Ồng Thái Khắc Hoà, Kwang atbồ Phòng giáo dục mờ Đào tạo ƀòn dờng Kon Tum pà git, jơh gùt ƀòn dờng ờ tơl mờr 160 nă cau pơgru bơto tàm ơdŭ, den tàng geh ai broă lơh là: “Rơndăp wơl ơdŭ nàng ai cau pơgru bơto di pal tàm ală hìu bơsram. Lơh jăt broă rơndăp wơl hìu bơsram dềt tus hìu bơsram tờm neh geh rơndăp 7 hìu bơsram, tàm hơ̆ geh 2 hìu bơsram mầm non mờ 5 hìu bơsram kấp dùl. Lơh jăt broă ntrờn cau pơgru bơh hìu bơsram jơnkah tus hờ hìu bơsram ờ tơl nàng rơndăp wơl di pal broă bơto đah ală hìu bơsram. Gơwèt mờ ală môn gam ờ tơl bè môn Tin họk, dà Mỹ kấp dùl gah lơh broă do neh ai cau pơgru bơto tàm tus ală hìu bơsram. Bơdìh hơ̆ tai, gah lơh broă do neh ai cau pơgru bơto Tin họk, dà Mỹ kấp bàr tus bơto Tin họk, dà Mỹ tàm kấp dùl”.

          Gùt càr Dăk Lăk tŭ do ờ tơl 1 rơbô 260 nă cau pơgru bơto bơh mầm non tus kấp pe

Tàm càr Gia Lai tŭ do gam ờ tơl rơlao 3 rơbô 700 nă cau pơgru bơto. Ồng Phạm Văn Đại, Kwang atbồ Phòng giáo dục mờ Đào tạo kơnhoàl Ia Grai pà git, tŭ do gam ờ tơl mờr 300 nă cau pơgru. Lơh jăt kơrnoăt bơh Broă bơto phổ thông tơrgùm bal nam 2018, nam bơsram 2022-2023 geh là nam bơsram sơnrờp ngan bơsram dà Mỹ mờ Tin họk gơs môn bơsram tờm bơh ơdŭ 3 tàm kấp dùl, ala mờ broă rơwah is bè lài do. Bơta mùl màl do neh lơh kơnhoàl gam ờ tơl uă cau pơgru mờ pơn jăt tai gơtìp kal ke tŭ ờ hềt di pal mờ broă kờñ tơl cau pơgru bơto 2 môn do. “Tŭ do kal ke bơh gah bơto bơtê mờ bơsram kơnhoàl Ia Grai dê là lơh jăt sră măi pa bơh môn dà Mỹ ơdŭ 2 mờ tin họk ơdŭ 3 tŭ do ờ tơl uă ngan. Mờ kờp jơh cau pơgru bơto môn dà Mỹ gam ờ tơl uă ngan tàm dùl hìu bơasram là 5 hìu bơsram ờ hềt geh cau pơgru bơto môn dà Mỹ mờ 8 hìu bơsram ờ geh cau pơgru bơto môn Tin họk den tàng kal ke ngan”.

Ồng Nguyễn Đình Thức, Kwang atbồ phòng Giáo dục mờ Đào tạo ƀòn dờng Pleiku den pà git, ƀòn dờng do gam ờ tơl di pơgăp 600 nă cau pơgru. Nàng tơl niam broă bơto mờ bơsram, gah bơto mờ bơsram tơrgùm sền kwơ tus mờ broă rơndăp wơl, ndrờm bal mpồl cau pơgru tàm ală hìu bơsram. Mờ tàm tơngu me khà cau pơgru geh jào, rơcang hợp đồng mờ cau pơgru, cau lơh broă gam ờ tơl. “Phòng neh bơyai lơh broă mờ ală hìu bơsram nàng sền wơl hìu bơsram, ơdŭ bơsram mờ ai cau pơgru bơto tàm ală hìu bơsram. Tềng đăp mờ broă ờ tơl cau pơgru gal bè do den neh cri bơyai mờ ală hìu bơsram rơndăp wơl hìu bơsram, ơdŭ bơsram, tơrgùm bal hìu bơsram ơdŭ bơsram uă ngan nàng tềm pềr cau pơgru neh geh jào tàm bơta geh. Phòng kung dan mờ ală kấp geh gơnoar in wơl tàm bơta ală kơrnoăt geh ai bơh gah bơto bơtê mờ bơsram, bơh hìu bơsram dê nàng ai tơl khà cau pơgru kờñ bè là cau lơh broă ai ală hìu bơsram in nàng lơh jăt broă bơto bơsram”.

Ồng Lê Duy Định, Kwang atbồ Sở Giáo dục mờ Đào tạo càr Gia Lai pà git gam pơgồp bal mờ Sở Nội vụ lơh broă mờ ală kơnhoàl, ƀòn dờng, thị xã nàng kơlôi sơnơng, dan mờ UɃÑZ càr ai tơlik kơrnoăt bơtơl pơgồp bal mờ rơndăp wơl, bơyai lơh wơl hìu bơsram ơdŭ bơsram, tơrgùm ntrờn ală hìu bơsram dềt, tơnguh khà kơnòm bơsram tàm ơdŭ tus tàm khà uă ngan di jăt mờ bơta geh ai tàm ală kấp bơsram dê. Tơnơ̆ mờ tŭ neh lơh gơs ală tơngu me do hơ̆ sồng kơlôi sơnơng wơl broă ờ tơl, tơl cau pơgru tàm ală tiah nàng tam pà 1 rơbô 244 nă cau pơgru bơh Dà lơgar jào. “Gơwèt mờ ală ơdŭ tàm kấp dùl pal geh 35 nă kơnòm bơsram tàm ơdŭ bơsram, gam gơwèt mờ ală ơdŭ tàm kấp bàr là 45 nă kơnòm bơsram tàm dùl ơdŭ. Ală kơnhoàl lơh jăt broă tơrgùm wơl ală hìu bơsram kung bè broă tơl khà kơnòm bơsram tàm ơdŭ bè hơ̆ geh tềm pềr dùl khà cau pơgru uă ngan. Tŭ geh bơtơl dùl khà cau pơgru, bal mờ broă tơrgùm ală hìu bơsram kung bè broă ai khà kơnòm bơsram tàm ơdŭ den bơta kờñ broă bơto bơtê mờ bơsram tàm càr Gia Lai geh tơl cau pơgru bơto”.

Bal mờ ală broă lơh ing tềng đăp măt, nàng bơsong di pal broă ờ tơl cau pơgru, Sở Giáo dục mờ Đào tạo ală càr tàm Tây Nguyên kung neh dan mờ Ƀộ Giáo dục mờ Đào tạo dan mờ Cíñ phủ bơtơl cau pơgru bơto tàm ală môn gam ờ tơl. Geh broă rơwah viên cứk gơwèt mờ cau bơsram dờng gah lơh pơgru geh dong kờl priă tă tàm broă bơsram sră, priă ngui di jăt mờ Nghị địñ sồ 116 bơh Cíñ phủ neh ai nàng ƀuơn ai ală càr in bè broă rơwah cau pơgru.