Mho òr (19/12), tàm Hà Nội, mpồl ling rơcang gàr kơl wàng trồ bơyai lơh Tìp măt di tơnkah 50 nam Tam lơh jai pha “Hà Nội – Điện Biên Phủ tềng hờ đang kơl wàng trồ” mờ wă rò Củ tịc lơgar còp, lơh broă tàm Mpồl ling di tàm dơ̆ tơnkah 78 namNgai crơng gơs Ling klàng làng bol Việt Nam mờ 33 nam Ngai chờ gùt làng bol sền gàr dà lơgar.

Đơs tàm dơ̆ tìp măt, Củ tịc lơgar ồng Nguyễn Xuân Phúc đơs loh, tam lơh jai pha Hà Nội – Điện Biên Phủ tềng hờ đang kơl wàng trồ tơlik gùng dà cíñ trị, ling klàng di pal bơh Đảng he dê, ling klàng he dê, là tam lơh jai pha bơh bơta pràn cíñ trị, nùs nhơm bơh gùt jơi bơtiàn Việt Nam dê; là bồ tơngoh ngăc ngar, lơh ngan khin tam lơh, git tam lơh mờ jai pha ling lơgar Mỹ sò tơm. Bơh tam lơh jai pha do, Củ tịc lơgar ồng Nguyễn Xuân Phúc đơs là, geh uă jơnau bơsram geh kwơ pal geh ngui bơceh pa tàm broă bơ̆t bơtàu mờ sền gàr Dà lơgar tŭ do.

Pơn jờng ală cồng nha jăk chài bơh Mpồl ling rơcang gàr kơl wàng trồ mờr 60 nam do, Củ tịc lơgar kung đơs tus ală bơta lòng tàm broă bơ̆t bơtàu mờ sền gàr Dà lơgar tŭ do, mờ sồr mpồl ling do pal ngui niam bơhiàn ờs mờng khin cha jăk chài, sền kwơ broă bơ̆t bơtàu mpồl ling mùl màl pràn bè kòn bơnus mờ phào crong, phan lơh broă, ai broă bơ̆t bơtàu kòn bơnus là tờm-bơta tờm ai geh cồng nha kơnòl sền gàr Dà lơgar.