Do là dơ̆ lòt còp dơ̆ sơnrờp bơh dùl nă kwang đơng lam bồ tờm ngan lơgar Việt Nam dê tus lơgar Indonesia kờp bơh tơnơ̆ Pơrjum dờng Đảng khoă XIII kung bè bơh tŭ kòp dờng Kovid-19 lơh bơtờp. Kwơmàng, do gam là dơ̆ lòt còp kâp Dà lơgar bơh sơnrờp bơh Củ tịc lơgar Việt Nam dê tus lơgar Indonesia dê tơnơ̆ 9 nam mờ tàm tŭ tơngai 2 lơgar wèt tus tơngkah kir sơnrai tòm 10 nam lơh bơta gĭt gơ̆p Tam klăc lơh broă bal jŏ jòng (2013- 2023). Bal mờ ală broă lơh broă bal tŭ do gam geh đah 2 lơgar, dơ̆ lòt còp kâp Dà lơgar tus lơgar Indonesia bơh Củ tịc lơgar ồng Nguyễn Xuân Phúc dê geh gơtha kwơmàng ngan, pơgồp bơnah lơh kơ̆ kơl jăp bơta pin dờn cíñ trị, lơh jrô ơnàng rlau tai bơta gĭt gơ̆p lơh broă bal uă bơta, ai bơta gĭt gơ̆p đah 2 lơgar mŭt tàm tŭ tơngai pa bơtàu tơnguh pràn kơldang rlau.