Thôn 17  tŭ do neh geh tàm tơrbŏ mờ tiah tờm xã Ea Ning, lòt tus kơnhoàl Cư Kuiñ mờ gùng lơh mờ bê tông dờng ơnàng, geh ală ồs đèng sòl àng tàm trồ mang. Jat ồng Nguyễn Văn Bá, dùl nă làng bol ơm tàm thôn 17, gơl gùng do geh lơh bơh bơta sơm bat tê bal tă pơgồp bơh tơl nă cau dê bè priă jền, pà ù is mờ uă ngan ngai lơh broă. Bơta dùl nùs bal, pơgồp bal bơh làng bol thôn 17 dê kung dong sền gàr lơngap lơngai, rơndap tap sèng geh sền gàr kơ̆ kơljap, nùs nhơm kờñ gơboh bal ƀòn lơgar ngai sơlơ niam, bơta kơñau phan lơh geh bơh suơn sre, lơh aniai phan tam neh ờ gam geh tai.

Ồng Nguyễn Văn Bá pà gĭt, làng bol tàm thôn tŭ do neh iang nùs ngan lơh broă sa. Ồng Nguyễn Văn Bá đơs: "Lài do, do là ù tiah kal ke ngan, ală cau lơh tìs tus cau kơñau phan, cau ngir ma túy, dŭi kơñau phan cau kung geh sơl. Mơya bơh tŭ lam lơh jơh gùt làng bol lơh niam broă lơh sền gàr lơngap lơngai mờ sền gàr thôn, ƀòn, sền gàr lơngap lơngai dà lơgar den geh bơta dong kờl bơh jơh gùt làng bol tàm do dùl nùs bal, den bol añ neh kơryan geh rềs àr mpồl bơtiàn tàm tiah do ngai sơlơ rơ hời gơ mù. Pơn rơ ngan là kwang atbồ thôn ồng Mao, ồng hơ̆ geh nùs nhơm geh kơnòl uă ngan, mơkung geh bơta mờng chài, broă lơh lơh broă atbồ, bơt bơtàu ală srơh tus broă lam lơh bơta ring lơngai thôn, ƀòn, sền gàr lơngap lơngai, rơndap tap sèng tơl thôn, ƀòn in".

Ồng Mao mờ ông Nguyễn Văn Bá đơs tus hơ̆ là ồng Lê Xuân Mao, Kwang atbồ thôn 17 bơh nam 2014, tŭ Kwang àng càr Dăk Lăk sac rwah tiah do là tiah lơh broă lơh tơrlòng lài “Tiah làng bol ơm kis lơngap lơngai, ring lơngai, ờ geh cau lơh tìs mờ rềs àr mpồl bơtiàn”. Nàng broă lơh broă lơh gờñ geh lơh geh ală cồng nha geh ngan, ồng Lê Xuân Mao neh tă pơgồp jơnau đơs ai kấp ủy, gơnoar atbồ tiah do in lam lơh ală dơ̆ mblàng yal, tìp mat lơh kuèng, tơm bơh bơr mờ làng bol, bơsong ală bơta tam lah tam ring, tơnguh uă bơta tam klăc bal, bơt bơtàu nùs nhơm ƀòn lơgar, bơto tơngkah jà ală cau gơ tŭp pừ rê lơh wơl rài kis pa. Ồng Lê Xuân Mao, kah wơl: "Bol añ bơyai lơh bơt bơtàu broă lơh Tiah làng bol ơm kis lơngap lơngai, ring lơngai, ờ geh cau lơh tìs mờ rềs àr mpồl bơtiàn, tus tŭ do neh 8 nam do. Bol añ sùm bơyai lơh pơrjum làng bol, mblàng yal ai làng bol in bè sền gàr lơngap lơngai Dà lơgar, hơ̆ là tơl nă làng bol là dùl nă cau ling, kwang àng. Dơ̆ bàr là geh 5 Mpồl ală hìu bơnhă tàm thôn den tơl mpồl ală hìu bơnhă là dùl mpồl rcang sơndră cau lơh tìs. Bol añ mblàng yal, lam lơh tơngume bè broă lơh sền gàr lơngap lơngai, rơndap tap sèng, den hơ̆ sồng tơnguh uă bơta gĭt wă bơh làng bol dê nàng kis bal mờ gơ̆p đềt mềr rlau mờ lơh niam broă lơh nàng gàr niam sền gàr lơngap lơngai, rơndap tap sèng".

  Bơh dơ̆ mblàng yal, lam lơh, tus tŭ do, làng bol thôn 17 neh jàu 5 nơm ngkơr phàu lơh is, lơh tam gơl nùs nhơm 12 nă ơruh pơnu sùm lơh tìs adat boh lam mờ hơ ờ lơh tìs wơl tai broă lơh tìs. Mpồl atbồ is thôn sùm lòt sền, sền gŏ mờ tus bal kơryan 34 dơ̆ ơruh pơnu tam lơh, lơh nrah 23 dơ̆ mpồl ơruh pơnu tơrgùm jơla ir tŭ jiơ jat jơnau sồr lơh roh bơta sền gàr lơngap lơngai, rơndap tap sèng, bơh hìu bơnhă nàng hòi jà ơruh pơnu bơto tơngkah mờ atbồ bañ lời ală ơruh pơnu, kơnòm pa tàu lơh tìs adat boh lam.

 Să tờm ồng Mao kung pơgồp bal mờ mpồl Kwang àng xã bơsong 14 dơ̆ kơl dang nùs lơh sồt să cau ndai, bơsong 20 dơ̆ tam lah tàm dơlam is làng bol, tus bal sền gŏ, yă 5 dơ̆ nhơl bài, yal mờ Kwang àng xã in 12 jơnau yal tơngĭt geh kwơ drơng broă lơh lùp sền.

Kơnờm bơh hơ̆, bơh ù tiah geh ală bơta sền gàr lơngap lơngai kal ke, tus tŭ do, thôn 17 hời rơ hời gơ gơs tiah ƀòn lơgar lơngap lơngai, ring lơngai, ờ geh cau lơh tìs. Đại úy Bùi Văn Trọng, Kwang atbồ Kwang àng xã Ea Ning, kơnhoàl Cư Kuiñ đơs, broă lơh Tiah làng bol ơm kis lơngap lơngai, ring lơngai, ờ geh cau lơh tìs mờ rềs àr mpồl bơtiàn tàm thôn 17 neh lơh jat niam cồng nha tàm broă sền gàr lơngap lơngai, rơndap tap sèng, bè ờs wơl rài kis làng bol tàm ù tiah xã dê. Đại úy Bùi Văn Trọng, đơs: "Mờ cồng nha bơh broă lơh hơ̆ dê den kung jờng rơ uă ngan gơnoar bơh ồng Lê Xuân Mao, Kwang atbồ tiah dềt broă lơh dê, den jờng rơ uă ngan nùs nhơm geh kơnòl tàm broă lơh gàr niam bơta lơngap lơngai, rơndap tap sèng tàm thôn 17 dê kung bè tàm ù tiah jơh gùt xã. Ồng Mao là dùl nă cau ngăc ngar, jơh nùs tàm broă lơh, geh uă tă pơgồp dờng ngan ai kwang bàng xã kung bè gơnoar atbồ tiah do in tàm broă lơh gàr niam sền gàr lơngap lơngai, rơndap tap sèng. Bơh cồng nha lơh geh tàm broă lơh thôn 17 dê den Kwang àng xã kung neh lơh tai 2 broă lơh do tàm thôn 24 mờ thôn 22 xã Ea Ning dê".

Bơh lồi nam 2021, ồng Mao ờ lơh Kwang atbồ thôn 17 tai, ntrờn lơh Củ tịc Mpồl cau dờng sơnam mờ Mpồl cau gơtìp sơnơm khih dioxin lơh aniai xã Ea Ning dê. Ồng kung là cau ala mat Hội đồng Ñân kấp kơnhoàl mờ ủy viên Ủy ƀan Mặt trận Dà lơgar Việt Nam kơnhoàl Cư Kuiñ dê. Tàm sơnam 65, ồng kung gam sùm đềt mềr mờ làng bol tàm thôn, lời uă tŭ jiơ lùp còp, pơndờm pơđiang ală cau neh jơh tơngai lơh glài jàm mờ rê wơl kis gơ rờm bal mờ mpồl bơtiàn, bơto tơngkah khi lơh niam wơl rài kis lơh broă sa, bañ gơtŭp tìs tai.

Mờ ală tă pơgồp hơ̆, ồng Lê Xuân Mao geh làng bol pin dờn, kờñ gơboh, sùm dờp geh sră jờng rơ, bằng khen bơh Ủy ƀan Ñân zân càr mờ Kwang atbồ Kwang àng càr Dăk Lăk dê. Pa do, ồng Mao chờ hờp ngan là dùl tàm 15 nă cau pơn rơ jak jơh gùt lơgar geh Ƀộ trưởng Ƀộ Kwang àng pà Bằng khen tài bơh geh uă tă pơgồp ai broă lơh rcang sơndră cau lơh tìs mờ srơh jơh gùt làng bol sền gàr lơngap lơngai Dà lơgar nam 2022.