Drim òr (22/12), tàm Gơlang Kwang atbồ lơgar tàm ƀòn dờng Bogor, càr Tây Java, Kwang atbồ lơgar Indonesia ồng Joko Widodo đơng lam dơ̆ wă rò kấp Dà lơgar Củ tịc lơgar ồng Nguyễn Xuân Phúc. Tơnơ̆ mờ dơ̆ wă rò geh bơyai lơh, Củ tịc lơgar ồng Nguyễn Xuân Phúc cri bơyai mờ Kwang atbồ lơgar Indonesia ồng Joko Widodo.

Tàm dơ̆ cri bơyai, Củ tịc lơgar ồng Nguyễn Xuân Phúc đơs tờm lơgar Việt Nam hơ geh kờñ bal mờ lơgar Indonesia dờp kơnòl geh cồng nha gơnoar broă lơh Củ tịc mpồl ASEAN nam 2023 mờ lơgar Indonesia ring bal kờñ lơgar Việt Nam lơh gơs niam gơnoar lơgar tàm mpồl Duh broă Gơnoar kòn bơnus Liên hợp quốk tơngai bơh nam 2023 tus 2025. Bàr nă kwang đơng lam ring bal pal sơbì ală bơta kơrian kă bro nàng lơh geh jăt jơnau kờñ kă bro bàr đah rơlao 15 tơmàn dolar Mỹ lài mờ nam 2028 kung bè tơnguh lơh broă bal bè năng lượng lơh geh wơl, gùng che ồs đèng ngăc ngar mờ lơh pil ai rơndeh ôtô điện in. Bàr kwang đơng lam kung mùl màl yal broă bàr lơgar neh tơn jơh 12 nam cri bơyai bè broă wah nhàr dà lơgar tàm tiah geh lơh sa mờ ring bal pơn jăt tai geh sùm nùs nhơm kơ̆ dơn bơh mpồl ASEAN dê bè dà lềng đah măt tơngai lik.