Drim ngai 16/11, Củ tịc lơgar ồng Nguyễn Xuân Phúc mờ pơ ùr bal mờ Mpồl kwang bàng kấp dờng Việt Nam neh tus càr lơgar Bangkok sơnđờm dơ̆ còp ngan ngồn lơgar Thái Lan mờ tus bal pơrjum ală kwang đơng lam bồ lơh sa Cribơyai lơh broă bal lơh sa câu Á- Thái Bình Dương (APEC) dơ̆ 29 jat jơnau jà bơh Thủ tướng lơgar Thái Lan ồng Prayut Chan-o-cha.

Mho dùl ngai bal, Thủ tướng Prayut Chan-o-cha mờ pơ ùr neh đơng lam dơ̆ wă yŭ rơyùm Củ tịc lơgar ồng Nguyễn Xuân Phúc mờ pơ ùr. Tơnơ̆ hơ̆ 2 nă kwang đơng lam bồ lơh dơ̆ tìp mat cribơyai broă nàng cribơyal ală gùng dà broă lơh dờng pơn jat tai lơh kơ̆ kơljap bơnàng jă bơh bơta gĭt gơ̆p Lơh broă bal jŏ jòng sơlơ tơnguh mờ lơh jrô ơnàng làm uă rlau tai bơta gĭt gơ̆p đah 2 gah dê. Bàr nă Kwang đơng lam bồ kung geh sền dơ̆ kĭ uă sră nggal lơh broă bal kwơ màng đah 2 lơgar dê. Kờp dŭ, tàm dơ̆ lòt còp bơh Củ tịc lơgar ồng Nguyễn Xuân Phúc dê geh tìp mat mờ Củ tịc Quôk hội Thái Lan ồng Chuan Leekpai, tìp mat ală mpồl lơh sa kă bro pơn rơ jak bơh 2 lơgar mờ mpồl bơtiàn làng bol Việt Nam kis tàm lơgar Thái Lan.