Nam do, Ƀộ Giáo dục mờ Đào tạo ai 07 mpồl kơnòm bơsram jăk lơgar Việt Nam mờ 38 dơ̆ kơnòm bơsram tus bal pơrlòng Olimpic dunia. Cồng nha geh 100% kơnòm bơsram lơgar Việt Nam tus pơrlòng ndrờm geh khà. Ală mpồl kơnòm bơsram lơgar Việt Nam pơn jăt tai geh tàm mpồl 10 lơgar geh cồng nha uă ngan mờ uă kơnòm bơsram geh khà điểm uă ngan.

Sền dờng màng jào 10 Huân cương Lao động khà bàr, 7 Huân cương Lao động khà pe pà ală kơnòm bơsram geh cồng nha jăk ngan dơ̆ pơrlòng Olimpic mờ Khà pơn jờng khoa họk kỹ thuật dunia nam 2022. Đơs tàm dơ̆ tìp măt, Củ tịc lơgar ồng Nguyễn Xuân Phúc tơlik nùs nhơm chờ hờp tìp măt ală kơnòm bơsram cèng rê geh bơta pơnyờ să ai Dà lơgar in. Củ tịc lơgar ồng Nguyễn Xuân Phúc đơs tờm, bơhiàn bơh jơi bơtiàn he dê sùm sền kwơ tus mờ broă drơng gàr , ròng siam mờ bơto bơtê cau jăk. Đảng, Dà lơgar he sùm đơs, broă bơto bơtê là broă lơh lài ngan dà lơgar dê, mờ ai uă ngan bơta pràn bơcri priă tàm broă tơnguh bơtàu broă bơto bơtê mờ bơsram in.