Tàm dơ̆ wă Đại sứ lơgar El Salvador, Củ tịc lơgar ồng Nguyễn Xuân Phúc đơs nền Việt Nam sền dờng màng mờ kơ̆p kờñ pơn jat tai sơlơ tơnguh mờ tơnguh bơta gĭt gơ̆p mờ ală lơgar tàm tiah Mỹ Latiñ đơs bal, mờ lơgar El Salvador đơs is. Việt Nam sùm cih kah bơta tam klăc bal, bơta kờñ bơh làng bol tiah Mỹ Latiñ dê, tàm hơ̆ geh làng bol lơgar El Savador, tàm dơ̆ tam lơh dong klàs jơi bơtiàn lài do mờ bơt bơtàu dà lơgar tŭ do dê. 

Củ tịc lơgar mờ Đại sứ lơgar Ấn Độ bal mờ ală kwang bàng tus bal tàm dơ̆ wă

Gờm chờ ồng Sandeep Arya geh pồ at gơnoar broă Đại sứ lơgar Ấn Độ tàm Việt Nam, Củ tịc lơgar ồng Nguyễn Xuân Phúc đơs nền broă lơh mìng dùl lơm bơh lơgar Việt Nam dê là sùm sền dờng màng bơta gĭt gơ̆p lơh bơyô bal mờ lơh broă bal jŏ jòng tơl làm mờ lơgar Ấn Độ, dùl dà lơgar dờng pràn gam bơtàu tơnguh pràn kơldang, geh gơnoar broă mờ bơngă uă ngan tàm tiah do mờ tàm dunia. Gờm chờ mò Oh Youngju geh pồ at gơnoar broă là ùr Đại sứ sơn rờp lơgar Hàn Quôk dê tàm Việt Nam, Củ tịc lơgar ồng Nguyễn Xuân Phúc pin dờn mờ bơta mờng chài uă ngan bơh mò Đại sứ dê, bơta gĭt gơ̆p đah 2 lơgar geh ngai sơlơ bơtàu tơnguh rlau tai geh mŭt lơh ngan ngồn mờ geh cồng nha.