Đơs tàm dơ̆ kĭ, ồng Lê Ngọc Tuấn, Củ tịc Ủy ƀan Ñân zân càr Kon Tum đơs nền, bulah Kon Tum mờ càr Stung Treng, lơgar Campuchia ờ geh bal gùng nhàr lơgar mơya bơta geh is, phan kuơ, ù tiah… geh uă bơta ndrờm bal nàng bal mờ gơp bơtàu tơnguh tàm ală gah mờ tơl gah sền gròi jat nùs nhơm git wă, pin dờn bal mờ gơp. Mpồl kwang bàng kâp dờng càr Kon Tum mờ Stung Treng sền sơ wì nền nòn cồng nha lơh broă bal lơh geh tàm tơngai lài, đơs ală kal ke, kòl yan mờ ring bal kĭ Sră cih kah lơh broă pơgồp bal.

Tàm hơ̆ gah lơh sa, broă drơng ala geh tơrgùm lơh broă bal bơtàu tơnguh nhơl chờ, lơh sa suơn sre, kă bro mờ kông thương. Gah niam chài mpồl bơtiàn tơrgùm lơh broă bal bơtàu tơnguh bơto bơsram, niam chài, dong kờl cau Việt Nam tàm càr Stung Treng. Gah lơh sơnơm cribơyai mờng chài rơcang sơndră kòp bơtờp, bơto bơtê cau lơh broă gah lơh sơnơm mờ broă lơh tàm pơgơl, cribơyai broă mpồl kwang bàng. 2 gah ring bal, 2 nam dùl dơ̆ geh tàm pơdar bơyai lơh Pơrjum sền sơ wì cồng nha ală tơngume neh kĭ.