Pôs đồng ling sền gàr tiah nhàr lơgar Ba Sơn, Mpồl ling sền gàr tiah nhàr lơgar càr Lạng Sơn atbồ mờr 42 kơi sồ gùng tiah nhàr lơgar gơl lòt gan ù tiah 3 xã Cao Lâu, Xuất Lễ mờ Mẫu Sơn. Ù tiah uă ngan là kơh bơnơm, ù lơh sa, ƀlàng sre ờ hoan lơh den rài kis làng bol gơtìp uă ngan kal ke.

 Sền gĭt kơnòl broă dong làng bol bè ờs wơl rài kis, bơtàu tơnguh lơh sa nàng brồ guh lik klàs rƀah, kwang bàng, cau ling tàm Pôs đồng ling sền gàr tiah nhàr lơgar  Ba Sơn sùm “4 bal”, pơgồp bal mờ gơnoar atbồ mờ ală mpồl cau tàm tiah do dê lơh ală broă lơh lơh sa, at tê sơñio broă lơh, dong làng bol tơnguh uă priă lơh geh, tam gơl wơl rài kis. Kwang bàng, cau ling neh tă pơgồp bal blơi rlau 2 rơbô sơntìl tờm cê bơkào rơmĭt pà ai ală hìu bơnhă geh rài kis kal ke tàm xã Mẫu Sơn in mờ rcang bơsram bơta mờng chài, bơta chài ờng tam nàng bal mờ làng bol sơng ka sền gàr tờm chi lơh sơnơm kwơ màng do.

Mpồl ling sền gàr tiah nhàr lơgar pơgồp bal mờ gơnoar atbồ ală tiah lam lơh uă broă lơh nàng dong làng bol bơtàu tơnguh lơh sa

Ồng  Dương Trùng Lỷ (ơm tàm xã Mẫu Sơn, kơnhoàl Cao Lộc, càr Lạng Sơn) pà gĭt: Hìu bơnhă añ kung geh Pôs đồng ling sền gàr tiah nhàr lơgar Ba Sơn pà 100 tờm cê bơkào rơmĭt. Să tờm añ kung geh mŭt tàm Pôs đồng nàng bơto pơlam ală bơta chài sơng ka sền gàr phan tam. Bơh tŭ jơ lòt bơsram, geh bơta mờng chài den phan tam hòn gơs niam ngan. Añ ưn ngài mpồl ling sền gàr tiah nhàr lơgar neh dong hìu bơnhă añ bơtàu tơnguh lơh sa, gàr niam bè ờs wơl rài kis ai hìu bơnhă in.

Ngui jơh ală bă ù gời rềp tiah nhàr lơgar, kwang bàng, cau ling Pôs đồng ling sền gàr tiah nhàr lơgar Ba Sơn tam tơrlòng lài lơh broă lơh “Mpung gle Tiah nhàr lơgar Việt Nam dê” tàm ù tiah xã Xuất Lễ; blơi pà 3 rơbô 500 tờm sơntìl gle Bát Độ ai ală hìu bơnhă tus bal atbồ gùng tiah nhàr lơgar jrong tiah nhàr lơgar tam mờ sơngka sền gàr. Tơnơ̆ 2 nam, ală tờm gle neh hòn uă mờ sơnđờm ai tơnhào băng. Ồng Lý Văn Thắng, Phó Củ tịc Ủy ƀan Ñân zân xã Xuất Lễ, kơnhoàl Cao Lộc đơs là do là broă lơh niam, pơgồp bơnah lơh geh cồng nha broă lơh jơh gùt làng bol tus bal sền gàr gơnoar tờm ù tiah, sền gàr lơngap lơngai tiah nhàr lơgar bơh dà lơgar dê tàm bơta pa. Ồng Lý Văn Thắng, đơs: Broă tam tờm gle nàng làng bol in bơtàu tơnguh lơh sa là gùng lòt pa tàm xã dê. Tàm tŭ làng bol sơngka sền gàr, kung pơgồp bal sền gàr gùng tiah nhàr lơgar, neh pơgồp bơnah tam gơl bơta gĭt wă bơh làng bol dê, sơm bat tê bal sền gàr tiah nhàr lơgar, jrong nhàr lơgar, mờ tơnơ̆ do tờm gle dờng gơs den kung cèng wơl priă lơh geh uă ai làng bol in.

 Kuang bàng, cau ling sền gàr tiah nhàr lơgar dong làng bol tiah nhàr lơgar toès kòi tŭ tơngai tơnhào tus

Mờ kơnòl broă, nùs nhơm mờ bơta đềt mềr mờ làng bol, kwang bàng, cau ling Pôs đồng ling sền gàr tiah nhàr lơgar Ba Sơn neh geh ală broă lơh ngan ngồn, geh ngan nàng dong làng bol tàm ù tiah lơh pôs đồng hời rơ hời tơnguh rài kis lơh sa, uă hìu bơnhă neh lik bơh sră cih hìu bơnhă rƀah. Mìng tàm 3 nam do, mpồl ling neh lơh geh 15 broă lơh drơng broă làng bol lơh broă sa, pà 5 rơbô 500 sơntìl phan tam ai ală hìu bơnhă kal ke in.., mờ kờp jơh khà priă rlau 4 tơmàn đong. Ală cau ling sền gàr tiah nhàr lơgar kung lời bơta sền gàr, dong kờl uă ngan tus ală kơnòm dềt geh rài kis kal ke mờ broă lơh “Dong kờl oh tus hìu bơsram”, “Kòn ròng Pôs đồng ling sền gàr tiah nhàr lơgar”.

Trung tá Hoàng Trung Hiếu, Cíñ trị viên Pôs đồng ling sền gàr tiah nhàr lơgar Ba Sơn pà gĭt: Lơh ngan ngồn broă lơh “Broă lơh bơt bơtàu drơng rài kis làng bol lơh broă sa, bềng nùs nhơm pôs đồng ling klàng mờ xã” bol añ neh rcang lài, lơh ngan pơgồp bal mờ gơnoar atbồ ală tiah lam lơh uă bơnah broă nàng dong làng bol tàm tiah nhàr lơgar bè ờs wơl rài kis, đềt mềr mờ ƀòn lơgar, bơh hơ̆ lơh ngan dong kờl, bal mờ mpồl ling sền gàr tiah nhàr lơgar atbồ, sền gàr brê kơ̆ kơljap gơnoar tờm, sền gàr lơngap lơngai tiah nhàr lơgar bơh dà lơgar dê.

 Ală broă lơh geh ngan, nùs nhơm bơh kwang bàng, cau ling Pôs đồng ling sền gàr tiah nhàr lơgar Ba Sơn dê đơs is mờ mpồl ling sền gàr tiah nhàr lơgar càr Lạng Sơn neh pơgồp bơnah lơh niam rlau tai rùp hin Cau ling wa Hồ; lơh jat niam jơnau sồr “Pôs đồng là hìu, tiah nhàr lơgar là ƀòn lơgar, làng bol ală jơi bơtiàn kòn cau là oh mi pròc mhàm bal”; dong làng bol ală jơi bơtiàn kòn cau tiah nhàr lơgar hời rơ hời tơnguh uă cồng nha rài kis, pơgồp bơnah sền gàr kơ̆ kơljap lơngap lơngai tiah nhàr lơgar tiah đah Tô bơh Dà lơgar dê.